Mawhna vangliatna pana hotkhiatna ~ Rev. Zam Khat Kham

Mawhna vangliatna pana hotkhiatna (Salvation from the Power of Sin) ~ Rev. Zam Khat Kham

A. Thu-ummite’ Ading Bek Mawhna Pana Hotkhiatna – Mawhna vangliatna pana hotkhiatna i cih pen Pasian in a hehpihna tawh mawhna thukhenna dan pana a hotkhiatsa mite’ ading bek ahih manin, hih thugil pen Christian-te’ ading bek ahi hi. Khazih sungah kihonkhia khinin bit takin a kikep hangin, thu-ummite in mawh nopna lungsim khat nei thei veve a, mawh kha lai veve uh hi. Tua banga mawh nopna lungsim leh mawhna a kibawl khak theih lai vevena thu pen Laisiangtho leh i tuahsa thute ah kilang mahmah hi. Thu-ummite in mawhna bawl thei lai veve uh cih thu mah bulphuh-in tua bang mite a kisuahtak nadinguh Pasian’ piaksa lampi Thuciam Thak in hong hilhcian hi.

A piangthak cil mi tampite in thu-ummi khat a mawh nawn het loding leh mawh nopna lungsim a nei nawn het lo dingin ngaihsun kha uh a, ahih hangin a sung vuah mawhna vangliatna lah om lai cih mu zel uh ahih manin, lungmang mahmah thei uh a, a hotkhiatna ngahna nangawn uh lunghiang thei uh hi. Mawhna i cih peuhmah Pasian’ sianthona a kisimmawhna ahih manin lunghihmawh ding mah ahi hi; ahih hangin hotkhiatna tawh kisai lunghianna leh mawhna ah zongsatna sangin, Pasian in hehpihna tawh hong piak suaktak nading lampite a tel ding uh thupi zaw hi.

Hotkhiatna i ngah khit ciangin thu-ummi khat Pasian’mintha nadinga a nuntak ding sanga thupi zaw bangmah om lo hi. Theih lohna leh theih khialhnate in khalam-a guallelhna lianpi piangsak den hi. Lungdamna thu ahi bang liana i gen ding a thupi mahbangin mawhna vangliatna pana suahtakna thu tawh kisai Laisiangtho in hong hilh thugil maantaka i kihilh ding thupi mahmah hi.

B. Thu-ummite’ Nuntakna-a Mawhna

Pianken lui mah nei lai napi Pasian’ pianken hong kipia-a (II Pet. 1:4), Pasian’ tate peuhmah in pianken nam nih i nei hi; khat pen mawh thei mawh lo-a, a khat pen siangtho thei lo hi. Khatveivei “mawhna” kici a (mawhna peuhmah a kipatna mun), khatveivei “mi lui” a kici pianken lui pen ci leh sa tawh kipawl ahi hi; bang hang hiam cih leh, Laisiangtho sunga a kizatna ah “ci leh sa” a kici pen a piangthak lo mite’ pumpi leh kha leh hinna a kigenna-a kizang kammal ahi hi. Tua ahih manin Sawltak Paul in, “Ka sungah (ka ci leh ka sa sungah) na hoih khat beek om lo hi” (Rom. 7:18) na ci hi. A langkhat ah, hong kipia Pasian pianken ngaihsunin, Sawltak John in, “Pasian pana piang peuhmah, Pasian’ khaici ama’ sungah om den ahih manin mawhna a zongsang kei ding hi; bang hang hiam cih leh amah Pasian pana piang ahih manin mawhna a zongsang kei hi” (I John 3:9) ci-in na gen leuleu hi. Thu-ummi peuhmah Pasian pana piang ahih manin mawhna nuamsa-in zongsang lo hi ahih kei leh mawhna bawlbawl lo hi, ci-in hih mun in hong hilh hi ( Hih muna kizang verb pen present tense hi a, a kisem suaksuakte genna ahi hi). Ahi zongin, hih laikhak sung mah ah Pasian’ tate in mawhna pianken nei kei ingh (1:8), mawhna ka bawl kei hi (1:10) a kicih mawkmawk loh nadinga vauhilhna na om leuleu hi.

