Vondeih Kep Ding – 157 (Pau Khan Kap)

Vondeih Kep Ding – 157 (Pau Khan Kap)

Tawngno, Tunung lawmte zui-in Hakha ka vapai lai ka giahna uh Hotel ah ka room zom uh a saap pa’n zankim dong mahmah Phone kiho in hong ku baba mawk in kua mah ihmu thei lo hi ung. Hotel cih hangin mundang a te bang lo-in sing vive tawh kilam hi. Naupangno lah hi nawn lo-a, bang ci dan hi zawzen ahi tam, ka ci simsim hi.

Hotel cih khit nungah ei inn dan hilo-in lup hun khit ah phone i kiho leh zong kua ma zak loh ding, a dam thei penpen in kiho ding hi hang. Mihonpi omna ah zong tua bangmah in phone ho ding hi hang. Khat peuh sam in ku vava cih bang, ahi kei leh nui baba cih bang zong hong etlawm het lo hi.

Lup khit ciangin phone hong kisap zenzen leh zong inn pua lam kihem in, tua pan phone sang pan leng i lawmte kua mah kiphawng nawn lo pah hi.

Innmai pazat ah lam khak in tu, lum, kiho, lasa cih bangin zong om huai lo hi. Hong kihawl khiat pah sam loh hangin kua mah na nuam het lo ding hi.

Innkhante ap kik ciang zong ahi thei zah in a hoih pen in koihsak kik huai hi. Ninbung bang liangin i nusia zongin amau bel na puah veve sam ding uh hi. Ahi zongin ei bang ci bang mi cih kithei in hong maizum huai ding hi.

Annekna mun ah mi a kigualh leh amau nungah kigual ding hi hang. Zekai in a mailum ut cih bang peuhmah ganhing lungsim tawh kibang sa mai ing!

Nang ngaihsutdan hong gen kik dih ve! Hong it, Na Pa