“Na nu en in!” – “Behold your mother” (John 19:27)
Hih Thului pen Siapi Suang Za Nang gelh hi a, amah pen Seven Day Advantist (SDA) ah bultak a panmun nei mi khat ahihi. Hunkhat lai in, Singunau Sangpi ah Sang Siapi sem ngei a, tu in Yangon ah tengin Kawlgambup SDA pawlpi ah Innteek mahmah khat ahihi. Tunnu’ Ni tawh kisai, ama’ laigelh hoihsa kahih manin, hongkhak sawn ing. Na khat peuhpeuh ah ahoihna mun la in, akisap lohna mun paisan a kalsuan pen mipil leh nampi lungsim puakzia ahihi. Na simtek un! Dal Sian Hung
DAILY MANNA (#010) 10 May 2014 Mother’s Day – Nu’ Ni LST Bulphuh: “Na nu en in!” – “Behold your mother” (John 19:27).
2014 kum ‘Nu’ Ni – Mother’s Day’ pen Sunday, 11 May tawh kituak hi. Adventists tading 10 May 2014 (Sabbath) ni in “Nu’ Ni” kibawl hi. Tukum pen USA gambup Nu’ Ni kibawl kum 100 cinh-kum ahi hi.
England gam ah Nute pahtawina in Mothering Sunday ci in bawl uh hi. Yugoslavs le gam tuamtuam te’n zong Nu pahtawi ni na nei tek uh hi.
USA ah Julia Ward Howe in 2 June 1872 ni’n Nu’ Ni bawl masa in ‘Kilemna – Peace’ khanto nang hansuahna in zangh a, Boston ah kum tampi mah Nu’ Ni bawl hi. Kentucky pan Sangsianu Mary Towles Sasseen in 1887 kumin Nu’ Ni na bawl hi. Indiana, South Bend pan Frank E Hering in 1904 kum in Nu’ Ni ading mihon hansuahna campaign nei hi.
Kum khit ciangin USA gambup ah 10 May 1908 ni’n Philidelphia pan Anna Jarvis in a nu Mrs. Anna Reeves Jarvis pahtawi kawm in Nu’ Ni bawl ding hanciam a, kumsimin May kha Sunday nihna pen Nu’ Ni cih ding khensat hi. 1912 ciangin Methodist Pawlpi in Nu’ Ni piangsakciil Anna Jarvis ci in ciamteh hi. 8 May 1914 ni’n USA bup ah Nu’ Ni kikip sak hi.
Na Ta En In!
1. AD 31, Abib kha 14ni Paisan Pawi ahi hi. Tu hun in Good Friday kici a, ii TOPA Jesu van le lei kikalah amulkimhuai pen sihna tawh si ding in migilote nih kikal singlamteh tungah kikhai hi. mothersday
2. Singlamteh nuai ah ii TOPA Jesu a it Anu Mary, Anu sanggam Clopas zi Mary, Mary Magdalene le A-itpa John a om uh hi (Jn 19:25,26).
3. Apa Joseph si khin a, Mary in akem ding taziik nei tuak lo hi. Asanggam Joseph ta masate ahih leh tualaitak in Jesu um nai lo uh hi (Mt 12:46).
4. Jesu a thudon lo sanggamte’n Anu thudon loding ci in ii TOPA Jesu in na lung-himawh hi (Jn 7:3-5).
5. TOPA Jesu in, “Numei aw, na ta en in” ci hi (Jn 19:26).
6. Lungkham ke’n ka nu aw, ka it pa, na tapa John om lai buang hi ci in vaikhak ahi hi. John pen nungzui dangte le asanggam Joseph tate sangin a muanzawk ahi hi.
Na Nu En In!
- 1. TOPA Jesu in John kiangah “Na nu en in!” ci hi.
- 2. Tua hun akipan John in a nu (Mary) ciahpih in khoi in kem hi (Jn 19:27).
- 3. John in Patmos tuikulh thongkiatna pan aciah ciang zong Ephesus ah teng in a nu Mary khoi in kem hi.
- 4. Ih TOPA Jesu in a nuntakna a bei ma in Anu ading lunghimawh in na vaihawm sak hi.
- 5. Eite zong ii nu ciat ii lung himawh hiam? Nu’ Ni in a thak khat vei ii Nute phawk kik ni!
Comment piaknop aomleh...