Hih thu nihte mah Galatians 5:17 sungah na kigen kika, Khasiangtho leh ci leh sate a kido denna kigen hi: “ Bang hang hiam cih leh, mawhdim pianken pen Khasiangtho lunggulhna tawh kilehbulh hi; Khasiangtho lunggulhna pen mawhdim pianken lunggulhna tawh kilehbulh hi. Tuate khat leh khat kido hih manin na sep nop uh nate na sem thei kei uh hi” ci-in na gen hi. Sawltak Paul in a sami mahmah mite’ thu a gen hi lo a, ci leh sa deihna banga gamta het lo a khami penpen mite’ thu a gen ahi hi (5:16). Tua bang mite’ sungah kidona om veve a, ci leh sa lunggulhna pan hotkhiatna a ngah hangin, Khasiangtho tungah kinga a kalsuan man beka gualzo ahi hi.

C. Nuntakna Hong Uk Ding Thukham

Mawhna vangliatna pana i suahtak nadinga Pasian’ gelna i ngaihsut ciangin, i nuntakna hong uk ding thukham leh hehpihnate i tel ding thupi mahmah hi. “Thukham” cih kammal pen Laisiangtho sungah khiatna tuamtuam-in kizang hi. Khatveivei i nuntakna hong uk dinga hong kipia thukham bangin kigen hi. Tua banga a kizat ciangin khiatna tuamtuam nei hi.
1. Suang pek tungah Pasian’ khutme mahmah-a a kigelh Thukham Sawmte (Pai. 31:18).
2. Thukhamte (Pai. 20:1-26), thupiakte (Pai. 21:1-24:11), leh thupiakte (Pai. 24:12-31:18) a kigawm Israel mite a tenna gam sung vua kumpi ki-uk ziate.
3. Thukham leh Kamsangte a tangtunna ahi mailam huna Messiah mahmah in leitunga a phuh ding kumpi gam sunga ki-uk zia dingte (Matt. 5:1-7:29; 5:17-18; 7:12 te ciamteh in).
4. Mihingte’ adinga kilaak Pasian’ deihna khatpeuh (Rom. 7:22,25; 8:4).
5. Mihingte mah in amau leh amau a ki-uk zia dinga a khun uh thute (Matt. 20:15; Lk. 20:22; II Tim. 2:5). “Thukham” kammal pen thahat taka nasem khatpeuh genna-in zong kizang thei hi Rom. 7:21; 8:2).

6. Thuciam Lui hun lai-in thukham pen nasepna tawh kipawl thuciamna bangin zong kigen hi. Hih bangin a ngaihsun hi lehang, thukham pen Moses’ thukham leh kumpi gam ki-ukna thukhamte sangin zai zaw a, Pasian’ maipha ngah nadinga mihingte’ hanciamna khatpeuhpeuh (Laisiangtho hong hilhna tawh a kituaka a kithuak kei zongin) genna ahi hi. Thukham pianzia peuhmah, “A hoih na sep leh, thupha kong pia ding hi” cih ahi hi. Khazih’ tungtawna Pasian’ maipha a ngahsa hi lo-in Pasian’ maipha ngah nadinga thukham tanna peuhmah gamtatna pha tawh hotkhiatna ngah nadinga hamciamna hi pah hi.

7. Ci leh sa tunga kingakna ahi hi. Thukham peuhmah in a zui mite bangmah panpih lo hi. A piangthak lo mi khat in a sep theih kan peuhmah thukham i zuihna hangin hamphatna kingah lo hi. Tua ahih manin, ci leh sa-a sepna khempeuh, Pasian’ deihna a kilaakte ahi a, thukham sunga kigelhte mahmah ahi zoning, hehpihna-a hanthotna ahi a, khathu-a sepna khatpeuhpeuh ahi zongin gamtatna pha tawh hotkhiatna ngah ding hanciamna nam hi pah hi.

D. Nuntakna Hong Uk Ding Hehpihna

Hehpihna nuai-a Pasian’ tate’ adingin, thukham kici peuhmah bei ta hi (John 1:16,17; Rom. 6:14; 7:1-6; II Cor. 3:1-18; Gal. 3:19-25; Eph. 2:15; Col. 2:15).

