63/
Nausuah gimna a baihlohzia pen a thuakngeite bekin atel theih ding thu ahi hi. Nute in khua-ul, sinsan, thatang le a nuntakna mahmah tawh khekin nau ong nei uh hi. A thatang neih khempeuh uh tawh a sisan neih zahzah sukkhia ahih manun a si bei in a tha uh bei a, a ci nangawn lumzo nawn loin a khut a khe khing dikdek hi.
Thabei in a mit uh kilep dildel a, tang takin hak zo nawnlo uh hi. Gimlua tawllua in tuiduh dangtak mahmah citciat uh a, ahih hangin genkhia zo nawnlo uh hi.
Tua hun laitakin naungek ong kap zakzak a, tua kahna aw-ging in khua phawk leh phawkloh thuahin a lum dildel, a ci a khing dikdek, a nute tungah akigenkhia theilo thahatna lianpi khat piangsak lian hi. A mit ong hak zo pah hi. A lu ong phongzo pah uh a, naungek maitang amuh ciangin a gimna teng mangngilh in nui kawmin pau zo pah leuleu uh hi. Nau nawi pia dingin kithawi zo pah vingveng hi.
Naungek kahna aw-ging in sihlang gimna athuak a nute, thakhat thu in a damkik sak mah bangin, khangcing khin tate maitaina zahtakna itna in Nute Pate adingin a kigensiang zolo lungmuanna khamuanna thahatnate piang sak hi.
64/
Naungek a damloh hun ciangin Nute in sun tawh zan tawh kemcip ahih manin zanmengin gim mahmah uh hi. Naungek tawmvei sung a ihmut laitak ahihkeileh nawi a teep laitak hun tomno sung bekbek nangawnin a nute zong lusu in mengme pahlian hi. Ihmu suksuak pah uh hi.
Ihmut dildel in kihopih zo nawnlo a, kiphong lehzong phawkzo mahmah lo hi. Ahi zongin a angsunga a tawi hithiat naungek pen tawmciklik kihei in gamtang khazenzenleh khua phawkkik pah lian citciat hi.
Tate vai ding ahih nakleh nute in a mumang nangawnin phawk thei sitset uh hi. Tua mah bangin tate in zong nute pate kisapna le lunggulhnate thei in pilvang huailua mahmah hi.
65/
Innlam ah khuado sialsawm pawi, lungdam bawl hun a kipan kikhopna le mipi tutkhopna khat peuhpeuh a om ciangin nupi papite innsung innpua ah nasem silbawl tukhawm khawlkhawm in amau mun ciatah kiom ngeingai hi. Naupangte leuleu ciangin a bawngbak thei ciang ahih nakleh huansak huankhang inntualte ah amau le amau kimawlin kiom sak ngeingai lel hi.
Naupangte kimawlmawl in tua lakah a kap khat peuhpeuh a om ciangin innsunga nasem amanlah mahmah a nute in naupang tampi lakah“ tu a naupang kap pen kei ta hi ve aw” ci in ama ta ahih lam thei sensan hi. Thakhat thu in delh pah vingveng a, a ang ah tawi in a khitui nul sak pah hi.
Tua mahbangin nu le pate in zong dahna kahna lunglenkhuangiahna khasiatna khat peuhpeuh a tuah hun ciangin a tate kiangpan itna telsiam tawh thapiakna Aw Nem le nunnempanpihnate lunggulh mahmah uh hi.
Lian Tuang
Comment piaknop aomleh...