Sungtawng pan kikhel ding kisam masa ~ Pau Khat Suan

Sungtawng pan kikhel ding kisam masa ~ Pau Khat Suan

Khatvei, Mikang gam a tung Zomi naupang no khat sang pan ong ciah ciang a lawmte khat ong tonpih a, a nu’ kiang ah “nu, ka lawm ong hawh nuam, kong ciahpih thei dia?”.. ci-in a nu dong masa hi. A nu in zong “na lawm mivom maw?…mikang?” ci-in dong sese hi. A tapa in “nakhawl pak ou, va en ning”..ci-in, a lawmpa a vom, a kang en ding in lehtai vingveng hi.

Minam, a vom a kang, cihte tawh kideidanna, ki khenbawlna, ki-lungsimneihna cihte omlo, tuate tawh naupangte kipantah hetlo, tua lungsim tawh khangkhia hetlo uh … cih kilang mahmah hi.

England Parliament ah Syria gam gal kidona a Chemical galvan zatna, kua in bangzah zang cihthu leh a sukkhak siatna thute nakpi tak kinial in kikawk, kitawng ziahziah ngei uh hi. Amau’ gamsung England, Scotland, N. Ireland, Wales… cihte kikal hihzah in buaipih khollo uh hi.

Kawlgam ah bel minam lungsim lian mahmah lai a, majority Kawlte mahmah in athu ahang omlo pi in namdangte neu-et zawdeuh pong, Kawlte ahih leh tungtuang zawden ding, ukcip ding, buu sem ding, sia sem ding cih ngaihsutna ban ah namdangte’n mai-et tokaai ding lam-etna nei leh lunggulh miikmeek uh ahihman in minamte kikal a sungtawng taktak ah ki-it kilemna taktak om thei mahmah lo hi.

Gam ki-ukna nangawn ah minam khempeuh kikim a, amau le amau vaihawmna tawh a kipawlkhawm beelpawl gam “full fledge federal system” lamkhiat ding a khaktan pipen a tung a i gen Kawlte leh namdangte kikal a lungsim puakzia hang leh mihingte’ kiliatsak nopna, duhhop huaihamna hang hilel hi. Galkapte’ thuneih nop luat mahmahna zong hih lungsim hang hilel hi. Tuabang lungsim a bei mateng, a kilumlet mateng kuakua a mang a, a lal zong in thuhoih pen ( ideal ) dinmun tun ding haksa mahmah ding ahi hi.

Gambup vai genloh, kipawlna neupen, biakna pawlpi neupen nangawn ah tuabang a kideidanna lungsim tawh kimakaihna a om leh siatna in ong nungzuih pah hithit hilel hi.

More: Makai hoih in pilna thupi sa ~ Pau Khat Suan

Mi khempeuh, Minam khempeuh, kimakaihna leh vaihawmna khempeuh a sungtawng lungsim puakzia, thu ngaihsut zia a kipan kikhel masak ding kisam penpen hi. (Transformation from inside out). Tua hilo, a puatham kikhel lel tawh bel koi mah ah ki-khuasuak tuanlo ding, gual tungtuang gen loh mi’ kal zong kiban zo kipha zo ngeilo ding hi. Sungtawng pan a kikhelna i kisam hi. Pau Khat Suan