1. Moses’ thukhamte leh kumpi gam sung ki-uk nadinga thupiakte pen thu-ummite’ ading hi lo hi. Tua thukhamte mah a kihel hehpihna tawh ki-ukna thak in thukhamte laih khin a, ahih hangin hehpihna pianzia tawh kizui-in kigenpha hi.

2. Hehpihna nuai a Pasian’ tate nasepna tawh kipawl thuciamna vangik panin kihonkhia khin hi. Pasian in a san nadingin hanciam kul nawn lo a, Khazih sunga kisangsa mi khat ahihna tawh suakta takin nungta thei ta hi (Eph. 1:6).

3. Amau’ ci leh sa thahatna tawh a nungta dingin Pasian’ tate kisawl nawn lo hi. Hih bang thukhamte panin suakta khina, a tenden Khasiangtho vangliatna tawh nungta thei ta hi. A kigelh Moses’ thukham pen Israel mite’ tung beka kipia ahih manin Khazih’ sihna in Moses’ thukham panin amaute bek honkhia thei hi. Ahih hangin, Khazih’ sihna in Jew mi ahi a Gentile mi ahi zongin lam-et na a om lo mihingte’ hanciamna tawh Pasian’ maipha ngah nasinga hanciamna leh ci leh sa-a kitomna panin suaktasak hi.

4. Thukham tawh kilehbulh-in, hehpihna i cih ciangin kilawm lo pi-a kingah maipha hi a, Adam tawh a kipan mihingte’ mawhna Pasian in a maisak zia ahi hi. Hehpihna nuai ah, Pasian in mihingte amau tawh kilawm kituakin hong bawl lo a, amau’ kiklawmna peuhmah nagihsut-in nei lo-in a kicangtan lo hehpihna leh lainatna tawh hong maisakna ahi hi. Pasian’ sianthona tawh kituak mawhna hanga thukhenna khemepeuh Pasian’ Tapa in pua khin ahihna tungtawnin Pasian in tua banga hehpihna hong lak thei ahi hi.

Israel mite in lam tuamtuamin Pasian’ hehpihna a sinkhak uh hangin, nuntakna a ki-ukna thu ah hehpihna-a Pasian tawh kizopna panin thukham-a kizopna lam a tung uh hi zaw hi. Paikhiatna 19:3-25 a kigen thukhamte a san khit uh ciangin, Pasian in a san theih nadinga kisam heihpihna a kisap lam uh a theih loh manun thukham a zui zo ding kisa uh hi. Tua tawh kizui-in, thukham nuai-a Israel mite in thukham tungtawnin mawhna vangliatna panin hotkhiatna a kingah zawh lohna uh mi khempeuh’ tungah hong kilak hi.

5. Thukham tawh kilehbulh-in hehpihna pen nam thumin kilang hi: (1) hehpihna hanga hotkhiatna, (2) hehpihna tungtawna hong kikepna, leh (3) hothiatna a ngah mite’ nuntakna a uk ding hehpihna, cih bangin hong kilang hi.

a. Pasian in hehpihna tawh mawhnei mite hona, mihingte’ ading hotkhiatna lampi dang om lo hi (Sawltak.4:12). Pasian’ hong hotkhiatna hehpihna pen ciangtan a om lo, kithoihna-a kipia Khazih’ sihna tungtawna ama’ dikna tawh kizui a kikhel thei lo thukham’ kalhna bang lian mah-a bangmah in a khaktan zawh loh a itna ahi hi. Hehpihna pen itna hi lian lo hi; mawhnei mite’ tunga Pasian’ thukhennate’ tunga gualzo suakta taka gamta itna ahi hi.

