Pakistan ah biakpiak laitak Suicide Bomb puakkham, mi 16 si, 35 liam

Pakistan ah biakpiak laitak Suicide Bomb puakkham, mi 16 si, 35 liam

Pakistan gamsung ah zanni Friday Prayer abawllaitak un Suicide Bomb khat ki puakkhamsak ahih manin mi 16 si a, adangzong mi 35 bang liam cih AFP News pan kizasawn hi. Hih Bomb puakkhapna munpen Butmana khuasung hi a, Afghanistan gamtawh kigamgi uh a, Taliban Militants te’n buaina apiansakdetna munkhat ahihi.

Muslim te’n Friday nisim in Mosque ah biakpiakna aneizel uh hi a, tualaimun ah hih Bomb apuakkhamsak uh ahihi ci’n Senior Tribal Administration Official panin genkhia uhhi.

Kua gamtatna cih agenkhia aomloh hangin tuakuamsung tengah Pakistani Taliban te’n biakinn, sanginn, thukhenzum cihte ah buaina piangsakden uh ahih manin, tuatemah hipahding in ki ummawh hi.

Hih Taliban Militants te mah in 2014 kum December khasung in Peshawar khuasung aom sanginn khat buluh uh a, mi 150 val kaplummawk uhhi. Tua asilak ah atamzaw pen sangnaupang vive hi uh a, hihpen Pakistan gamsung Terror Attack lakah ahuaisia, alipkhap huai penpen in akiciamteh khat ahihi.

2004 kum akipan Pakistan gamsung ah kido kikapna vive kizomto ngekngek a, tuahang in asihlawh khuasungmi tultampitak phakhinta hi. Tulamlam ciangin agamsung ah Security hong hoihzawdeuhta ahih manin, gamsung buaina hongkiam zawdeuh a, ahi zongin ahunhun in Suicide Bomb puakkham cihte kiza vevelai hi. ZD Sawltak #zomidaily