Naypyitaw paina ~ Pu Thangboi

Naypyitaw paina! ~ Pu Thangboi

Kawlgambup ukna khuapi Naypyitaw ah tulaitak Zomi 200 val om in a inn in inn 60 val om hi. A tamzaw kumpi nasem ahi hi. Department tuamtuam pan in ulian tuamtuam zong om hi. Tua lak ah deputy minister 1 leh deputy director general 3 bang om hi. Gambup MP Zomi Tedim kampau 5 om hi. October 21 ni ciang in Khuado Pawi nasia takin bawl ding uh hi.

Zomi MP te’ kikhopna ahi “Naypyitaw Christian Church ah August 20 ni (Sunday) ah hunzang ding in hong pai in”, ci’n MP Pu Gin Kam Lian in hong sap ciang in lawptak in kithawi pah in 19 ni nitak nai 1:00 pm in Zangkong pan JJ Express tawh ka paito pah hi. MP Pu Kham Khan Thang amah kia om ahih man in ama’ inn ah ka tungpah hi. Inn tung dan mah in ka ki ngaihsun lel a nuam kasa mahmah hi.

Nipi ni NCC pawlpi ah hun nuamtak kazang thei uh hi. MP a om thei teng zong hong kikhawm uh hi. Pawlpi Pastor pa pen Sia Ling Thang hi a thusiam mahmah hi. Zopau kawlpau zong siam mahmah hi. A pawlpi mite zong Pasian’ thu lawp thei mahmah uh a minam kim phial kikhawm hi. Vice President pu zong kikhawm theizel mah leh kei’ thugen ni kikhawm khalo citciat ahih man in sumh mahmah hi. (hehehe)

21 ni (Monday) ciah kik ziau ding kacih kimlai MP Pi Cing Ngaih Mang in “Nong phak buang in Hluttaw hong hawh sam aw, zing sang teh hong zawn ning” hong cih ciang in “Hluttaw etkhit nitak lam khawng teh ki ciah phei leh hilel mah ei” ci’n ka ngaihsun pah hi. 21 ni zingsang thawhdan hong nuam pian hi. Hluttaw sung ka khe mahmah tawh sik ding kahih man in ka lawpsim khinkhian peuhmah hi.

Tua ni zingsang Pu Cin Sian’ kiang ka hawh leh “Nitak an nekhawm ni” ci laimawk ahih man in ka lawp semsem hi. Pu Cin Sian tawh an nekkhop ding pen Sen gam gospel kapai khat a Kachin suangbawl khat in meh nam 100 phialding a omna ansaipi ah hong paipih lai sang zong ka lawpzaw lai hi.

Zingsang nai 9:00 pawl in Pi Cing Ngaih Mang te nupa in a mawtaw uh tawh hong zawn phei uh a Hluttaw lam zuan in ka taiphei pah uh hi. A kelkong (gate) ka tun uh ciang un Pi Cing Ngaih Mang in a khutme 2 alah leh lenglate’ lut theihna card 2 hong kipia pah lian hi. Tua tawh Hluttaw sung bup alutthei ka hi ziau a parliament session om laitak na ngawn ka lut kha hi. Angeina hi leh laitawh bangtawh ngenkhol leng bek session (hluttaw kikhop laitak) sung ah aki lutthei ahi hi. Tu’n bel Pi Cing Ngaih Mang in akhutme nih alah ziau tawh alutthei kahi hi.

Hluttaw innte bel gol mahmah hoih mahmah ban ah sang thei lua mahmah ahih man in ki neusuah kaukau a kisuan phial mawk in om hi. Zingsang nai 10;00 a kipan ding ahih man in “Hun om lai niangtui dawn ni ei” hong cih uh ciang in kaheh hong suak hetlo hi. Ahmyothar Hluttaw sung ahih man in Ahmyothar Hluttaw MP ahi Pu Gin Kam Lian, Pi Cing Ngaih Mang leh Pu Cin Khan Pau te tawh niangtui ka dawn khawm uh a ciamnuih peuh gen in kanui lingling uh hi. Ka lungsim ah “Hih mun mawk pen US te’ Senator te leh India te’ Raja Sabha te’ thu kikupna mun dan himawk a Zomite hih bang a tektang thei ding a hong siam Topa hoih na lawmlawm siteh maw” kaci hi.

Kipat madeuh in ka lut uh a man khawng ka kizaih khit uh teh ka tutna ding teng uh ka zuan uh hi. Nai 10:00 sat ciang in “Speaker pu hong pai ta ding hi” cin hong kigen ciang in ki dingto ngeingai a singtawn pua khat i nung ah Speaker pa hong pai phei hi. Speaker pa in a mun ding atun ciang in “Mingalarbar” acih leh vekpi a “Mingalarbar” kici ngeingai a tua khit teh “Tuthei ta uh cei” ci ahih man in ki tu ngeingai hi.

