Na pianthak loh phamawh

Na pianthak loh phamawh

Kumkhat khit kumkhat hong beibei-in, khua hun paiziate hong kidang semsem a, mulkimhuai lipkhaphuai leh patauhhuai thu tampi hong piang hi. I theihsa vive hi. Leitungah lungmuan’ nading khat zong om nawnlo hi. Hi bang hunsia sungah i om kawmkawm mahin, hong piangsakpa Pasian i mangngilh khak ding dahhuai mahmah hi.

Gam tampi leh minam dangte en nai kei ni. Zomite’ sung bekbek ah zong kum khat sungin hong nusia sim zawh lohin tam ding hi. A cidampen khat zong a beiziau theihna leitung ahih manin lungmuanhuai hetlo hi.

Hong tung ding kumthak sungah zong, nang adingin, na thupha san kum, na daupai kum, na gualzawh kum, na tuahsiat kum, na mabin’ kum leh deihlohpen in na nuntakna a beikum ding zong hikha mai thei ding hi. Hi teng khempeuh lakah bang tuak ding cih thei khollo nahih manin na pianthak loh phamawh hi, aci nuam ihi hi. Piangthak limlim peuh leteh bangbang na tuak zongin lunghimawh nading omlo hi.

Tuni, tulaitak mahin pianthak sawm ni. Bang hang hiam cih leh kumkhat sunga si ding sazian lakah nang zong kihel thei hi teh. Na pianthak leh lungmuang takin om in la, na piangthak nai kei leh hun lap takin tumahmah in kikhel in, piangthak in.

“A lian mahmah gupna thu don loin om le hang, Mawhna daan tawh bangci kipelh thei ding ihi hiam? (Heb 2:3b) Itna leh deihsakna tawh,

Khazih sungah, ✍️David Tuang