Ngaih Anglai Zal Dingin – 12 ~ Hau Za Cin

Ngaih Anglai Zal Dingin – 12

A sawtlo in a u Suanno vankhakte leh laikhak dang hong tung a, ahi zongin a van bek om in a mi hong tunglo ahih manin Niangno adingin lungdamna bucing zo taktak lo hi. Nungak pil ahih manin a lunggimna, a haksatna khawng mi mai ah kidawk sak ding cih bang a ut kei a, ahi thei bangin a ki ip teta hi.

Van ngah teng a ngah dingte kiangah khatkhat in hawm uh a, Niangno khut liing setset hi. Mite in theisiam uh a, ahi zongin a cihtheih uh a om tuan kei hi. Leitung bel neih leh lam bek in lungnopna kicing hong pialo in mihing mahmah kisam hi cih hong mu cian sak mahmah hi. A lung lah dam, ahih hang lunghiang kawmkawm in a lungdamna thu a u Suan kiangah puak dingin a lupna tunga bawk hilhial kawmin “Itluat U Suan aw…” ciin laikhak gelh hong kipan hi…

“Itluat U Suan aw,

Nong laikhakte leh nong van khakte ka ngah ciang ka lung lah dam, ka kha lah sia, ka cihna ding theilo in themvei bang ka mit hong zing miaimuai in ka khuadak ngam kei hi. Ahi zongin nong itna in hong nusia lo in nong itna khau in hong khih lai ahih manin ka lungdam a, kei zong nang bek mah ka it ka ngaih na hi. Nanglo ngal leitungah ka lungnopna omlo hi.

U Suan aw, heina dang zong na vang kong ngaihna kidanglo ding hi. Nang adingin phuh bang ka kho dinga, nang zong kei adingin khuambang na kho in. Mel kimu a tongdam kisaanloh hangin thelnah laileng tung pan na tongluan za in, na honuam tawh khawlkhawm zel ka hih manin hampha angtang kisa ing. Nang bek hong it ka hi aw U Suan, u Suanno aw!

Rangoon tan bek nong ciah theih a, i khua Tedim nong tun zawhloh hang zong hong theisiam ka hi aw. Kong it luat manin ka daha, ka kap a, ka khitui a luan hangin ka lungsim leh kong itna kiam tuanlo a, nang ading bek in a pumpi, ka lungsim leh ka ngaihsutna ka kem siangtho den hi cih hong mangngilhsak kei in maw. Hong ciahto hilecin ‘zum leh saili a si omlo’ a kicih mah bangin khuamual kong muak ciang na anglum ah hong belh in naubang hong pomcip ding ka lunggulh hiven maw. Cikciang dawnbang tuah ni zangni hong suak tam maw, u Suan!?

Nang lah na lenna Singapore khua nuam pan vangngaih mubang ngailo tual na leng zongin lia lungmawl kei na sen ngaihno in tung sun nisa lel a a hul ningniang pak kungte bangin na hul kha zel ing. Lia lungmawl ka sinlai damna ding leh na vangngaih lailung ka zuan nemtuam dingin na thelnah laileng pan tong hong lel kik zel in aw u Suan. Hong ngailua si’ng maw, hong ngailua siing!

Heina danglo a mual zatam hal ah i len sungin dawnbang tuah a tui bang gawm ding taang nang sinthu hi. Vabang pil a taang na lunggel tui bang tuang hong tungsak in maw, lia lungmawl in haibang na ngakden ing. I kimuhloh zawh Christmas nihvei in hong kheng man aive….

Nanga ding beka piang leh nang adinga muanhuai den,
Na vangngai,

Niangno
Tedim
February 21, 1984

PS: Na omna lam kong pai ding na gente zong kei bel cihna ding atheilo hi ing. Vabang a pil taangpaal nang bek in a thei hiteh, u Suanno aw, nang thuthu hi. Nang cih bangbang kei bel tuisik abang hi ing.”

(zop lai ding)

Hau Za Cin
Phuitong Liim