Nashville Khualzinna
Tukum January kha in Sia Tual Khan Suan (Suanpi) in Nashville pan nitak khat phone tawh hong hopih a, “Zomi Christian Church makaihna tawh cialpi khat bawl ding ka khensat uh hi. Nang thugen dingin kong lunggulh uh a, nong hi thei diang hiam,” hong cih ciangin, “Thungetna tawh phawk ni, hong hanciam ning,” ka ci hi. A thulu dingin Mawhmaisakna cih a lunggulhna thu uh zong hong genpah hi. Nashville khuapi sungah Zomi inn 40-50 kikal pha dingin ki-um mawh a, milip 250-300 khawng mah pha dingin kituat hi.
Pasian hehpihna tawh April 1, 2010 zingsang tungin taxi tawh Los Angeles International airport lamah ka tai vingveng a, amun ka tun ciangin vanlengtual lut ding mi na tam mahmah a, na kigual zihziah uh hi. Lungsim thungetna nei in, “Topa, tuni ka vanleng hong lapsak in,” ka ci hi. Topa’n hong dawngin, boarding ticket leh security check ka zawh ciangin hun them khat om lai ahih manin starbuck coffee ka lei hi. Ka leng khiatna ding gate nambat 40 ka tun ciangin ka thungetna lawhcing lua, “Na vanleng nai nih sung zekai ding hi,” hong kici hi!
Nashville khuapi ka khatvei paina ding ahih manin a khuapi thu pawlkhat ka sim khol hi. Hih khuapi pen country music khuapi ahih manin ‘Music City’ci-in kithei a, mihing million 1.5 bang teng dingin kituat hi. Music khuapi kicih mah bangin Nashville airport i tun ciangin Elvis Presley, Johnny Cash, Jimi Hendrix leh a dang lasa siamte lasak na ging ziahziah hi. Industry, health care management leh college leh university hoih 20 khawng a omna khuapi ahi hi. A khuapi min masa Nashborough hi a, America suahtakna ding hanciam galkap General Francis Nash min kitapsak hi. 1779-1780 kum khawngin zong hih khuapi music tawh a minnei hi khin zo hi. Tuni dongin hih khuapi airport ah country music lasa mun nih mun thum khawngah om den hi. 1784 kumin khuapi min dingin Nashville ci-in kikhek kik hi. Al Gore leh Oprah Winfrey te’ tenna khuapi Nashville, “the friendliest city,” ci in zong a kithei khat ahi hi.
Zomi Christian Church (ZCC) ah Chairman Pa Pau Za Gen in airport ah hong muak a, “Sia aw, sun ann leh nitak ann nekkhop mai dingin koi laiah na pai nuam hiam?” hong cih ciangin, “Sen sai-ah (Chinese Buffet)” ka cipah lian hi. Duh bangbang lak theihna ah lungkimtan ka nek zawh uh ciangin ka zintunna ding Pa Sian Khan Pau (Paupu) te inn ah hong kha hi. Tua nitakin ZCC makaite tawh kimukhawm in holimna in hun ka zang thei uh hi. A zing ciangin a khatvei kikhopna nitak nai 7 panin kipan a, ka upmawh sangin kikhawm hong tamzaw hi. Phatna leh Biakna hunuk khempeuh Sia Pau Khan Lian in thalawptakin hong makaih ziahziah hi. Zogam a khanlawhna late i omna gam khempeuhah kisa koikoi ahih manin gam dang khua dang tawh kibang loin tha kingah mahmah hi. Tua nitakin Piancil (Genesis) 3:1-21 sung siksanin thu ka gen hi. Adam leh Evua in Eden huan sungah Pasian khe khap ging a zak uh ciangin kibu uh hi. Pasian khe khap ging zak ding kisapna leh mawh a pukna hangin siatna hong tung a, tua siatna sung panin Pasian hong tatkhiat kikna thu ka gen hi.
