Naupang le Huutza ~ Hau Lun

Naupang le Huutza ~ Hau Lun

(1) Huut acih bang hiam?

• Mihing gilpi sungah a nungta thei lungno namkhat hi.
• Huut nam tampi om hi.
• A melpuak zong a pum, a pek cih bangin ki lamdang hi.
• Ganhing te ek thakna leitang ah om thei hi.Tua leitang ah a ki suan mehteh mehgahte tung ah zong baang thei hi.
• Tua lungnote naupangte gilsungah hong lut leh naupangte ngah ding sadat, sikdat le Vitamin tuamtuam te na neksak ahih man in
• Naupang a khan zah ding khang lohna
• Sik-dat (သံဓာတ္) tawm ngah ahih manin khuakpil lohna
• Ankam limlohna
• Gim baihna
• Gilnat pahpahna
• Sungpai pahpahna
• Zan ciang taw-vang kiim zekna
• Zan ihmut cimlohna cih bang noplohna tuamtuam piangsak hi.

(2) Huut te naupang gilpi sungah bangci lut hiam?

• Ekthak khit ciang khut sil sianglo pi-in naupangte an piakna pan
• Mehteh mehgah te limtak sil sianglo, huanlo-in piakna pan
• Sa huan napi alim minlo piakna pan
• Naupangte leivui lak ah a ki mawlna pan huut nam tuamtuam kamsung pan in gilpi ah lut thei hi.

(3) Gilpi sunga huut te bangci that ding?

Kha (6) in khat vei ta huutza nek ding ki sam hi. Khat vei bek nekna pen ki cinglo hi. Gilpi sunga a omlai huut te tampi hong khang kik thei hi.

Albendazole ki ci huutza in huut nam tampi thatzo hi. Naupang pumpi gikna 10kg nuaisiah naupangte 200mg (tanglang) pia in. 10kg tungsiah naupang te 400mg(tang khat) ki pia thei hi.

(4) Huutza na piak ciang theih ding pawlkhat

• An tawh ki gamla sak ding, lupding ciang pia ding
• Tui tampi dawnsak ding
• Lukham sang khamsak ding

(Huutza le gilpi sunga huut te aki muh ciangin huut te om theilo-in a pusuah nading zong uh hi. Huihdikna lampi ah kahto in huih lampi khak kha le nak hak sa-in Nu le Pa te-in theipak kei le sihna na ngawn piangthei hi.)

(5) Huut hong lut loh nadingin bangci dal ding?

1. Satpiang tawh khut limtak sil ding. Tui buak khia pah lo in a tawmpen second (20) sung khut nuai ding. Tua khit ciang tui buak siang ding. A diak in, nau ek siak sak khit sim, ekthak khit sim le nek le dawn bawlma in khut sil hamtang ding.

2. Naupangte leivui tawh aki mawl khit sim in a khut limtak silsak in. A khut cin a tom in tansak in. A khut tawp sak kei in. Pumpi siangthona hanciam pih in.

3. Ekbuk siangtho tak in koih den in.

4. Meh teh mehgah a hingin na piak dingte limtak sawpsiang in. Sa le nga te mintak in huan in.

5. Innkuan sungah, khat in huut a vei pahpah le innkuan bup in huutza nek ding ki sam hi.

Deihsakna tawh, Hau Lun Lam-etna (Ref: Child Health Myanmar Page)