Itna le lainatna tawh thu khentat ~ Lian Tuang

Itna le lainatna tawh thu khentat ~ Lian Tuang

2004 kum March kha sung Kawlpi a ka tuahkhak thu khat ahi hi. Ka nau Nuam degree lak ding pen ka innkuan un kalawp mahmah uh thu khat ahi hi. Kawlpi Tahan Bethel sangpan B.Th a man ciangin innkuan bupun amah lawm dingin kawlpi ka pai henhan uh hi. BOC mai a ka pu te inn ah zin ka tung uh hi.

Graduation pen 9:00 am kipan ding ahih hangin khuavak tunga kipan in ka nute, ka nite, a inntek a lengla ka vek un ka manlah henhan uhi. Lawp mahmah le ngaklah mahmah ka thuah uh hi. Tua lakah ka pa in ngaklah pha diak citciat hi.

Ka pa om lo

8:00 am ciang ka vekpi un Taxi (pei 4) tawh paito khawm ngeingai dinga kigel ahi hi. 7:30 am pawl ciangin ka pa om thei nawn mahmah loin amahbek siksakol tawh paito vatvat se hi. A dangteng bel Taxi tawh damdam in kipaito hi. Kei le ka nau khup pen kisapna khat peuh om khaleh ci in ka lawmte cycle kawmin ka kizakai sak zawdeuh uhi.

Aphual ka tun uh ciangin ka pa na tung nai lo takpi hi. Ka vekpi un ka khuadakdak uhi. Hun kipat ding petmah ciang nangawn in ong tung theilo ahih manin ka nau Khup (Singapore) tawh ka pa zong dingin ka paikhia kik uh hi. Ka nu le meltheih u le nauteng bel cih na ding theilo dipkua sa in pawi sungah tu lel in khua dakdak uh hi.

RTC mai ah pa Khai

Ka nau tawh Tahan lam panin pai suksuk pong lampi dungah ka khuadak suksuk uh hi. Ka pute inn dong ka tung suk kik uh hi. Inn sungah lutphei in ka zong kawikawi pong uh hi. Tua laitak pasal khat khua-ulnel kai neinai sa in ong lut a, “Pa Khai a cih khat zin na nei uh hiam” ong ci laizang hi. Nei mah ka ci kik hi. “ Tua leh na zin pa uh pa Khai pen RTC sak ah cycle tawh kitaih in, tua ong gen suk hi ing.” Ong ci hiau hi.

Ka nau Khup tawh ka delhto pah uhi. Ko tun ciangin mi na ki um pempam lai a, amah bel lampinawl Platform tungah na lum deldal hi. Ong muh ciangin nuam mahmah in ka tate hi ci keii hi. A gei a om mite vaihawmsiamna hangin cycle hawlpa zong taikhia het loin na ngak hithiat hi.

Ko unau ka tun uh ciangin thu ong dong ngeingai uh hi. Cycle hawlpa koi cih ding, no koi khua pan onv pai, na zin uh koi lai cih te ban ah cycle hawl pa in zong ong maisak un ci in kapkawm khukdinkawm liangin ong luai cip lailai hi. Ka pa lah tang thei vetlo lumcip ahih man zato or clinic khat peuhpeuh pai ding bek ka ngaihsun hi.

Photo panin X ray kilaih

Amai ah clinic khat na om pah hi. Siavuan zong om hi. Tua lai ah dom litlet in ka lut uh leh ong bawl sawm vet lo hi. Hih dan te ko bawl khuan nei lo hi ung, zatopi ah manlang takin pai zaw in ong ci lel hi. Ka lungkim theilo ahih manin a khe a sisan luang neinai teng bek tawm ong puah sak ve a si tam luanglua khaleh ka cihleh ong sang thei bilbel a, tua a bawl kawmkawm in chian Myih clinic ah pai un zato hi leh mei khawng pai kei leh X ray khawng nawngkai in teh ong ci bilbel hi.

