Bonn Museum hawhna (2) ~ CS Khai

Bonn Museum hawhna (2) ~ CS Khai

Bonn : BC 13 – BC 9 ki kal pawla,  khua kisat a hi dingin Roman laigelhsiam Florus in gen hi. Hih Florus pen Emperor Nero tawh leengkhawm/ khangkhawm (contemporary) hi  ci in ki gen hi. Roman te in kum 400 val Bonn khuapi ukcik uh hi. Tua ban ah hih khuapi pen Galpi nihna (II World War) lai in Judah mite tampi tak a ki thahna khuapi khat in zong ki ciam teh hi. Galpi nihna hang in Germany gam khenpi nih kisuah a, East Germany (DDR) le West Germany (Bundesrepublik Deutschland) ki ci hi. July 17 – August 2, 1945 ni in Truman, Churchchill, Stalin te in thu kikupna lianpi nei uha, German gam phel kham uh hi. 1949 November 3, ni in Bonn pen West Germany te khuapi dingin ki kipsak hi. Germany gam Museum om te lak ah, Bonn, Leipzig le Berlin Museum te minthang vangvang hi. Kum khat in mi million 1 valte in Bonn Historical Museum va en uh hi ci in ki ciamteh hi. Hih Bonn Historical Museum ah akhang akhang a German te thangthute kiciam teha, ni khat thu in a vekpi muhkhit zawh ding, et khitzawh ding hilo hi. Post War Historical Museum (Galpi nihna khitciang a German mite nuntak khuasak ziate ahihi.) ka en a, tua te  sungpan in thupi ka sakdiak te a nuai a bang a hihi.

1. Nambat 4, 2, 1 A Khiatna

Museum sung ih lut ciangin, a masa pen in, thauvui thautang, bomb te suksiat inn lianpipi te ki mu hi. Tua panin ih ngawng taklamah hei le hang Flag 4 ki mu thei hi. Tua Flag (Laan) li te in, USA, Britain, French leh Soviet Union te Flag teng ahi hi. Tua laipan in a kizom in nambat 4, 2, 1, ki mu hi. 4 a khiatna: Galpi nihna a beiciangin Germany gam phel 4  ki suah hi. USA, Britain, French le Soviet Union te in Germany gam phel 4 suah cih gennop na hi. 2 a khiatna ahih leh, Germany gampen West leh East in ki khen a, West pen USA, Britain, French ten ngah in, East pen Soviet Union te in ngah hi, German gam phel 2 kisuah cih nopna hi. 1 a khiatna in a hih leh, tuabangin German gam satan hawmin, a ki hawmban ah phelnih kisuah himah taleh, 1989 kum in Berlin Kulhpi ki lakhia ta a, Germany gam phel 4, phel 2 hi nawn lo in, Gamkhat a hihna etsakna ahi hi.

2. Ui le Judah te Kiphallo

Galpi nihna in a suksiat innlianpipite a omna pan in ih maiah tangtak in paiphei le hang Tuipeekna (Swimming pool) khat na om a, tua lai ah, lai kisuang in, Judahte le Ui hilai ah kisanglo hi cih ki gelh hi. German te in Ui le Judah te dinmun (status) a kibang in ngaihsun ngeiuh cihna hi.  Judah mite a tuntun na mun uh ah, simmawhna le bawlsiatna thuak tawntung uh ahihman in, mite khem zawh dingin om nawn lo uh hi. Midangte sim mawhnate a hoihlam in zang thei uh a hihman in, mite tung ah tuanna in nei zawsop uh hi. Midangte simmawhna ciangciang tawh a maimang zo dingte hilo uh hi. Zomite midangte hong  simmawhna ciangciang tawh a maimang, a kisia zoding te ih hi kei hi. Vansam bangin zungneilo te hi lo hi hang. Mite ih sim mawh keiding a, Judah te bangin mite hong simmawhnate midanngte tungah ih tuanna ding, a bulpi step khatna ih hisak zaw ding hi.

3. Galpi khit German Gam Nuntak Haksatdan Kigen Theilo

Ui le Judah te kiphallo a ki cihna pan in, a tung that(floor) ah ki kahtoa, Galpi nihna khitciang German gam  nek le dawn haksatna, numei te’n, numei nasep, pasal nasep cilo in na a sepna uh ki mu thei hi. Annek tuidawn haksat manin, tui thawl khat a dawn khopna uh, nek ding themkhat nei le uh a hawm khopna uh, zanpuan zawngkhawm, silhkhawm, Unau te in, puan ak tungsilh khat zangkhawm, a u in a silhloh ciangin a nauin silh cidan in,  ki mu a, ka lawmte nuihza thei mahmah uh hi. Kei ka nu zo kei hi. Ka khuangai hi. A hangin tulai Zomite dinmun tawh ki gamla lualo hi.

