Nelson Mandela (1918-2013) ~ Hau Za Cin

Nelson Mandela (1918-2013)

“Mivomte in midangte a ukcip ding ka deih kei a, mikangte in midangte a ukcip ding zong ka deih tuankei hi. Mi khempeuh liangko kikimin lung kihual a nuntak khopna, kilem diamdiam a ten khopna, khantohna kibang neih ding ka deihpen hi. Tua banga mi khempeuh a tenkhop ding uh ka lunggulh pen leh ka hanciam hi a, ka tup leh ka ngim, ka nuntakpih bulpi ahi hi. Ka lungtup a tangtunna dingin a kul leh zong a si ngam pa ka hi hi.” – Nelson Mandela

African National Congress (ANC) President leh South Africa gam ah mivom President a sem masa pen Nelson Mandela in kum 95 pha in December 5, 2013 niin leitung nusia hi. July 18, 1918 in South Africa gam Mvezo khua a Thembu innkuan sung pan piang hi. Kum 7 a phak ciangin sangkah kipan a, a sangsiate in a ‘mikang’ min dingin Nelson na phuaksak uh hi (tua hun in mikang min neih teitei kisamsak uh hi, tua sanginn ah). Sangnaupang a hih lai pan gamsungah liangko kikim ding a deih manin ANC ah lut in deihngetna tuamtuam ah kihel kawikawi hi. Mivom leh mikang kideidanna a deihloh luat manin liangko kikim ding a deih pawl ANC nasepna ah thuk lut semsem a, galkap thautawi pawl ah a makaipi ciang dongin kahto, kikoihto hi. Mikangte in mivomte a ukcip manin tua ‘sila’ suahna pan suahtak theihna dingin mabunna lianpipi nei in a deihna uh tangtunsakna ding a kul leh hiamgam zong zang lel uh hi. Tua banga hiamgam a a gamtatna tuamtuamte uh hong hat luat ciangin amah zong kiman a, thudang tuamtuam hanga buaina ah zong kihel hi cih tawh a mawhna kibehlapsak in a thu liansak semsem uh a, a tawpna ah khantawn khumcip dingin Robben Island ah 1964 kum in kipuak hi. Kum 27 sung a kikhumcip khit, kum 71 a phak kum, kum 1990 kum in kikhahkhia a, South Africa President dingin kitel in kum 5 a sep khit ciangin tawlnga hi.

Mandela sih a kizak ciangin leitungbup in phawkna leh thuakpihna thu pulak ngengngang in – India kumpi in ‘true Gandhian’ ciin ni sagih sung dahpihna bawl ding ci uh a, USA in zong gam dialkhai a kimciang ah khiasuk in zahtakna pia uh hi. December 15, 2013 ciang ama khua lui mahah kivui ding hi.

Banghang in Mandela hizah in hong minthang hiam cih pen a theihnop huai thu khat hi. Banghangin mivom khat hizah in kiphawk a, kipakta hiam cih pen theih huai thu hi a, leitung mihing khempeuh, minam khempeuh in a theihnop thu khat hong suak hi. Banghang in India kumpi in Gandhi lungsim bang a nei mi ci laizang hiam? Kawlgam pan Aungsan Suu Kyi in zong, “Kua mah in a vun leh mel hangin kideidan nading omlo hi cih theita hi. A suah a khanna, a minam hangin kuamah kituambawl leh kideidan kulse lo hi. A kisam bangin leitung pen kikhekthei, kiheithei lua hi cih hong telsak hi,” ci hi.

Africa gam pen mivomte gam hi. Mikangte (English) leh mikang dang namkhat Dutch kicite (Netherland) mite a lut uh ciangin mivomte sila leh nasem in zang uh a, deidan in tuambawl uh hi. Mivomte haizaw leh khangto lo ahih manin ukcip in sila zat uh a, a ut bangun ganhing zah phialin zang uh hi. Tua banga mikangte in a ukcip uh kum 300 phata hi! Meileng sungah a tuan uh ciangin zong mivomte in tutphah tungah tut theihna mun nei uh a, mikangte bel a utna peuh vuah tu thei uh hi. A tutna hoihzaw leh a siangthozaw te ah bang mivomte in tutna cih thadah a tua bang indei sungah zong lutna ding phalna ngahlo uh hi. Khuasungah zong mivomte peuhmah mikangte omna phual lamah vak theih hilo, vak phal hilo a, mivomte vak theihna ding kuam kiciamtehsak hi. Ganhing banga a tatna ding uh ciangtansak om cih phial himai hi. Khuasunga Bus Station te ah zong tutna om mah leh mivomte tutna leh mikangte tutna a tuam in kibawl sese a, “Mivomte tutna ding” cih leh “Mikangte tutna ding” cih bangin kiciamteh sese hi. Minam kideidanna bek hilo in mivomte simmawhna leh ukcipna, neubawlna leh sila bawlna ahi hi. Nupa kiteng cih thadah lawm kingai zong kiphallo a, sanginn khat ah sangkah khawm cih khawng zong a kikhamcip ahih lianloh hangin kizangsaklo hizaw hi. Tua zaha mivomte a kideidanna leh a kiukcipna gam ah Nelson Mandella hong khangkhia hi.