Ama cihna ah alem bangbangin ka pai suk pah uhi. A khuk le a khetul kikek pha mahmah in a kawng nuaisiah tang theilo hi. X ray pen ka kizaih thei pah uh hi.

Khentat kul ta

Siavuante nitak ciang kim pan ding hi, tua ciang ong kilak kik un ci ahih manin ka ciah kik uh hi. Inn ka tun uh ciangin cycle hawlpa tawh kiho ding thu hi leuleu hi. Amah pen mi mawtaw hawl khat na hi a, a nu bek tawh a om ahi hi. Amataw pute kiang le palikte kiang ong gen kei un, ka pu in nasep ong pia keileh ka nu tawh ka an nek ding uh om lo ding hi. Na ka sep kawmin no lungkim dong na cih bangbang uh ong mang ning. Tu laitak bel bangmah nei mahmah keng ci in ong thumthum hi.

Ka pa lah tangthei vetlo ahih manin ong zawngkhal lawh kha diam, zatui zaha ah sum tampi ong bei diam, sihna peuh tawh ong kizom kha diam ci in patau in ka khalau mahmah uh hi.

Cycle hawlpa zong dah mahmah in kei ong luaizel, ka pa luaizel, ka nau luaizel in na cih bangbang uh ong zui ning, thu ong bawl kei un, ka nasep pute kiangah bangmah ong gen sak kei un maw ci in kapdekdek kei hi.

Ka pa khentatna

Tuabang ziazua ahih manin bangmah ka khentat thei pak het kei hi. Tua laitak lupsa in ka pa in thukhat ong gen piatpiat hi. Cycle hawl pan ong huhzawh zah ong huh henla ciah sak lel un. Ka dam kik lehlah kei a hampha, khantawn zawngkhalna le sihkhialhna khat peuh ka tuahlawh lehzong Pasian laitanna hi zaw ci ni. Kei kizo mahmah lel ing. Ka tate zong a khanglai ding vive hi. Avaksuk a vaktohna ah hih bang tuahsiatnate pan Pasian in ong kep sak zaw hen. Kei tuahsiatna hangin nu le pa vakna dingin na a sem hih tangvalno pa tungah thu le la leh vangik bangmah suan lo ding hi hang.” Ong cih san hiau hi.

Si maw si lo

Tangvalnopa nuam lua ka pa khe len in kap ngaungau hi. Sum 35,000 ks nusia in ong ciahsan pah hi. Ka nau kiangah I nute lungkham lua ding aih teh nang va paito in ka kici uh hi. Ka nau khup in ka nute kiang “ka pa cycle tawh kitaih in bangmah ci kei, tun inn ah om hi” ci in sianggen vet hi. Ahi zongin ka nute in um zo mahmah lo uh a, na pa a silo takpi mah hiam ci phapha zezen uh hi.

A zinciang zingsang lam pan kipan in ong nuam tuam hathat a, a sawt loin Tedim ah ka ciahto kik thei pah uhi. Akawng, a khuk le a khe teng khakhat sung khawng na sa a, tua khit ciangin damsiang suak hi. Ong nusiat dongin kawngnat khuknat cih bang gen ngei nawn lo hi.

Mi hangsan ahihi

Ka pa pen tuahsiatna, natna satna hangin mailam ding bangmah a kigen khol thei hetlo a lungzin huai mahmah dinmun sung panin tate ading itna le midangte ading lainatna tawh hangsan takin thu a khentat ngam mahmah khat a hihna ka nung phawk kikkik hi. Hih bangin itna le lainatna tawh thu a khentat pen hangsan ka sa mahmaha, thupi ka sa mahmah hi.

Tua laitakin vai kisam teng thakhat thu in ong viahawmpih pen Pa Cin (Pyi Chit tha) le Pa Tung (Zotui) te hi a tu ni dongciang lungdamna a tuamin ka kiko naikei zezen uhi. Lian Tuang