Itna aa ding Telephone ~ Peter Suumpi
Tua cina ward katun aa kipan kamai uh aa lupna aa cina te nupa akitawng khualkhual uh ka mu hi. Azi in “ciah ni”, apasal in “omlai ni”.
Siahuanno nu hong genna ah tua nu akhuak sung ah sabawk om in cancer suak thei hi ci hi. Cancer asuak ding % tampi om hi ci hi.
Tua nupa te luilui uh ka muh ciangin khuano khat aa innkuam khat lim ka mitkha ah damdam in hong suak hi. Anu uh pen kum 46 hi in naupang nih nei in atanu pen ningkum in tan 10 zo in atapa pen tan 7 kah laitak hi. Acar 12 apha logam khat nei in vok 6 le bawng khat khawi uhi. Hi pen amau innkuan ii neih teng ahihi.
Zato mai ah PCO phone om hi. Ko omna tawh kigamla lo hi. Handphone te hong tam ahihman in tua phone te kitam zat nawnlo hi. Nitak sim in tua cina nu’ lawmpa in tua phone tawh akhua aa a inn uh ahopih thei zel hi.
Tua pa phone kiho pen ngaih takin pau in kiza buabua hi. Ka khan kong uh ka khak uh hang kiza veve lai hi.
Phone akiho sim in atapa kiang ah bawng ann napia nai na? Vok ann napia nai na? Ih huang sung teng hoihtak na khak na? Zingciang sangkah ding nahihciang zan lumhak lua ken maw ci in dong zel vaikhak zel hi. Atawpna ah agen theih thapaih kammal khat in “Na nu zong natna lamdang pi hi kei ni 3, 4 khit khawng ciang hong ciah nung” cih tawh aphone khia hi.
Zato atun zawh uh ni 4 ni ciang tua cina nu alu at ding in siahuanten khensat uhi. A ki-atding ni azingsang in tua cina nu’ lupna mai ah pasal khat le numei khat hong tung hi. Ka muh dan in cina nu’ upa le anau nu tawh kibang hi. Tua numei nu in cina nu khut alet hangin cina nu mitte in apasal lam bekmah nga hi.
Khuaphawk lohza akisut dektak ciang tua cina nu in apasal khut ban len in “ azenzen in ki-atna lupna tung pan kong tuak kik zawh nawn kei zenzen leh kaluang inn nung aa gamlak ah hong phum lel in maw. Adang bang mah sumbei kullo aimaw. Tua aa kapau hong mang tapeuh in maw.”ci in a awling kawm in apasal vaikhak hi. Akhitui te abiang ah luangsuk dandan hi.
“Aw… hi aa ding patau kei o” ci in apasal in dawng kik hi.
Tui tawh akibang akang zatui pawl khat cina nu thagui sung ah hong lutciang in cina nu’ mitkhute hong nem diai hi. Apasal maisa ahihleh hong puam bau hi.
Zato nasemte in cina nu ki-atna khan lam ah asawn uhi. Apasal le agei aa nihten zong zui uhi. Apasal ahileh tuzel dingzel in lupna tung atut kawm in akhut lomzial in atumzel hi.
“U Pau … Lamnu ki-at bangmah cisam ken teh mateh” ci in azi upa mai sal gige in adong hi. Amaitang ahileh cihna ding atheilo naupang maitang tawh kibang hi.
“Siahuan pa’n bang mah ciken teh hong cih leh bang mah ciken cia… lungnuam lel o” ci in asung pan hehnem hi.
Munites 20 khawng khit ciang apasal innpua lam pusuak khia hi. Adendeuh mah ciang asungpa in vakai kik zel hi. Tua bang in ding khia zel kisam kikzel in 5 vei 6 vei bang khit ciang zato nasemten hong sawn ngeingai in cina nu a lupna hong tung kik hi.
Azi lu bandage kang tawh kivial hi. Amai kang deekdaak hi. Amit si dildul hi. A ihmusip tawh kibang hi.
Cina nu hoihtak alupna ah asial khit uh ciang apasal innpua lam pusuak khia hi. Aden deuh ciang akhut ah van thoh khat hong tawi in hong tumkik hi. Nidang hileh moh le niangtui le buhcim zantak an aa amang hinapi tuni ciang saphelh le buhsih tampi hong tawi hi.
