Na Computer ading akimawk ngah Ubuntu OS

Na Computer ading akimawk ngah Ubuntu OS

Ubuntu pen Linux Distribution te lakah aminthang mahmah Linux Operating System khat ahihi. Nunglam deuhin theihna bangmah omhetkei taleh kicingtaak hetlo pipi mahin “Linux acih atomin banghiam?” cih atomin ih kikum khin zohi. Tu in tua Linux zattheih nading onghawmkhia ahi Ubuntu Operating System khat ihki hawmsawnnuam leuleu hi.

Ubuntu OS pen Canonical Ltd. te neihsa hi a, hih company te hawmkhiat lakah aminthang mahmah Software khat ahihi. Amasa penpen Initial Release pen October 20, 2004 pan kipan ahihi. Ubuntu cih minpen Southern African Philosophy Ubuntu aki tamsak ahihi. Akhiatna Manglai-in “humanity towards others” kici a, mipi tungah nahoih sepna cihtheih ahihi. Ubuntu pen adangdang ahzong akizat hangin Desktop ah zatdingin ngimna hipipen zaw a, leitungbup ah Ubuntu azang mi 12 Million bang omdingin ki ummawh hi. Amawkna ngiatin akingah ahi Ubuntu OS na download nopleh hih http://www.ubuntu.com panin deihzahzah ki download theiden hi.

Ubuntun OS pen Open Source Software ahih mahbangin a Package sungahzong adang Open Source pawlkhat Default in kihel pahhi. Tualak ah adiakdiakin internet zatnading Firefox, laibawl nading OpenOffice, lim leh maan tepawl pawlphat nading GIMP cihbang aomsa hipah hi. Tuabanah kimawltheih nading Game ahi Sudoku, Chess cihtezong om hi. Tuabanah Ubuntu Software Center zangin adang amawkna in akingah Software tampi ki Install beh theihi. Hih Ubuntu pen na Windows Operation System ahzong Live CD ahih keileh USB tawhzong kizangkhawm theihi. Tuabanah Windows OS leh Ubuntu OS anihin Dual Boot in kizangkhawm theihi.

Hih website What Is Linux? tungtawnin amingthang leh azatnop acihlakah Ubuntu zong kihel hi. Tuabanah Debian (Debian Project), Fedora (sponsored by Red Hat), openSUSE (sponsored by Novell), Mandriva (French Linux Distribution), Caixa Mágica (Portuguese Linux Distribution) cihtezong aminthang leh akizang mahmah vive ahihi. Tuaban ah adang Linux Distributors tampi omlai hi. Zomi Daily