Hihthu te namuh uh ciang in! ~ Pau Do Lian

Hihthu te namuh uh ciang in! ~ Pau Do Lian

Laisiangtho bulphuh: Joel 2:31 “Topa in tua aluahuai hun a hongtun’ ma-in ni hong mialin kha, sisan hong bang ding hi.” Acts 2: 19 “Tua ciangin vantung leh leitungah hilhkholhna lim leh na lamdang ka bawl dinghi. Sisan kiluan’ sakna, meikatna leh meikhu sahpi hongom ding hi. 20 Topa’ ni, a lian thupi ni, hong tun’ma-in ni hong mialin Kha sisan hongbang ding hi.”

Thumasa:

Leitung thupiangte leh Khuahun kikhel te i-teciang in ahici mahding hi, gal kidona, sihna man na tezong a hunzui hi in teh ihci hi. Ataktak in Laisiantho sung enkikleng Pasian in abawlsa nate tawh ei leitung mihingte hongho pihpih nahimawk hi.

Abeisa thupiangte

Joel 2: 31 b, Kha sisan hong bangding hi. Laisiantho genpen NASA (National Aeronautics And Space Administration) te muhna tawh kituak mahmah hi. Abeisa kum’ 2013 sung NASA research bawl anuai abangin mu uhhi. Anuai a nite pen Jewish te nithupi tawh kituak sese lai hi.

• April 15, 2014 ( Jewish Passover )
• October 8, 2014 (Feast of Tabernacles)
• April 4, 2015 (Jewish Passover)
• September 28, 2015 (Feast of Tabernacles)

Mailam thubel Pa Pasian khutsung bek ah om ahih man in, abeisa thupiangte leh Pasian kammal etkak ding thupi kasa pen hi.

Apai sa kum tampi lai (2014 ma) thumvei vilvel Kha sisan hongbang ngei hi. Tukum April 15, 2014 nitak inzong Kha sisan hongbang hi.

1493 Kum in khatvei (July 30, 1492 in Jewish 200,000 Spain pan kihawlkhia, Oct, 12, 1492 in Columbus in America mukhia) hih nithupi tetawh kituak hi

1949 Kum mah in khatvei, David Ben-Gurion in Jewish State pen Israel te state hiding ci in phuanglak hi

1968-67 kumsung in khatvei (the six day war a kici Israel leh Arab galpi) tawh kituak hi
Pasian teltuam Israel te leh hih khuahun kihei te akizopdeuh pen Laisiangtho tawh kituak ahihlam Leitung mipil tenzong kipsak semsem ta uhi.

Leitung Tangthu kikhel

Tuma kum 500 val lai kipan thulam dangpiangte tuni ading in bangdeih na neihiam? Atung a, thumasa ah tawmpai kik ni. Pasian in abawlsa (creations) tetawh ama’ limleh melsun’ ei Leitungmite honghopih den hi. Psalms 19: 1. Vantung in Pasian’ minthan’na gen a, vanpi in ama nasepna taangko hi.2 Nisimin thu gengen a, zansimin theihtelna pulaklak hi. Laisiangtho Lui Noah tuiciin akipan enleng Pasian Noah zangin tangkosak a, miten thudonlo uh ahihman in abawlsana (tui)zang in Leitung sawpsiang hi.

Leitung khuahun kikhel pen eilaihtheih hikei e, ahici mahding hi bekci loin hih thupiangte tawh Pasian in, adiakin, ama tate hong hopih den na hi gige hi. Laisiangtho kigelh hunlaibek hilo in tuni tanmah thutuam latuam piangden a, tuatezong Pasian kammal (message) khat mah ahihi. Tangthu kikheltheih nadingin leitung gamthahat ten’ gamtha nemte laaksawm/la in tangthuthak gelh uhhi.

Bangthute ihmu’ ihtuak a?

Gal (war) Matthew 24:6 “Anai agamla-ah galkidona thu naza ding uh hi. Hihte apiang mah ding hi a, ahi zongin abeina ding hinailo ahihman in patau kei un. 7 Gam khatleh gamkhat, kumpi khat leh kumpi khat hong kido ding a, mun tuamtuam kialpi hongtungin, zin hong ling ding hi.” Leitung pumpi cizo khang e Myanmar/Burma gamsungbek enleng, 1962 pan in Gamuk teleh singtangmi tekikal a kidona ompaisuak a, tuaten bang sukha (affect) hiam? A million phial refugee leh nekzong in’ gampua lam kipusuak hi.

NGO leh UN ten environment (innkiim innkiang hahna lam), livelihood (nekleh takzawn nalam) Water and Sanitation (Tuisiang leh pumpi siantho nalam), Healthcare (Cina kep) na leh Education (pilna lam) cihbang program tetawh lehdona (respond) nei mahleng tuniciang mah kisam denlai hi. 2007 kumin WHO (world health organization) in apulak na-ah abeisa huntesang in natna lungno atuamtuam miphiatkal zahphial in kithehthaang’a tuapen tomnosung in sakleh khang khualzin na manlangzaw leh azinmi tamzawk man hi ci hi.

Mihing Mangcip (human disappearance) March 8, 2014 zan ni Kuala Lumpur pan Beijing lamapai MH 370 tunga om mihing 239 te tunidong kimu nailo hi. Tuazawh asawtlo in S.Korea te tembaw tuitungah kibung a za kim mangcip hi. Tuikia asite pen aluang uh tuitungah kilam hina pi mangcip mawk hi. Nung kalsawn in Nigeria high school sangnaupang numei 200 bang kitaimangpih (kidnapped) a aomna uhkithei nai lo hi. Zan halzek in Turkey gam suangmeihol khuk kicim in aza in si a, zanih bangmah awkciplai hi. Leitungmite’ technology pilna sangsemsem’ accident tam semsem hi.

Siatna khang (increased wickedness), Matthew 24: 12 “Gitlohna khang mahmah ding ahih manin ki-itna hong kiam ding hi.” Sum leh pai deih nahang in nupa kikhen ding hamsa kisa nawnlo hi, ei-angsung ding ahihleh siatna cih kithudon lo in eimau hamphat nangbek ki enta hi. Ei maumuh napen adikpen in kimu ahihman in Pasian kammal (Laisiangtho) deihna sangin eimau muh’ thudik (justice) kizui zawta hi.

Neih kibang kitenna pen thudik (social justice) khatin akhangto gamten pumta uhi. I Corinthians 6: 9 “Migilote, Pasian’ Ukna sungah alut hetlohna ding thu na thei uh hi. Note kihaibawl kei un. Numei tawh a paktatte, milim biate, mizi ahihkei leh pasal tawh amawhte, PASAL leh PASAL (neihkibang same sex marriage) a khialte.” Genesis 19 sungah Pasian in hihthu (same sex or homosexuality) adeihloh manin hamsiat hi.

Apiangthu khempeuh Pasian theihlo in apiang omlo, bektham lo in thupiang khempeuh te’ Pasian hong hopihna hi a, kimleh pam a’ thupiang (siatna) te hangin a ma hongpai kikding anai’na leh amidikte honghopih den ahihna ihphawkding kisampen hi.

Thukhupna
Akigingsa in a-om kimthei tekding in Topa in hong anvan ta hen! AMEN.

Pau Do Lian
Andover Newton Theological School
Newton Center, Boston Massachusetts, 02459