Ih gensa mah bangin nupi tul 300 te in, galpi hangin a pasalte uh tanlawh uha, a mau kivaakna ding,  tate vaakna ding in na sem uha, guahzu, nisate phawk manlo zah dong in na a sep uh hangin, a khamkhop uh a ngah zawhlohna, gilkial in, nitak anding, zingan ding tawh a lungkhamna te uh ki muh thei hi. Tua hun le tun hun, a nuntakna uh van le lei zahin ki khaita hi. Amaute a dingin tua bang haksat hun te, ” Hun in Leenmual Khumzota” hi. Gal venna lah sawt mahmah ta, Zomite lah zing anding, nitak anding lung kham bangtan vei om lai ding…. Gal Ngam in a thang a vilden Thanoknu hangin lungkim lo in, Thanok ngoivangpan in a kam ah kilet in Gamsai khumtoh sak a, Thanok si hi. A nu in, ka ta aw, hong tho in, ” Zusa vasa tampi kongpuak hi”, a cih hangin Thanok tho theituan lo a, tua ciangin a nu in ” Manta khalgah ka nekman hiam? Nahtang tolawk ka nek man hiam? ci in cihmawh tamlawh a neihbangin Zomi te nuntak haksatna te ka lungsung ah hong suak a, Thonoknu bangin tamlawh thapeuh hong suak dandan mawk hi. A hi zong in, Pasian a nei Zomite a dingin lamet bei cihbang om ngeilo dinga, hi bang dinmun ah ih omlai hangin ni khat niciangin, ei a ding khua hongvak hun, ni hongsuah hun om ding hi, a gualzote gualzo tawntung lo a, kibuan na ah  a zote in zo tawntunglo hi Laisiangtho in ci hi. Ukna za a neiten nei tawn tunglo in, a haute hau tawntung lo hi. Khangmasa te in, Khatvei le sim singpak, khatvei le mal singpak hi, ci hi. Zomite ah dingin simsing/ malsing hong paak hun Pasian in hong tungsak veve ding hi. Tua hunciang in, zing an, nitak ante tawh ih buai kha nawn kei ding hi.

4. West Germany Chancellor Willy Brandt’s Silent Apology(Mawhmaisakding Ngetna)

A tung a ih gen German mite nutak khuasak a haksat dan hong kilah na pan in, a tungah kahto leng, galpi nihna hunsung 1943 kum in Nazi Socialismus te in Poland te le Judahte tampi a thakna hangun mawhmaisak ngetna West Germany te Chancellor a hi Willy Brandt in khukdinsa in nei hi.
http://www2.facinghistory.org/Campus/Memorials.nsf/0/DC396F572BD4D99F85256FA80055E9B1 Ka lungsim hong phawng mahmah thu khat oma, German te in galsung thupiang hi lel, gal kisim ciangin a zo ding a ki ut tekmah hi, ih langte ih zawh theihtheih na dingin a ki gamtang hi, ci peuh mah lo in, khialkha ung. Ka mawh na uh hong maisak un, ci a Poland le Jews te tung ah ki niamkhiat takin West Germany gambup aitaangin Willy Brandt in mawhmaisakna  a ngetna, picin vai, pilvai, thu khualvai ka sa  hi. Mihingte’ ki thuman sakna munah kilem lohna le kigalneihna in zui tawntunga, ahi zongin ki niamkhiatna le a khial kituhna munah kilemna le ki itna in zui tawntung hi cih hong phawksak hi.

5. Khapi Leitang Omna

German Chancellor pa in mawhmaisak ding a ngetna mun pan in, veilam ih tunglam ah daakto leng, 1969 kum a, USA NASA Apollo 11 ahi, Amstrongte  in Khapi leitang, hih leitungah hong puaksuk uh ki mu thei hi. Tua Khapi leitang a kiim  apaam Aluminium tawh hoih tak in ki tuam sitset a, ih muh theihdingin, a mailam limlang tawh ki tuam hi. Khapi leitang ka mu kha a, hampha ka kisa hi. Muhnop in, et ka cim theikei hi. A hi zongin hun le nite’n hong ngaklo in kongpi ki khak ding hita ahih man in, cimnailo pipi mah in  saulam zuat ding hun hong tungta a, Tschüs (Bye Bye cihna) ci in, Museum sung ah hong makaihpa tawh ki khen in ka om na uh Bochum lam ka zuan vingveng ta uh hi.

CSKhai
Bochum
May 23, 2010