April 3, 2010 nitak lam nai thum panin hun kizang a, Late nambat 1 sung siksanin mi nuamsa leh mi gilo kikal thu kikupna ka nei uh hi. Tua laiah 1999 January ni khat ni zingsang Pasian in thu thum hong piak: Think Big (Thu lian thu gol ngaihsun ding), Pray Big (Pasian zah a lian thungetna nei ding), Expect Big (Lametna lian nei ding) cih thute ka gen hi. America, leitunga gam thupi penpen tung khinzo; ahih hang i thungaihsutte neu mahmah, i thungette zong Pasian zah a lian hiloin ei cia bek-a lian, i khasum zah bek-a lian thu kingen; i thunget limlim zong lim nget hetlo i hih manin i lametna zong neu mahmah ahihna thu ka genkhawm uh hi. Nitak ann biakinn mah ah ka ne uh hi. Pa Awn Suan Thang leh a zi Ciin San Cing te’n a tanu nihna uh Niang Sawm Hawm Cing min apna nei ahih manin tua nitak ann hong vak uh hi.
Tua nitakin Jesu Sisan Vangliatna tawh kisai Heb 9: 11-15 sung sik sanin hun ka zang leuleu uh hi. Pasian kiangah a ki-ap nuamte sapna na la,
“Singlamteh kiang kong pai hi,
Tha leh zumlo mittawpi,
Na dang bang mah keng lopi,
Hotkhiatna ka zong ding hi,”
cih ka sak sungun Topa tungah ki-ap dingin u leh naute’n biakna tau lam hong manawh uh hi. Tua nitak ka ngaihsut kikkik ciangin D.L. Moody in Cambridge University ah thugenna a neih zawh ciangin sapna bawl a, mi za nih val hong ding uh hi. Ama’n tuate a muh ciangin, “Ka Pasian, hih bek adingin nungta ka hih leh zong phazo kicingzo hi,” a cih ka phawk hi.
Tua Zomite kikhopna biakinn New River Fellowship a lian mahmah biakinn khat ahi hi. Mi tampite’n i zak ngei ahi lasa siam leh la phuak siam Micheal W. Smith te biakinn ahi hi. Michael pen Grammy Award thumvei a ngah khin zo leh Dove Wards 34 vei a ngah khin zo Pasian mizat khat ahi hi. Ama lasak album million 13 kizuak khin zo a, ama lasak lak panin la 29 in nambat khatna ngah hi. Zomite, mite theih in bangmahlo ahih hangun Michael Smith tawh biakinn zangkhawm na hi gige uh hi.
Nipi nitak lam nai thum mah in hun zatna ah Late 32 sung siksanin Mawhna pulakna leh Pasian lamlahna thute ka kikum uh hi. Tua nitakin Mark 16:1-4 sung siksanin thu li (i) Itna lian (Aneu 1-2) (ii) Haksatna lian (Aneu 3-4) (iii) Zinpa leh Zindopa (Luke 24:28-32) (iv) Galte maiah ann nong lui (Late 23:5) ka gen hi. Tua zawh ciangin nekkhawm bawlna tawh kizom suakin nek khawm bawlna zawh ciangin thupha piakna tawh tutung cialpi hun ka zo uh hi.
Lungdam Thu: Nashville ka taam sung nek leh tak tawh hong vaak Sia Cin Za Suan te innkuan, Pa Pau Za Gen te innkuan, Sia Pau Khan
Lian te innkuan, Sia Kam Kap te innkuan, Sia Michael Lian te innkuan, ka zintunna Paupu leh Nemboi te a kipan nekpih manlo ahih hangin nekpih taang ci-in sum leh pai hong pia Sia Tual Khan Suan te innkuan, Pa Khawm Khan Mang leh nu Zam Cing te innkuan, Pa Go Suan Mung te innkuan leh a dang amel uh ka theih hangin a min uh ka ciamteh theih lohte, na vekpi uh tungah lungdam thu kong puak hi. Topa Jesu in Matthai 10: 41-42 sungah hih bangin ci hi:
41Pasian’ thugen ahihna hangin Pasian’ thugen mi a sangte in Pasian’ thugente’ thaman ngah ding a, mihoih hihna hangin mihoih a sang mite in mihoihte’ thaman ngah ding uh hi. 42Keima nungzui mi a neupen khat nangawn, keima nungzui ahihna hangin tuivot hai khat bek a suahte nangawn in pelloin thaman a ngah ding lamtak phawk un,” ci-in a vaikhak hi.
Topa in minthanna vangliatna tang tawntung hen.
J.M Ngul Khan Pau
(April 1-5, 2010)
Comment piaknop aomleh...