Pasian in hehpihna tawh mawhnei mi khat a hotkhiat ciangin, mawhna khempeuh a maisak kul hi, tua bang hi kei leh tua mawhnate thukhen loh phazawh zel dinga a hehpihna daltan zel ding hi. Tua bang a om loh nadingin a Tapa’ sihna ah mawhna thukhenna siangsak hi. Tua banah, mihingte bangmah kisemsak lo-a hotkhiatna pen Pasian’ letsong kilkel ahi hi (John 10:28; Rom. 6:23; Eph. 2:8). Tua mahbangin, Pasian’ nasepna peuhmah a hehpihna bek ahih theih nadingin mihingte’ kilawmna kici peuhmah khemkhia hi (Rom. 3:9; 11:32; Gal. 3:22). Mihingte’ hoihna kihel kilkel lo ahih manin lungdamna thu gospel i cih mihingte’ nuntakna a khel tatkhiatna hehpihna hi a, a um mi khempeuh a tawntunga nuntakna leh minthanna pia hi.

b. Hehpihna tungtawna Pasian in bittaka hong kepna bel hotkhiatna a ngah mite Pasian in hehpihna bek tawh a kepna ahi hi. Mawhna in thumaan taka a kalhnate panin suakta taka a gamtat theih nading lampi kihongin, mihingte bangmah kisemsak lo-a mihingte’ hoihna peuhmah kihel lo-a hotlkhiatna a kizawh khit ciangin tua banga hotkhiatna a ngah mi khat a tawntungin bittaka Pasian in a kep ding bek om ta hi. Pasian in kem takpi-a, Pasian’ tate peuhmah hehpihna sunga a om ahi hi (Rom. 5:2; I Pet. 5:12).

c. Pasian in hotkhiatna ngah mite’ nuntak zia ding zong hehpihna mah bulphuh-in hong gelsak hi. Hotkhiatna ngah-a bittaka kikem mite ama’ minthan naidngin bangci nuntak ding cih Pasian in hilh hi. Thukham in Israel mite bangci nuntak ding cih a hilh mahbangin Pasian in thu-ummite’ nuntak zia ding kicingtakin hilh khin hi. Laisiangtho in hong hilh nuntak zia dingte kicing khin ahih manin, tuate gawmtuah tawmtawm kul nawn lo hi. Pasian’ tate peuhmah thukham ukna nuai ah om lo a, hehpihna nuai ah om bek hi. Hehpihna nuai-a a sep peumah Pasian’hehpihna a ngah nadinga a sep hi lo-in, Pasian’ it Pa sungah kisang khin ahih mana a sem hi zaw hi. Ci leh sa thahatna tawh a sep hi lo a, a sunga a tenden Khasiangtho vangliatna kilangkhia-a a nuntakna hi zaw hi.Upna tawh nuntakna hi zaw hi: “Mi dik in upna tawh nungta ding hi.”Hih thute Lungdamna thubute leh laikhakte sungah kimu hi.

E. Gualzawhna Lampi Khat Bek

Mawhna vangliatna pan suahtak nading lampi tuamtuam kihilh pongmawk hi.
1. Thu-ummi khat in thukham a cingin zui leh Pasian’ minthan nadingin nungta nuam ding hi, kici pong hi. Hih bang thukham thu peuhmah in gualzawhna hong pia lo ding hi, bang hang hiam cih leh hih bang hanciamna pen ci leh sa tunga kinga hi a, tua ci leh sa pana suahtakna ding mahmah a kilunggulh hi zaw hi (Rom. 6:14).
2. Thu-ummite in a painken lui uh a beisiang nading hanciam kul hi, tua hi leh mawhna vangliatna pan a tawntungin suakta ding uh hi, ci-a kihilhna zong om hi. Hih bang kihilhna a maan loh zia:
a. Pianken lui beisiang thei ding cih peuhmah Laisiangtho in hong hilh ngei lo hi.
b. Pianken lui i cih ci leh sa tawh kipawl hi a, Pasian in ci leh sa tungah gualzawhna hong piak bangin pianken lui tungah zong gualzawhna hong pia ding hi. Ci leh sa i cih leitung, ci leh sa leh dawimangpa kici thu-ummite’ gal liante lakah khat ahi hi. Pasian in leitung, ci leh sa leh dawimangpate beisiangsak lo a, Khasiangtho tungtawnin tuate’ tungah gualzawhna hong pia bek hi (Gal. 5:16; I John 4:4; 5:4). Tua mahbangin, Khasiangtho tungtawn mah-in i pianken lui tungah zawhna hong pia hi (Rom. 6:14; 8:2).

