Na theitel lecin deih ing ~ Dong Mung
Kei kong it kong ngaihna hong tel pipi, hong thei pipi hong nusia in nong paisan ciang… “Keima hangin a nuntakna a kisia kha tam maw; zu khawng a dawn gawp tam maw; za khawng a teep gawp tam maw; nuntak ding nangawn lunggulh zo nawnlo in a kisih bawl kha tam maw,” ci-in na lunghimawh nawn ken maw Ngaihno…Kong it mahmah, kong ngaih mahmah na hihmanin nong paisan ciang na sa mahmah ing… thuak hak sa mahmah ing… Lungkia zo phial mah ing…
Ahi zongin tu’n telsiam ta ing…Kei sang palzaw angah zal ding na hih manin lungkim zaw, lungdam zaw ing…Na lungtup siangah nunnuam sambang na zal ding hong deihsak penpen ing…Kong it luatna, kong ngaihluatna hangin na nuntakna a nuamsa nuntakna tawh na kalsuan ding hong deihsak ing… Kong deihsakna thu na thei tel lecin deih ing…
Nong khen ciang thuak hak ka sak mahmah hangin, keima pumpi kisiat lawh liang ding leh keima maban kikhak cipna liang dingin ka hun manphate mawk bei lawh liangin ken nang hun hong pia zo nawn keng…Nong upmawh bangin kei pen na kisia hiaulo ka hihna na thei tel lecin deih ing…
Kong itna zah na theih, kong ngaihna zah na tel himah taleh kei kong itzah, kei kong ngaihzah hong it zolo hong ngai zolo a, na it na ngaih kiang zuan-a na pai ciang… “Hong phawk lai zen tam maw; hong ngilhzo mawk tam maw; hong ngaihsunsun lai tam maw,” cih khawng tawh na lunghimawh nawn ken maw…
Kei zong keima maban ding gel in, keima ngaihno thak ding tawh buai mahmah lel ta ing… Nang kong it kong ngaih zah a, ka it ka ngaih ding liapaalno/taangpalno tawh sawlbang hei khawm dingin buai mahmah ta ka hihlam na thei tel lecin deih ing… Banghang cihleh kei hong it taktak zolo, kei hong ngai taktak zolo nang hangin ken ka hun manphate mawk beisak zo nawnlo ding ka hih man hi…
Hibang kong gen ciang… “Lawmlawm sam aw e…ki-awi liang mah si e,” nong ci nuam phial zongin, hi khaiciite nangma tuh mah hi. Tua banah ken ka khantawn nuntakpih dingin hong tel himah taleng…nang na gualnopna ciang bek tawh nong kikholhpih pak man hizaw hi. Nang hangin kei ka nuntakna a siat sangsik in nang tung pan ka ngah khak pilna, ciimna, theihtelna, theihcianna le kidawp theihnate tawh ka maban ding a zom toto ding hita ing…
Kei tawh na kikholh sunga kong piak, kong bahteng a meet ngah danin na kituat kha ken aw…ken zong nang tung pan tampi mah ngah lel ka hi…kkkkkkkk
Bangbang hileh….Sing zong a paak khempeuh gah kimlo a, a ki-it kingai khempeuh zong kiteeng kimlo ahih manin nihgel zang samgi bang i khenna zinmang sinthu hilo, sianmang zing vaihawmna hi ci mai ni…
Ka mailam saupi adingin tu akipan kalthak suanin mainawt ta ing…Nang tungtang a ka thuak lungzuanna, khasiatna le thanemnateng tu-in tuni tawh beita hi…Ngaihno aw…Hun khat lai-in ngaihno na hiphial zongin tu-in kei nuntakna hong picingsak Siapinu/siapipa na hita hi…cih hong thei tel lecin deih ing…
Tangbang dam ciat ni…
Mi mawkmawk ka hih nawnlohna hong THEI TEL LECIN DEIH ING… Dong Mung
Comment piaknop aomleh...