2020 Myanmar gambup kiteelpi leh Zogam makai kiteelna

2020 Myanmar gambup kiteelpi leh Zogam makai kiteelna

2020 kum November kha Ni 8 ni, Sunday ni in, Myanmar Gambup leh Gamkee Innpi (Hluttaw/Parliament) tuamtuam ading, Gambup Kiteelpi bawl dingin Myanmar Gam Kumpi, Kiteelpi Tanupawl in vaihawm hi.

Gambup Kiteelpi sung ah Zogam khua tuamtuam panin Zogam Makai ding kiteelna kibawl ding hi. Ahong tung ding kum (5) sung, Zogam leh Zomi makai dingin taangpi taangta deihna tawh Zogam Makai kiteel ding ahih manin, Leitungbup Zomi Innkuan (LZI) Kipawlna in lawpna leh lam-etna tawh kimuak hi. Tutung 2020 Gambup Kiteelpi sung ah Zogam Makai dingin akithawi Political Party leh Zomi MP Kuanglui mimal, kumdang sangin pawlcing zawtham ahih manin, LZI Kipawlna in lawpna leh zahtakna tawh kimuak hi.

LZI Kipawlna in Zogam khantohna ding leh Zomi-te nuntakzia a khantohna dingin kikumkhawm a, vai hawmkhop theihna ding cih thu, Ngimna Bulpi khat in kinei hi. Tua ahih manin, 2020 Myanmar Gambup Kiteelpi sung a, Zogam Makai kiteelna leh Zogam Makai dingin a kithawi Member of Parliament (MP) Kuangluite tawh kisai in, LZI Kipawlna Executive Council in, hih Thupulakna nung lam a kigelh thusunna, lam-etna leh lungulhnate kinei hi.

Executive Council – Leitungbup Zomi Innkuan Kipawlna

Theihsakna:

• Zogam ah Mee apia thei, laizom Zomi u leh nau, nu leh pa, nungak tangvalte
• LZI Kipawlna sung a kipawlkhawm Zomi kipawlna khempeuh
• Zomi sung a thukizakna khempeuh
• Zogam sung ah Political Party khempeuh
• Zomi MP Kuanglui khempeuh

2020 Myanmar Gambup Kiteelpi leh Zogam Makai Kiteelna Thusunte, Lam-etnate leh Lunggulhnate

A. Mee khia thei Zomi Taangpi Taangta tung ah thusunna:

2020 Myanmar Gambup Kiteelpi ciangin, Zogam Makai kiteel ding ahih manin, Zogam Makai dingin a kithawi Member of Parliament (MP) Kuangluite tawh kisai in, Vote (Mee) akhia ding Zomi taangpi taangta tung ah, LZI Kipawlna Executive Council in anuai a bangin thu kisung hi.

1. Zogam Makai (Member of Parliament) dingin anungta Pasian a zahtak, thumaanna leh diktatna kiptak in a len, thutak in gamta in thu tawh a kalsuan, kampau mukpau kidawm in gamtat luhek a picing, zia leh tong hoihte tawh a khangkhia, zuauthu leh golhguk a zanglo, angsungbek a khual nam ahilo, khua leh tui in zahtak in a muan Makaite teel ni.

2. Zogam leh Zomi itna takpi anei, Zogam leh Zomi ading in a nuntakna, a neih a lam, a pilna a siamnate itsiiklo in a piakhia ngam, gam leh minam mabante ah tangzang takin madawk in ma a pang masa ngam Makaite teel ni.

3. Maban khatpeuh ah makai thuvaihawm panmun alen ngei (leadership experience), gam makai dingin pilna siamna kicing a nei (education and expertise), kimakaihzia (governance) leh thuvaanzia (management) a siam, nasep siamna leh sepzawhna kicing a nei (capacity), taangpi taangta zahtak in midangte a thusim (respect), midangte tawh liangko kikim in ma apangkhawm thei Makaite teel ni.

B. Zogam Makaite dinmun tawh kisai lam-etna:

Zogam Makai dingin a kithawi, MP Kuanglui peuhmah in, anuai a thute tawh kisai in dinmun leh ngimna kician anei dingin, zahtakna tawh kilam-en hi.

1. Zogam Makai dingin a kithawi MP Kuanglui peuhmah in, Gam Makai dingin akilawm akituak mi kician, mi picing khat a hihna (competent) uh a pulak ngam dingin kilam-en hi.

2. Gam Makai khat hih theihna dingin a kisam, pilna siamna, makaih siamna, thu leh la vaihawm siamna, nasep silbawl siamna, nasep maban lianpite sepzawhna anei dingin kilam-en hi.

3. Teelcing Zomi MP peuhmah in Party dangte, namdangte, gamsung gampua a om kumpi thunei uliante leh makai tuamtuamte tawh Zogam khantohna dingin, kikumkhawm a, khut kilen in ma a pangkhawm thei dingin kilam-en hi.

4. Teelcing Zomi MP peuhmah in Zogam, Zomi leh Zogam leitang tawh kisai in hamsiatna ding, supna ding, guallelhna ding thu leh la khatpeuh, kumpi thuneite ahi a, namdang pawl khatpeuh in avaihawm aleh, hangsan takin khaktan in, taangpi makaih a lungphona abawl ngam, akisap hun ciangin a MP panmun panin anuak ngam dingin kilam-en hi.