c. Pianken lui beisiang taktak ci-a a nuntakna a sin ngei kuamah om ngei lo a, hih bang upna a maan taktak hi leh hih lai a sin mi pawlkhat bang tua bang nu leh pate’ sung pan piangin, mawhna pianken tawh suak lo ding hi.

d. Tua mahbangin, hih upna a sang hi lehang, i sunga hong tenden Khasiangtho mahmah in khiatna nei lo dinga a sep ding zong om lo ding hi. Tua sangsikin, a khamipente nangawn Khasiangtho-a nungtak ding, ci leh sa thu-a si khin bang kingaihssut ding, ki-ap ding, mawhna thuneihsak loh ding, mi lui suahkhiat ding, in kivauhilh dena, ci leh sa gualzawhsak loh ding, leh Pasian’ sunga om den ding, cihte kivauhilh den zawsop hi.

3. Thu-ummi pawlkhat in hotkhiatna ngah khin ahihna uh tawh Khasiangtho lo-in Pasian’ minthan nadinga nungta zo ding kisa thei uh hi. Rom. 7:15-8:4 sungah Paul in hih bang upna tawh kisai ama’ sinsa thu na gen hi. A hoih thei napi bangci sep ding cih a theih lohna na gen hi (7:18). Tua hih manin (a) a lungsim tawh kilehdo den mawhna thukham mahmah a ci a sa sungah teng ahih manin guallel den ahihna (7:23); (b) tua bang dinmun pen a hingim huai mahmah ahihna (7:24); (3) hotkhiatna a ngah khit zenzen hangin ama’ sepna in suahtakna pia lo a, Khazih Zesu’ sunga nuntakna Khasiangtho thukham bek in suahtakna a piakna (8:2); (d) Pasian’ deihna peuhmah thu-ummite in kicingsak zo gnei lo a, thu-ummite’ sung bekah a kicin theihnate na gen hi (8:4).

Romans 7:25 ah mawhna vangliatna pana suahtakna pen i Zeisu Khazih’ tungtawna kingah bek hi a, Zeisu Khazih’hang hi, ci lo hi. Pasian’ sianthona tawh kizom thu ahih manin, suahtakna pen Zeisu Khazih’ tungtawn beka kingah thei ahi hi. Khasiangtho in bel thu kikhen nai lo a puksa pianken tungah thu nei thei lo hi; Ahi zongin Romans 6:1-10 sunga a kigen bangmah-in thu-ummite’ pianken lui pen Zeisu tawh sihkhopna, kivuikhopna tawh thu kikhen khina i sunga hong tenden Khasiangtho in gualzawhna hong pia thei ta hi. Hih banga hong kisepsaknate hangin, thu-ummi peuhmah Khasiangtho tunga kingakna tawh nuntakna thak sungah kalsuanin, mawhna thu ah a si khin banga a kiciapteh ding ahi hi (6:4,11). Hih pen Khazih tungtawna Khasiangtho hanga suahtakna ahi hi.

F. Khasiangtho Hanga Gualzawhna

Khasiangtho thu i sin lai-a i gensa mahbangin, thu-ummi khat mawhna vangliatna sung panin Khasiangtho in suaktasak thei hi. “Khasiangtho-in na nungtak uh leh, ci leh sa deihna na zui kei ding uh hi” (Gal 5:16). Mawhna vangliatna pana hotkhiatna pen mawhna thukhenna dan pana hotkhiatna mahbangin Pasian’ nasep hi a, mawhna thukhenna pan i suahtakna pen upna gamtatna tungtawna i ngah bangin mawhna vangliatna pana suahtakna zong upna lungsimpuak tawh kingah ding ahi hi. Diktansakna a ngah mi peuhmah upna tawh nungta dinga, tua upna pen mi dang khat’ vangliatna upna hi a, tua bang mite in Khasiangtho tungah kingak luat kul buang ken cei, cih hun nei ngei lo ding hi.

