A tate 3 mai ah thautawh kaplum athuak Pa Stephen Pau Suan Kim (Tonzang, Naulak)

USA, Iowa State ah nungkal Friday (Apr 21) ni in thautawh hongki kaplupsak Pa Stephen Pau Suan Kim (Tonzang, Naulak) pen Zomi sungbek ah hilo, atheikha azakha khempeuh in hong khasiatpih mahmah uh a, Local News tuamtuam ahzong limsuah mahmah hi. A tuahsiatna mun aom USA Today Network tetawh akizom ahi “Des Moine’s Register” te News suahsak anuai ah kong hawmsawn uhhi.

Stephen Kim pen Friday ni in atate 3 mai ah thautawh kaplup thuakmawk ahih manin “Des Moines’ Immigrant Community” te ki linglawng mahmah hi. Amahpen kum 41 aphakhin khat ahihi.

Azi nasem ciahding mawtaw sungah angak in atate 3 tawh aomlaitak un damiah “Robbery” tuakin aki kaplum ahihi. A tate pen naupanglai mahmah uh a, athum un kum 9 nuai vive ahi uhhi. Tua naupangno te maitang ah apa un kaplup athuak ahihi.

Refugee-led Advocacy Group’s Executive Director khat ahi Henny Ohr inzong Stephen Kim ii kithahna vai azak ciangin lainatpih mahmah hi. Ama genkhiatna ah EMBARC akici “Ethnic Minorities of Burma Advocacy and Resource Center” kipawlna leh nidang anasepna Employers te ki pawlkhawm in hongnusia sanggampa innkuanpih te panpih nading ki vaihawm cihi.

Henny Ohr in agenkhiatna ah Stephen Kim pen Burma (Myanmar) panin Refugee tawh America hongtung ahihi. Amahpen Western Myanmar, Chin State pan hi a, Zomi Ethnic Community pan ahihi. Zomi cihpen Ethnic Minority khat hi a, India, Bangladesh leh Myanmar gamtuamtuam te ah Millions tampi pha uhhi.

Myanmar gamsung ah atamzaw Theravada Buddhist vive ahih hangin hih Zomi tepen atamzaw Christian ahi uhhi. Stephen Kim leh azi pen Myanmar panin biakna leh minamvai hangin Malaysia ah ataikhia uh hi a, tuapan in America hongtung uh ahihi. American Citizenship zong a ngahkhindeuh hi a, “American Dream” sunmang manin nasep ahanciam mahmahkhat ahihi.

Myanmar panin biakna leh minamvai bawlsiatna hangin America ah gambeel in hongtung hi a, bitna “Safety” zongin hongtung ahihi. Bitnading zongin hongtungkhat hihmun ah thah athuak ciangin Des Moines’ Burmese Community pen ki linglawng in, ki khasiat mahmah hi ci’n Henny Ohr in genkhia hi.

Stephen Kim pen nasep hanciam mahmahkhat ahih manin, mun 2 takah na asem ahihi. Cool Basil kici Clive sung aom Thai & Japanese Restaurant khatah Host asepkawm in mundang khatahzong Bartender asemkawm ahihi.

Azi inzong Cool Basil Restaurant mahah asem hi a, Stephen Kim leh azi te ii Manager Alex Phrasany in agenkhiatna ah “Stephen Kim pen mihoih mahmah khat hi a, anuihmai denkhat ahihi” ci’n genkhia hi.

Azi inzong munnih mahah nasem in, Cool Basil Restaurant tawh anei akibang ahi Banana Leaf kici Asian Bistro panin azi nasem aciah laitak in apasal aki kaplum ahihi ci’n Manager Alex Phrasany in genkhia hi. Stephen Kim ki kaplumna pen ki muhdanna “Hate Crime” hang hiloding hi, atuahsia, akamsia pak hizaw dinghi ci’n genbeh hi.

Des Moines Police spokesman Sgt. Paul Parizek inzong hih Stephen Kim kikaplupna pen “Hate Crime” cihtheih nadingin bangmah pansan Evidence omlo hi ci’n Sunday ni in genkhia hi.

Henny Ohr in agenna ah Stephen Kim in apianna anupen America ah asapzawh nadingin ahanciam mahmah laitak cihi. Anu tawh aki muhlohpen kum 15 bang hita a, atate 3 zong US ah asuak uh ahihi. Atute a ending in anu sapding ahanciam mahmah laitak in atuahsia ahihi.

Related: US, Iowa State ah Pa Stephen Pau Suan Kim (Tonzang, Naulak) thautawh kikaplum

A tapa thautawh akikaplum cih anu kiangah aki zaksak ciangin anu in atapa luanghawm leiah aki tuhkikma limlim in munuam mahmah ing ci ahih manin amanlang in US Visa a ngahtheih nading in ki hanciam mahmah hi ci’n Henny Ohr in genkhia hi.

Stephen Kim te innkuan sihgalna leh panpihna zong Online panin hih Link gofundme.com/stephen-kims-family panin ki piathei hi.

Huhna sum aki ngahkhempeuh anuai abang in kizangding hi.

• A tate 3 ii mailam sangkahna panpih nading
• Sihvuina ah akisam bangbang in zatding
• Apianna anu US ah sihvui hunbawlna apaitheih nading

Nangmah tawh Pasian omkhawm tahen! ZD Sawltak #zomidaily