Khakhat aphapan naungekno zu kamkhat kitulhkha in sihlawh

Khakhat aphapan naungekno zu kamkhat kitulhkha in sihlawh

Naungekno khat ii asuahzawh khakhat cinpawi “Full month celebration” kibawl a, tua pawisung ah apu in naungekno pen zu kamkhat (tuibuuk muanzah dingkhawng) piakha ahih manin sihlawh cih kiza hi. Zu pen naungekno adingin lauhuai mahmah cih hih thuthang tungtawn in kimuthei hi.

Hih thupiang pen China, Beijing khuapi sungah kici a, Sin Chew Daily thuthang te pulakna ah nungkalsung thupiang ci uhhi. China gamsung ah naungekno asuahzawh khakhat acin ciangin pawilianpi bawlthei uh a, tualai ah meltheih tanau te alungdampih dingin kikaikhawm zihziahthei uhhi.

Tuabangin naungekno suahzawh khakhat cinpawi akibawlna ah naungekno ii apu (apa ii apa) in naungekno tawikawm in, akhut langkhat ah zuhai atawikhit ciangin “Toast” ci’n azuhai laamto in ameltheih tanau te tungah kipaktak in lungdamna tangko hi.

Tuabang in Toast abawl laitak in meltheih sungpanin khatpa in ciamnuihna in “naungek in adawn masakloh in, apu in zu dawntheilo dinghi” ci’n genkhia citciat hi.

Tuaciangin apu inzong zuhai sungpanin zu kamkhat dingkhawng atu kamsung ah tahsuk hi. Tua thupiang pen anu in atheih ciangin lunghimawh in patau mahmah hi. Amanlang in apu khutsung pan sutkhia in, ahi zongin tua zu kamkhat in naungek na susia khinta hi. Nailang khitkhawng ciangin tua naungek pen nakzo nawnlo cimawk hi. Amanlang in zato ah akipuak hangin, Doctor te’n tua naungek ii anuntakna honzo nawnlo uhhi.

Zato panin Doctors te’n naungek ii asihna pen limtak avelcian uhciangin zu ii agu lel in asi hi “Alcohol Poisoning” cimawk uhhi. “Naungek pen zu piakding hizenzenlo hi, banghang in mi ciamnuihna peuh umlawmlawm nahihiam” ci’n Doctors te’n apu kiangah taibawl uhhi.

Naungek ii anuzong alungtang kitamzan in khasialua mahmah a, ateekpa takpi zahtakzo nawnlo in apaang tamveipitak betsakgawp hi. Abeisa inzong kum 3 sungbang nau paaitheilo ahih manin, ateekte’n simmawhbawl mahmahngei uhhi. Naupaai in tapa khat aneih ciangin ateekte’n itbawlpan uhhhi. Ahi zongin tua naungek pen apu zupiak kamkhat tawh sihlawhta hi.

More: Malaysia, Klang Valley sungah zu atuh adawnkha mi 19 sikhin, tampi zato tung

“Department of Emergency Medicine, Los Angeles County & University of Southern California Medical Center” ah asem ahi Dr. Taylor McCormick in agenna ah naungek te’n uliante sangin zu gu lelbaihlua mahmah uhhi ci’n genkhia hi. Naungek te’n zugu alelh uhciangin nak hamsa sa, nakzolo, gamtang nawnlo, khuaphawklo, sibup cihbangin omthei cihi. Anak zawhloh uhciangin naungek ii akhuak sungah huihsiang “Oxygen” tungzo nawnlo in, akhuakzong siacipthei cihi.

Nupi naunawi apialai tezong zu dawnlohmah hoihpenpen ci uhhi. Zudawnthei nulepa te’n hih thupiang ngaihsun in, ki kepsiamding thupi mahmah hi. Sawltak #zomidaily