Tua ciang in “akhuan ngen kua teng ?” Ci’n adot leh khat dingto lian in akhuan ngen khempeuh i akhuan ngetna ahang teng simto daudau hi. Speaker pa in lai honkhat sim daudau pah a aman khit teh “Hih akhuan ngetna uh na thukim uh hia?” ci’n thum vei dongh hi. “Thukim mah” ci’n kidawng tek a kei bang ka nak awt mahmah dep hi.

Tua khit ciang in dotna/dawnna hun ong kipan to pah hi. Chin state constituency no. 10 (Matupi) pan Pu Lal Ming Thang in “2013 – 2014 leh 2014 – 2015 budgetary year te ah Matupi khuapi uk sung Point 8961 ah GSM Tower lam ding cih planning om napi tuni dong ki lam nailo pen lam ding thu om ahiam omlo ahiam?” ci’n dongh hi. Ministry of Transport and Communication pan Deputy Minister U Kyaw Myo in tua dotna adawnna atawpna ah “Hih point 8961 ah tower khuampi lam ding vai frame tawh akituah a operator te i Universal Service Fund akingah leh kilam ding hi” ci hi.

Tua khit ciang in “Kitel pah lel ei !” ci’n Pi Cing Ngaih Mang’ pasal Pu Hong Mang tawh ka pusuak uh hi. Ei mipite leh MP te’ kikal ah hih Hluttaw vai tawh kisai ih theih dan leh ih muh dan ki lamdang mahmah ahih lam tutung ka Naypyitaw paina pan in ka telmuh mahmah hi.

Ei mipi te’n Hluttaw tawh kisai ih ngaihsutna;

“Hluttaw cih mawk pen gambup thu ki vaihawmna aih teh ih DC vai Ih 914 vai ih meivai tuivaite a kipan vai thupite hih mun ah ih MP te’n hong gen ziahziah ding uh hi. Hih lai ah gen lo akoi ah vagen mawk ding? Ki meltheih vai khawng tawh gam kivaan zo mawk ding maw ?” … etc., etc.,

MP te’ muhna:

Hluttaw cih pong mawk hang mi’ a te tawh kibang lo. Speaker powerful mahmah. Ama’ thu lo tawh bangmah kigen thei kisemthei lo. Thukhat dotna aizong thusunna aizong kuppihna aizong ih neih nop leh laitawh ngetkholh kul. Amau’ deihna tawh akituah leh bek gen khuan hong pia uh. Thu dongdong te mudah lai uh. Rakhine te’ dot ahih nak leh nial hamtang uh. Yanghee Lee (Special Rapporteur on the situation of human rights in Myanmar) pen Hluttaw pan mawhsakna sangpen kipaih napi Kachin mi Aung La N San in middle weigh ah World Champion angah teh lungdam pihna kammal khat beek ging lo. Ngaihsuthuai hi.

Tuateh ei Chin state pen ki hazatna tam mahmah. Vai thupi khat va genkha in mi theisak leng hong khaktan nuam adil a om den. Tua hi in hong pia ding te’ kiang direct a valut a ngetpen muibun pen hi. Gentehna in Nakzang lei, Tonzang sangpi, Tedim sangpi te khawng ki meltheihna tawh aki ngen ziau hi. Hluttaw tawn sak leng hong ki haza ding in buaihuai mahmah lel ding hi. Pi Cing Ngaih Mang’ hong genna ah “En taktak le uh cin Pu Van Thio’ pianna Khalkha – Than Tlang, Pu Lian Luai pianna Falam leh Tonzang a budget akiate na ki tamkhaih hetlo ding hi”.

Ci uh hi – 21 ni nitak an Pu Cin Sian Thang te innkuan tawh nekhawm kha ka hih man in ka lungdam mahmah hi. Ka theih nop mahmah thu pawlkhat hong gen lai ahih man in katha lawptuam mahmah hi. A laite file tanghtangh a “Nidang teh khangsawnte a munuam khawng om khaleh cihna hi e” ci hi. Nidang sang in na damzaw ahih man in lungdam huai mahmah hi. Sawtpi hong dampih ding lunggulh mahmah hang.

22 ni kaciah ding ciang in Pu Gin Kam Lian te innkuan in mawtaw nuam mahmah hong vaihawm sak uh a Pu Kham Khan Thang in zong lovegift tampi hongpia hi. An hong nekpih a lovegift tawh hong ciahsak NCC pawlpi, thu um mite leh Sia David Dongh tung ah lungdam mahmah ing.

Ka ciahlam mawtaw tung ah video ettheihna leh la ngaihtheihna khawng na om ahih man in mikangla acihte sung ka et leh Classical Music acih na om nong ahih man in kangai pah hi. Aminthang mahmah ahi Symphony No. 40 in G Minor, Marriage of Figaro, The Four Seasons cihte khawng na om ahih man in zaknop kasa mahmah hi. Zaknop salua in ka ihmut dektak laitak in 1741 kum a German te Goerge Frideric Handel i phuah leitung beidong akideih ding ahi “Hallelujah Chorus” hong pai mawk ciang in thangah lua in ka dingto kha dektak hi. Ka gim ka tawlna khempeuh dam pah hiau hi. Lai nong simsak lungdam mahmah hi. Note’ itna sung ah, Mung Laan Thang (Zangkong)