Khuapih ngei meltheihte tampi lakah khat thu genteh pak nuam ingh. Malaysia a pai masak lai-in zukham ankham vai-in cimawh thongkia in om ngei hi. (Thongkia khempeuh zukham ankham hi cihna hi lo). Inn lam ong ciah kik a, tua khit ciangin a nihveina Malaysia pai kikin, zukham ankham mah in thongkia in cimawh dongtuak leuleu a, hehpih huai, khuangaih huai kisa mahmah hi. Ahi hangin tua bang mite pawlkhat pen khua sungah zukham ankham in kitom thei a, Malaysia ah thong nihvei a kia ngei pa hi ingh. Kuamah lau keng…ci-in awng ziahziah ngam lai hi. Ih hehpihna le a kiphatsakna uh tong le lam-in na kigamla hi. Nasep hoih lo vankham tawh thong sung tung mite zong thong a kiat kik ding uh phamawh sa loin a suahtak khit uh ciangin sem teitei hi. Tuni in hell sung tung mihaupa zong leitungah a hauh ngei bangin ong om kik thei leh hell thu mangngilh lel dinga, a hell sung tun ngeina thu pen kiphatsakna, kipasal sakna, kihangsan sakna le minsialna tawh gitlohna ding peuhin ong nei kik veve ding hi.
Khatvei lai-in Abraham in hell sungah gimna a thuak mihaupa’ huhngetna hih bangin na dawng hi, “Amaute in Moses le Kamsangte’ thu a 
man nop kei uh leh mi khat ong hing kikin amaute’ kiangah a va gen hangin um sak zo tuan lo ding hi,” na ci hi (Luke. 16: 31). Mihaupa le Lazarus hun lai mah bangin tuhun ah zong Lungdamna thu up ding le kisik ding thudon lohna pen ih theih ding, ih up ding, ih muh ding, ih zak ding thu kicing a om zawh loh man hi het lo zawin, ih suang lungtang puak hang na hizaw tawntung ahihna Abraham in a gen ahi hi. Moses le Kamsangte ii hong lah zah kaanin sih nung thu vaihawmna tawh a phazaw thu a kilakkhia zo tuan ding ahih lohna Lai Siangtho in gen hi. The refusal to believe the gospel is not primarily due to lack of evidence but to a hardened heart – cf. Mk. 8: 17; Jhn 11: 37-40; Heb. 3: 7-11, 15; 4: 7). Luke points out that Moses and the Prophets all testify to Jesus as the true Messiah (Luke 24: 27).
Mi tampi takin Topa Jesuh le a nalamdang bawlte mu gige pi mahin um tuan lo uh hi. Thuciam Masa (OT) hun lai in zong a lamet uh pen Jesuh Khrih (the Messiah) mah ahi hi. A ngaklah uh, a lamet uh ong tun ciangin Singlamteh tungah khai lum sak veve uh hi. Tua bang mite kiangah Lazarus dang khat tho kikin a va pai hangin a um tuan uh hiam? (John 11: 42, 47-48). Lai Siangtho in, “TUNI-in Pasian’ aww na zak uh leh Pasian na lehdo lai uh hun bangin na lungsim uh khauh sak nawn kei un,” ci hi. Sih nung ah ci lo hi. No more Second chance. It is Today (Heb. 3: 15; 4: 7).
Laphuak pa in, “Na sih nung ciang koi ah na pai diam?” na ci hi. Sih nung ciangin ih pai nading pen sih ma tawh thu a kikhen ding hi zaw hi. Tuni in hotkhiatna Ni hi. Tua ahih manin a thupi mahmah hih hotkhiatna thudon loin ih om leh suahtakna om thei ngei lo ding hi (Heb. 2: 3). How shall we escape if we neglect such a great salvation? Lungdamna Thu thupi na sak kei phial leh zong pau loin om hithiat zaw in. A hun om lai-in sep dinga kilawm, panpih dinga suangdalkilawm, thudon dinga kilawm khat a langpan na hih khak ding dah huai mahmah hi. Sanggam aw, hih na kisap nadang tengteng, gentehna politics, economic, technology, communication and information thute thupi lo hi kei, thupi mah hi. Ahi zongin mi khat peuh in leitung buppi a ngah zongin a nuntakna bulpi (Pasian’ gam le a dikna) tan leh bang phattuamna om ding ahi hiam? (Mk 8: 36)
A hun nawn lopi ah thudonna, upna le kisikna pen gup ngah lo mite’ pianzia hi khin zo a, gup ngah lo ding mite’ thu kihilhzia ii gah zong ahi hi. Na khempeuh in hun khat nei ciat hi, cih pen Lai Siangtho in gen hi. Na Sih nung ciang koi ah na pai diam? No more Second chance after death. Tua hi a, tuhun pen a hunhoih hi a, tuhun pen hotkhiat ni hun hita hi (1 Cor. 6: 2). Sih khit ciangin kihonkhia thei nawn lo ahih manin tuhun pen hotkhiat hun kici hi.
Evan. Suang Dal
Comment piaknop aomleh...