Leitung zong hong kilumlet zel in mihing pilna hong khang semsem a, mivomte zong hong pil deuhdeuhta uh hi. Khua hong mu zaw deuh in thu hong theizaw deuh uh a, mikangte in deidan uh hi cih hong theisiamta uh hi. A theih uh hangin haizaw lai phot uh ahih manin a cih theihna ding uh om tuanlo hi. Pilna tawh mivomte hong kipattah a thu paizia a theih vua, khantohna a theih kei uh leh mikangte ukcipna leh sila bawlna pan suakta lo ding uh hi cih hong tel semsem uh hi. Tua suahtakna dingin kipawlna ANC a om ahi hi.

1942 kum in Lawyer suak in mivom Law Firm masa pen phuan pah hi.Lawyer ahih mah bangin ANC kipawlna thapia ding leh a nasep uh hoihsa in Mandela in zong zom a, makai zong suakto hi. Tua banga minam kideidanna (apartheid) pen 1948 kum a National Party kicite in kumpi a sep pan nasia diak a, tua hun mah panin ANC in zong nakpi takin do in nang uh hi. 1952 kumin ANC Deputy Presidents sem a, damdam in minam kideidanna hong hat tektek ciangin amau zong mivom minam hutna leh laptoh nasep hong hahkat semsem uh hi. Gamsungah minam kitotna piangsak cih tawh mawhna kibawlsak in thudotna nangawn tuak mah leh kigensiang thei zel phot hi.

1960 March kha in mivom mikang kideidan ding hilo cih a deih pawlte mivom 69 Sharpeville khuapi sungah police te in kaplum uh ahih manin tua bang lungphona nei kipawlna ANC pen kumpi in khakcip in a kipawl a omlai leh mat dingin thupia uh hi. Tua hun lian panin Mandela te pawl in ANC pen thu bek a nasem kipawlna bek hi nawnlo in a kul banga ‘thatang’ tawh zong nasepna ding kipawlna military wing ‘Umkhanto we Sizwe’ (The Spear of the Nation, Gam hutna ding Teipi) cih min pua thau tawi pawl phuan zawsop uh hi. Thu bek hinawnlo, thagum leh thautang tawh zong do ding, kipan ding cihna ahi hi. Tua thau tawi kipawlna ah amah a lianpen (a bu) in koih uh a gam pua ah zinkhia in galkap kisinna va nei in ANC huh ding mi zong va zong hi.

Gamdang pan galkap vai a sin khit dikdek ciangin hong ciah a, kiman pah in kum 5 khumcip dingin kiman hi. 1963 ciangin amah leh a lawmte ‘kumpi langpang’ ‘kumpi thallot sawm’ ciin thudotna kinei a, a kum kik ciangin khantawn thongkia dingin kikhumcip hi. Pretoria ah kikhumcip phot in tua pan Robben Island kici na mun tuikulh ah kisuan leuleu hi. A kikhumcip sungin ‘mivom leh mikang kideidanna a beisak nuam galhangpa’ ciin minphatna kipia a, a minthang semsem in leitungbup kizel suak hi. Kum 27 sung vilvel a kikhumcip khit, ama kum 71 a phak kum 1990 in leitungbup in khah dingin a deihna uh South Africa kumpi in nang zo nawnlo in hong khahkhia uh a, ANC zong kipawlna khat in sang kik uh hi. Kum khat zawh ciangin Mandela mahmah ANC President in kikoihto kik pah hi. 1993 kum in amah a khahkhiapa FW de Klerk tawh anih un Nobel Peace Prize kipia a, 1994 kum ciangin South Africa gambup kitelna ah President ngah in mivom President sem masa penpen a suak hi. Tua kuma kitelna ah mivomte in kitelna ah suakta taka a kihel uh a khatveina hi a, leitung thupiangah mivom leh mikang kideidanna a beina lim ahi hi.

