President Trump in Covid-19 hangin National Emergency taangko

President Trump in Covid-19 hangin National Emergency taangko

U.S National Emergency Declaration :: President Trump in Covid-19 hangin tuni in National Emergency taangko khia (declare) hi.

– National Emergency a taangko khit zawh ciang Federal leh State agency te kiang huhna akisam bangbang kipuak thei dingaa, tutung in Pu Trump in Emergency fund $ 50B zat khiat pah ding taangko hi.

– Coronavirus ado nading un Federal Goverment leh FEMA acih national emergency agency in akisam bangbang resources teng la thei ding uh hi.

– Zato akicin kei leh Kumpi zum, Mall, stadium, community hall, Sang cih te Emergency Zato in zang ding uh hi.

– National Emergency a taangko zawh lian ciang kiat cih tak aa akia Stocks market +10% phial kah toh vat hi. Private company tampi in meetna ngah ding uh aa, kumpi tung pan loan cih bang zong la thei dinguh ahi hi. Adiak diak in Pharmacy company leh testing company te nasep tam tuam ding uh hi.

– Walmart, Target, Walgreens, CVS leh adang testing corporations ten “drive-through testing” (e.g. parking lot ah) center te amanlang thei thei in hong laam/bawl ding uh aa, mi khempeuh mawtaw hawl kawm in free in “Coronavirus testing” kibawl thei ding hi. Mun tampi ah “quarantine zone & center” koih dinguh hi.

• – Google in zong “screening website” bawl in mipi te huh ding cih taangko khia uh hi.
• – Federal student-loan interest teng avekpi khawl phot (waived) ding hi.
• – Kumpi sang (Public schools) teng atamzaw kikhak ding hi.
• – Church (Pawlpi) Biakinn te zong atam zaw khak phot uh hi.

– Federal Kumpi zum teng kihong lai ding aa, Federal employee (Kumpi Nasem) atam zaw in inn pan na sem (teleworking) thei ding uh cih tuni taangko khia uh hi. Kei sepna Departement of Commerce bang kumpi nasem 90% in inn pan nasem ta uh hi.

– Department of Energy in Namgim tui leh sathau (crude oil & Petroleum) tampi Reserve dingin lei khol ding uh hi.

– Zato khempeuh ah akisam bangbang van leh zatui te huh/pia dinguh aa, Kumpi te in pension la khin retired doctors tampi sam kik khin ta uh hi. Gam security la ding leh gam mi te ahuh dingin Galkap te leh National guard tampi zang dinguh hi.

– Private Company atam zaw in belh nasep pongmaan in sem lel dinguh in kilam en hi.

Hih Coronavirus hangin mun khempeuh ah buaina, sihna tampi om ahih manin Zomite i omna ciat ah kidawm tek in na khempeuh kigin kholh ciat ding thu pi mahmah hi. U.S Kump thu nei ten hong pulaak khiat mah bangin mai dalna (mask) ten natna dal zolo aa, khut sil den ding leh hand sanitizer zat den ding hong pulaak uh hi. Hih alahuai natna amanlang in hong bei nang nakpi takin thu ngetna ah hel ciat ni. Thomas On S. Mung (Washington D.C, March 13, 2020)