5. Party min tawh ahi zongin, mimal min tawh ahi zongin, Zogam Makai dingin taangpi in ateelkhit ciangin, gam kivaipuakzia leh gam ki-ukna tawh kisai in ama Party/Mimal thumeilette (policy) leh dinmunte kiptak in lensuak in, tua a thumeilette leh a dinmunte in Zogam leh Zomi-te adingin in ahoih pen a hihna teltak hilhcian thei a, thukhun a bawlsawm ziate (policy advocacy) bangin kalsuan in, a ngimnate atangtun zawhna dingin a hanciam tawntung takpina dingun kilam-en hi.

6. Gam khantohna (development) tawh kisai akician ngimna leh mabante nei in, taangpi mai ah teltak in pulak a, Zogam Makai dingin akiteelkhit ciangin, tua ngimna leh mabante a tangtung theihna dingin, ma apang takpi dingin kilam-en hi.

7. Myanmar Gam sung ah Zomi-te in minam kician, minam picing khat hihna tawh minam thuneihna bukim (the rights of ethnic/indigenous peoples) angah theihna dingin nakpi takin hanciam in ma apang dingin kilam-en hi.

8. Zogam Makai khat hihna tawh gam leh minam ading a mapanna khempeuh ah taangpi deihna bangin (democracy), thu leh la tawh vaihawm (rule of law) a, taangpi theihpih dingin a kilangsak (transparency) thei tawntung dingin kilam-en hi.

9. Teelcing Zomi MP peuhmah in, mimal hamphatna leh Party hamphatna khatpeuh sangin, khua leh tui, taangpi taangta, gam leh minam hamphatna ding amasak zaw, athusim zaw Zogam Makai ahi dingin kilam-en hi.

C. 2020-2025 Zogam Khantohna ding Lunggulhnate:

Gam khantohna lam tawh kisai in, abeisa hun sungin, Zogam leh Zomi-te in kiim leh paam kiphalo ahih amnin, 2020 Gambup Kiteelpi sung ah taangpi in ateel Zogam Makai peuhmah in, anuai a Zogam khantohnate, kum 5 sungin ahong sepkhiat zawhna dingun kilunggulh hi.

1. Zogam buppi Mei (Electricity) atan’ zawhna ding,

2. Tedim khuapi, Tonzang khuapi leh tuinek ahhaksatna khua tuamtuamte ah tuilak (Water Supply) akicing in behlap zawhna ding,

3. Tedim Zatopi, Tonzang Zatopi, Cikha Zatopi leh Khaikam Zatopite a dinmun akikhantoh theihna ding, Zatopite dinmun tawh kituak in Siavuan Siama kicing om a, Zato vanzat kicing a kineih zawhna ding,

4. Zogam sung ah ankhing a kikham theihna dingin lokhawh singpuakna leh nasep silbawlna khangto in akibehlap zawhna ding,

5. Zogam sung ah sumlei sumzuakna a khantohna ding leh Zogam sung a Border Trade Center-te, a mun a mual zui in, a Gamhuam (Township) sung a kumpi thuneite thuneihna leh vaanna nuai ah a om theihna ding,

6. Zogam sung ah pilnasang sinna University/College Sangpi atawm pen khat leh siamna tuamtuam sinna College/Institute Sangpi atawm pen khat peuhmah akilam zawhna ding, Tedim Sang innpi a kilaih zawhna ding,

7. Zogam sung a Primary School Sang khempeuh ah Sangnaupangte akhawnkhong in Sun-an akivaak zawhna ding, Zogam sung a High School Sang khempeuh ah Computer a kipan, Laboratory, Library, Sports Facilities, Extra Curriculum Programs tuamtuam a kineih zawhna ding,

8. Zogam gamgi kician takin a kikhun zawhna ding, pupa luahsa gam teng Zogam sung ah a kigawmkhop theihna ding,

9. Zogam leitang pen tualsuak Zomi-te bekin aneih theihna dingin thukhun akikhun theihna ding, Zogam leitang pen anei omlo hilo a, pupa ngeina zui in, tualsuak Zomi-te in logam in a kineikhin a hihna kiptak in thu a kikhun theihna ding,

10. Zogam sung a leisung sumpiangte, Zomi-te khuttung panbek in a kizeek theihna ding,

11. Zogam Saizang khua ah Vanleng Tualpilian (Airport) khat leh Cikha khua ah Vanleng Tualpineu (Airstrip) khat a kilam zawhna ding,

12. Zogam sung a namdang Gamnuaimite a kihepkhiat theihna ding,

13. Zolai picing semsem in a tangzai semsemna ding, Zolai pen High School ciang ah a kisim zawhna ding, Zolai in a kigelh pilna siamna, tangthu tuanthu, thului, thubu tuamtuam bawlzawhna ding,

14. Zongeina akilaptoh theihna ding, Zongeina zia leh tongte Sang ah a kisin theihna ding,

15. Zomi-te sung ah beh leh phung, kampau mukpau, biakna leh upna kideidanlo a, minam khat hihna tawh kipumkhatna leh kikhualna akhan semsemna ding, khua leh tui sung ah kilemna, kikhualna leh daihna a om tawntung theihna ding.

B. Thungetna

LZI Kipawlna Executive Council pawl in 2020 Myanmar Gambup Kiteelpi pen nawkkhak nawngkaina omlo in, suakta tak leh thuman takin a kibawl zawhna ding, Zogam Makai kiteelna sung ah khat leh khat kithusimna leh picinna tawh kidemna a om theihna dingin anungta Pasian tung ah thu kingen hi. Executive Council – Leitungbup Zomi Innkuan Kipawlna