Kum 80 a phak kum in a zi 3na Graca Machel tawh kiteng a, a sih dongin kiteng suak uh hi. A zi masa pen tawh Evelyn Mase tawh 1944-1957 sung kiteng in ta 4 nei uh hi. A kikhen khit uh ciangin a zi nihna Winnie Madikizela tawh 1958-1996 dong kiteng leuleu in ta nih nei uh hi. A zi thumna a neih hangin a zi nihna mah tawh ki itzaw in a sihni dongin a zi nihna mah tawh kimu den, kikhawl den, kipawl thei den uh hi. A zi nihna Winnie pen Mandela kum 27 sung a kikhumcip sungin zong ama tangin a pang, a sem leh a makai hi in a pasal dinmun ah a ding den nu ahi hi. A pasal kikhumcip sungin pasal dang tawh muanmawhna tuamtuam leh a khut ah sisan bang cih tawh kingawh minsia ahih manin a pasal hong suahtak ciangin damdamin a kikhen bawl uh ahi hi.

1997 kum in ANC President a sepna pan tawp a, 1999 kum in S Africa President a sepna pan hunbit khat bek sem in tawp leuleu a, 2004 kumin mipi lak ah hun zang nawnlo dingin tawlnga leuleu in ama innkuanpihteng leh lawm leh gual tawh a hun nunung lam a zang ahi hi. Mizawng genthei leh huh huai panpih huaite tawsawnna dingin a phuh Mandela Foundation adingin a hun awngte zang den veve hi. England kumpi in amah pahtawina in October 29, 2007 in London a Parliament Square kici khuapi laizang ah Mandela lim kibawl phut uh hi. 2010 FIFA Football World Cup ah zong a tawp ni in mipi mai ah hong kilanga tua pen mipi muh a hong kilat a tawpna suakta hi! Amah lim tuang sum 2012 kum panin kizang a, amah pahtawina tampi lakah a kiciamteh diak khat ahi hi.

December 5, 2013 ni in kum 95 pha in si a, a pianna khua leh a minamte kiang Qunu khua ah December 15, 2013 niin thupi takin kivui hi. Amah phawkna hun kizatna ah gam 90 pan gam makai tingteng 90 val in uap a, leitungah gam makai tuazah a kikhop a tamvei hetlo lak ah amah pahtawina tua zah in kipia hi. Ama tangthu gelhna laibu “Long Walk To Freedom” hi. Nobel Peace Prize ban ah USA kumpi pahtawina Presidential Medal of Freedom, India kumpi pahtawina Bharat Ratna, Russia pahtawina Order of Lenin cihte zong kipia hi.

A thupina:Ama thupina penpen a kigen a thu bullet in – kimaisakna, kilemna, a kul leh kilem kikkikna neih ding ahi hi. Huatna leh hehna keploh ding, mite mawhna ciamtehsaklo ding, maisak ding, kilemna bawl ding cih ahi hi.

Thonginn pan a kikhah ni in amah a dawn lamdunga mite lak ah mikang nupi khat mu a a khut zan in khut kilen uh hi. Mivomte muhna ah ‘i galte tawh kikhutlet hi’ cih ngaihsutna om hi. Ei hong bawlsia a hong simmawhte tawh kikhutlet tazen ciin mawhsak nopna leh hehna thangpaihna teng satsuah kik phial uh hi. Tua bek hilo, mikangte kimawlna diak Rugby team Springboks kicite kimawl puan silh in va en a, letsong hawmna zong va nei hi. Mivomte muhna ah ‘na’ mahmah, ‘mitsiip’ mahmah hih tuak hi. Ahi zongin aman bang gen hiam cih leh kilemna, kimaisakna a om kei leh mai kinawt theilo hi ci hi. Mawhna kiciamteh kawmkawm a kalsuanna ah mainawt hamsa hi, ci hi.

Gandhi in zong amah Meileng tung pan a sawnkhia mikangte, India suahtakna dingin a sep laiin a khumcip mikangte mah mudah in hehlo a, a gualzawh ciangin zong amah a bawlsiate tungah thukkiknopna lungsim peuhmah neilo in lungsim siangtho tak tawh kikholhpih, hopihzaw hi. Tua banga itna leh ngaihna tawh amah a gal bawlte a kholhpih ciangin gualzawhna taktak a nei uh ahi hi. Tua ahih manin Mandela pen Gandhi bang lungsim neipa (true Gandhian) acih uh ahi hi.

I Topa Zeisu in, “Na galte it in,” a cih pen leitung mi thupite in na tel mahmah uh ahi hi.

Leitungah kilemna a omna ding, minam tuamtuam kideidanna a omlohna ding leh mipi deihna banga kumpi vaihawmna a om theih nadinga nasem Mandela zaha mi thupi leitung in kisam den a, tua bang mihing khat sihna hangin leitung tagah zo ahih manin a pammaih mahmah ahi hi.

Hau Za Cin
Phuitong Liim
www.hauzacin.blogspot.com