Argentina & World Cup 2018

Argentina & World Cup 2018

Argentina in Messi zanglo ahihman in World Cup trophy genloh Group stage kheng ding zong lam-et a bei dinmun tung uh hi.

Argentina World Cup 2018 squad mi 23te pen bawlung siam, club golpipi a kimawl vive uh ahi hi. Ahi zong in, mimal siamna ah leitung a bawlung siampen ci a kiciamteh Messi, pawlkhat bang in leitung dang pan a ong pai hiam acih phial zah a mi lamdang a angaihsut pa uh a ban bel om samlo uh hi.

Nigeria, Iceland leh Croatia tawh group D ah omkhawm kha uh a, group stage ah Iceland tawh kidin in Croatia 3:0 in lel uh hi. Nigeria tawh match khat kimawl laiding uh a, azawh leh point 4 ngahthei ding uh a, Iceland in Nigeria a zawh kei leh lam-et om thei mawkmawk lai theikha ding dinmun ahi hi.

Leitung a bawlung siam minthang banghang a hih dinmun tung thei mawk uh hiam? A kiditpih Iceland squard leh a lelh uh Croatia aquad Argentina zah in team bup ahi zong in, mimal ahi zong in, minthang lo uh hi. A diakdiak in Messi bek zong Club ah Real Madrid in um luailuai a a buaipih uh hi napi, Iceland leh Croatia in um luailuai zah in buaipih lo uh hi.

Bawlung i cih team work ahihna ong musak hi. Barcelona ah Messi siamna a picing sak pen a team mate teng mah ahi hi. Messi in play maker ahihtheihna ding in a lawmte bawlung a piak bangmah in alawmte’n zong amah bawlung apiak uh kul hi. Barcelona team in Messi siamna zangthei uh ahihman in gualzawhna tampi ngah uh hi.

Argentina team ah ong suih ciang Messi a om lam kithei lo zah phial in bawlung ngah lo, aman piakhin leh mun alak kik hang, alawmte’n piakik nawnlo uh ahihman in a maban uh bei zel hi. Messi zang theilo, zanglo uh ahihman in tu a dinmun a tung uh ahi hi. Barcelona in Messi azat bang in Argentina team in zang hileh tampi kilamdang ding hi.

Nidang in Kawlgam a State & Division kimawlnate ah Chin State a gual lelh denkeeina pen tualpi laizang ah Laite in bawlung angah uh ciang adangte pia nuamlo in, amauteng bek mah kipia dihdih lawmlawm uh ahihman zong tampi kihel tuak hi.( a kimawlte’ genkikna ). Tuabang a Chin/Zomite a thanem laitak a a thahat mahmah Mandalay divisionte’ coach pen Zomi hi zen hi.

World Cup 2018 a Argentina dinmun i et ciang a lungsim uh kimu thei hi. Messi zanglo uh ahihman in guallel ding uh hita hi.

Zomite’n teamwork kisapna Bawlung leh Minam vai khempeuh ah i Messi koi ah i koih hiam? Bang tan i kiat khit ciang Messi zang ding ihi hiam? I cihmawh luat ciang i zatsawm leh Messi in ong gum zo lai mah diam?

Mite’n Trophy a gal et laitak ei group stage nangawn ah mehnuih pilhpelh lel tawh kilungkim sak ding ihi hiam? Messi thalnial teitei lai ding maw? Pau Khat Suan