Hong tenden Khasianghto tunga kingak ding a kisapna thu thum om hi:
1. Hehpihna nuai ah thu-ummite in vantung nuntak zia banga nungta dingin hong kisawl hi a, tua pen ci leh sa-a a piang thei lo thu ahi hi. Vantung gam mi hihna a nei (Phil. 3:20), Khazih’ pumpi sunga mite (Eph. 5:30), Pasian’ innkuanpih (Eph. 2:19; 3:15), Pasian’ tate pen i vantung dinmun tawh kituaka nungta dingin hong kisawl hi . Tua pen mihingte’ nuntak zia khenga nuntakna ahih manin (John 13:34; II Cor. 10:5; Eph. 4:1-3,30; 5:20; I Thess. 5:16-17; I Pet. 2:9), i sunga hong tenden Khasiangtho tungah i kingak den kul hi (Rom. 8:4).
2. Thu-ummite leitung a uk Satan tawh kidodo hi. Hih thu hangin, “Topa sungah a thahat kul hi” (Eph. 6:10-12; I John 4:4; Jude 9).
3. Thu-ummite in a uk zawh loh uh pianken lui nei gige hi.

Tua hi a, Laisiangtho i hong hilhna ah Pasian in mawhna thukhennna dan pan hong hotkhiat bek hi lo-in mawhna vangliatna pan zong hong honkhia thei hi. A tawpna ah thu-ummite vantungah kicinga i om ciangin mawhna phual pan hong kihonkhia ding hi.

Dotna

1. Bang hangin mawhna pana hotkhiatna pen thu-ummite’ ading bek hi se ahi hiam?
2. Thu-ummite in mawhna bangci cianign kibuaipih lai ahi hiam?
3. thu-ummite in pianken nam nih a neihna thu Laisiangtho in bangci bangin hong hilh ahi hiam?
4. Khasiangtho leh i pianken lui bangci bangin kizom ahi hiam?
5. Laisiangtho sungah “thukham” cih kammal bangci bangin kizang ahi hiam?
6. Thukham in a zui mite bangci bangn hon thei lo mawk ahi hiam?
7. Bang hangin thu-ummite Moses’ thukham nuai ah om lo ahi hiam?
8. Bang hangin thu-ummite in Pasian’ san ding kihanciam tawmtawm lo ahi hiam?
9. Bang hangin Pasian’ tate amau ci leh sa hanciamna tawh nunta ding hi lo ahi hiam?
10. Nuntakna a uk dinga kipia hehpihna leh Israel mite a kizop zia leh pawlpi’ kizop zia tehkaak in.
11. “Hehpihna hanga hotkhiatna” thu ah hehpihna bang ciangin kilaaka, Pasian’ lampangah bangteng kisem hiam?
12. Thu-ummite bittaka a kikepna leh hehpihna bangci bangin kizom ahi hiam?
13. Bangci bangin hehpihna pen nuntakna a uk dingin kicing ahi hiam?
14. Bang hangin thukham thu peuhmah ah lam-etna om lo ahi hiam?
15. Pianken lui beisiang thei hi, cih upna a maan lohna bangci bangin kilak thei ding ahi hiam?
16. Mi khat a pianthak nak leh hoihtakin nungta thei ziau ding hi, cih thu a maan lohna gen in.
17. Mawhna vangliatna panin bangci bangin kisuakta thei dinga, tua hotkhiatna pen Khasiangtho leh Khazih tawh bangci bangin kizom ahi hiam?
18. Bangci bangin mawhna vangliatna pana hotkhiatna leh upna kizom ahi hiam?
19. Bangci bangin thu-ummite a sung vua teng Khasiangtho tungah a kingakna uh tungtawnin a hi thei ngei lo ding vantung gam nuntakna nungta thei uh ahi hiam?
20. Thu-ummite a kihotkhiat ding a kisapna leh Satan’ vangliatna bangci bangin kizom ahi hiam?
21. Bangci bangin pianken lui vangliatna pan hotkhiatna kisam i hi hiam?
22. Tu laitaka mawhna pana hotkhiatna i ngahna leh vantunga i ngah ding hotkhiatnate tehkaak in. Rev. Zam Khat Kham