Azi ii sanggam tegel kiang ah tampi ne un ci in aman zong tawm khat ne hi.
Tua nitak amangngilh aihtam. Aihkeh thudang khat peuhpeuh hang aihtam a inn uh phone holo hi.
Tua nitak zato sung teng meiki tangsak lela hi. Zan kim laitak in kapai leh apasal pen azi lupna khekhuan ah tu in suang milim bangin tangvetlo in azi maitang en gige ka mu hi.
Azing sun ciang azi in khua hong phawk hi. Apau theih nailoh hangin apasal mah nuihsan in en ngiungeu hi. Apasal ahileh lungdam luakisa in akhutte gel azut saksak hi. Tua pan zato pua ah vatai khia in muamkhum valei in saivuante tawlngakna khan le Nurse te tawlngakna khante ah vapia phei in tua ban ah ko agei aa om cina teng zong hong hawmsak hi.
Cina nu ahileh bel etdan in hoih peuhmah hi. Oxygen piak akhawl ni ciang inn ciah ding cih pen alawp pen thu hong suak hi. Apasal in azi pen naupang noh bangin nono keei hi. Amuh ngeih azak ngei alamdang thu tampi azi agen hi.
Na khempeuh angeibang in hong hikik hi. Nitak ciang in apasal in a inn uh phone hopih kik ta hi. Ata zong avaikhak ngei teng mah vaikha zel hi. A awng lah angaih ngei bangin ngaih lualua hi. Agen sateng genden keei aih ciang aa a inn phone ho leh apau ding teng bang ka thei khin gai zezen hi.
Nikhat kisilna khan pan kapusuak le apasal phone gei ah ka mu leuleu hi. A aw-ngaihpi tawh “ih bawngpi nikhat an khat veibek napia o. Phalbi hi in nakisem saklo aih ciang aa agil avahlohang phamawk kei in. Ih vokte bel an hoihtak napia un maw. Tuk hong tammeng meng leh zuak phat mengmeng ding. Na nu zong hong noptuam hanhan ei. Siavuan pan ni 3, 4 khit ciang zato tuak theita ding hong ci ei.” ci in agen hi.
Apasal in agennop teng agen hi. Kei zong mit phialoin ka en hi. Ka et kawm in alamdang khat kamu hi. Aphone khau akizoploh lam.
Phone akhiat khit ciang in a en gige kei hong mu hi. Aphone ka kawk ciangin aman zong aphone khau akizop lohlam athei pan tawh kibang hi.
“Shiii…” hong ci in akhutme amuk ah akoih in dai in hong cihna hi ci in ka telpah hi. “Pa Pum tutung inn aa vok le bawng te aading lung himawh nawnlo maw?” ci in damdam in ka dong khian hi.
“Ki at nading in atung pek aa kazuaksa hi” ci in aw niamtawh hong gen ciang in kei zong cina nu ka kawk phei kha hi.
Tua pan nakhempeuh katel pah hi. Tua pa phone ho pen a inn aa te ahopih ahikei hi. Lupna tung aa a it mahmah azi a “Hopihna” phone na hizaw hi. Ka lungtang hong kisak sak zo hi. Ama aa ding, azi aading le amau ki-itna in ka lungtang hong kiling sak hi.
Leitung mihingte sung ah hibang aa itna kilahnate aom laimah hi mawk hiam? Romantic dan in lingpaakte, leitung beidong akip paisuak ding cih kam kiciamnate a om sam hang, amau gel ki itna ahileh nite damdam in hong cing ciang hong kikhol in anopci a enhuai a ompai suak ding “Itna” mualsuangte aphut uh ahihi.
Hibang aa ki itna te nitam tektek ciik tektek in khat le khat ki – it semsem in simleitung ah ahoihpen a etlawm pen le anamtui pen paak bang in itna paakte pak khiasak uhi. Hih bang itna paakte pen alamdanglo ahihang in mi khempeuh ii aguhngek sung dong ah anamtuina kiza zo hi. Peter Suumpi/ Laigelh: Zhu Sha ii gelh Nine Nine Sanay gelh akituak dan in ka let kik hi.
Comment piaknop aomleh...