Tuni kalung hong lengsak khat ~ Pu Thangboi

Tuni kalung hong lengsak khat ~ Pu Thangboi

Passport zum lam kapai leh mawtaw tuangkhial kha mawk. Nisat pian tawh lamkawm tawn in ka pai leh hih Nice Restaurant saimai va nawkkha citciat. Ka lung hong lengvat peuhmah. Ka phawkvat pawlkhat:

2009 kum Belpawl Ni (Union Day) dinner hiah bawl ding hoihsa pian. Pu Gin Kam Lian tawh kanih vua vadawp. A dawltungbup booking bawl khol. Tua pen galkap kumpi’ thukan te’n na thei khia uh. “February 12 ni sai hong theilo ding” ci in thu na pia lian uh. Tua thu media ah gensak ziahziah pah.

Mipi in zong tha hong piakna in hih sai akihon kik ciang in alom atang a na lei ziahziah uh. Tua khit a kipan khot cihtak a khawng hiau uh. Khat vei Pu Kam Lian mah tawh sun khat kava hawh uh leh asai neinu bang in lungdamna hong ko ngaungau zawzen hi. (Kawlte’ nainganzi akhauhpai lam nung phawk kikkik ing. Tua hunlai khawng in NLD zum paiding taxi sap leng asap hong lalo khawng ommawk uh hi.)

2010 kum Belpawl Ni tak teh bel misok te’n nathei zel khale uh cihna tawh koimah booking khol nawnlo. Ahun teh amun ah kiciam in pai ngeingai ziau. Tua tung in bel Sanchaung lam a sai khat ah Union Day dinner nuamtak in zangh thei.

2011 kum Union Day dinner pen NLD zumpi ah bawl. UNA in makaih. Pu Gin Kam Lian in hun uk. Aung San Su Kyi zong hong pai thei. Stephen Vocal Band te zong lasa ding a cial. Scorpion te’ “The Wind of Change” leh Israel te’ kahla “By The Rivers of Babylon” hong sakna ding vua genkhol pah. “The Wind of Change” asak laitak un Aung San Su Kyi omkhong thei nawnlo in vasak pih hi.

Tua ni in NLD te’n cikmah a asap zawh ngeilo uh Israel ambassador pa kasap leh hong pai lian hi. Aung San Su Kyi zong nuamlua ahih man in agei ah va tuphei pah a hopih suaisuai pah hi. (Ambassador pa tawh ka kimuh kik teh “Bang teng kiho na vua?” ka cih leh “Ka sanggam Zomi te’n hong sam ahih man a hong pai hi’ng kacih leh lamdang sa peuhmah veh aw” hong ci hi)

Tua ni NLD zum ah dinner man khit teh ko adawn khawmzel honkhat hih Nice Restaurant ah kituah kik ding in ka kiciam uh hi. Hih Nice Restaurant ah tua nitak dawn cihtak in dawn in nuam kasa peuhmah uh hi. Abei khempeuh tulaitak a Yangon CM Phyo Min Thein in hong sik hi. Pu Kam Lian apau hong mawl pian ciang in ka ciah uh hi.

Kawlgam Democracy ngahna ding hanciamna lak ah hih sai zong kihelkha mahmah hi. Tuni hih sai ka muh teh kalung hong lengvat peuhmah a phawkkhak vat teng hong suut samsam kahi hi. Lai nong simsak lungdam ing. Mung Laan Thang (Tawmvei, Zangkong)