Minam Lam leh La te’n tangthu gen ~ Suum Do Thang

Minam Lam leh La te’n tangthu gen ~ Suum Do Thang

Minam thupi khempeuh in,amau ngeina lam leh la nei kim uh hi. “Lam”“ ih cih pen nuamna dahna te ah ih lungsim sawl bangin, ih pumpi ih gamtatna a hihi. Ih nuam ih dah, ih lungsim sungah ih thuakkhak thu a neu a lian zuiin,ihkhut, ihkhe,ihkhuk ,ih kawng,ih lu ,ihtaw leh ih pumpi ten a sep khiatna (Action ), a lah khiat na a hihi. Ih dahna thu,ih lungdam na thu kibang lo ahih manin, tua a thute tawh kizui in lamdan, nam tampi om hi. A hi zongin tumging khat,la kisa khat omlo in,ki mawklam theilo a, a mawk lamlam te mihai bang’ kici liang hi. La pen kamtawh aging in kisa a, lam leh la pen tui bangin a luangkhawm a hihi.

Zomi ten zong Zo ngeina lam leh la tampi ihnei hi.A khuahun zui a, ih neih pawite leh nopna , dah na lungdam kohna,matut gualzawhna,galmat samat nite leh ni 3 sung a kibawl galaih,saaih nite, Tong akici ni 7 sung aki bawl pawi lian pen Ton pawi leh sihvui na mun te ah, lamdan tuamtuam kilam hi.Hih lam te ih phawk khak teng at pak leng,Dak lam, khat guak a tang lam,suktuah lam( Gua kan ki ci in gua aki zat ma-in ansukna suk te zangin nalam uhhi )taangsuak a lam,phit lam,lam vui, lam sai,sawngsik, ai lawng tawh lam,khuakhailam,saipi khuksu lam, tonko lam,tomun lam,cheih lam,salu kan lam,siluang lap lam,tut lam cih te pen tuan pupa te khang hun pan aki pan a kilam te hi in,tuni dong ihzat pawlkhat om hi.Tu hun tawh kituakin,a ki puah to to lam leh la tampi om ta a,tua lam leh la ten ih tang thu a at at a hihi.Ih lam leh la pawl khat ten zong Pasian phatphat ta hi.

Hih lam te lakpan daklam thu, tomno khat genpak leng,Zongeina pawi khat peuhpeuh a kibawl ciangin pansik ni nitak lamin innka tungah daklam ki lam hi.Dakbu a kici dak 3 ciangin bu khat, dak khat in aw khatciat nei a, aw un,aw lai,aw eu ahihi.Dak 3 pen mi 3 in a mau siamciat lain tum uh hi.Khuang tumsiam khatin khuang tum hi.Khuang tumpa khuang tum vuak (Beat )tawh kituak in,dak,zam leh sialki te gin ki tuak tak in kitum a,kisai letlet hi.Khuang tumpan tua tumging kitum teng makaih hi.Mi dang ten khutbeng in ki huang ziahziah uh hi. Tumging tum te leh mipi te tutna laizangah sing kisui khanglui ankuangpi khat ki khup koih hi.

Khanglui ten ngimna, ngaihsutna kibang, ki thutuak hang, cih agen nop uh teh “ Khuang leh zam mah bang”a na cih uh mah bangin, khuang leh zam, sialki leh khutbet nate ki tuak tak a,a ging letlet pen, nuam kisa mah mah a,a maigum khat zong om lo,lungsim ki pumkhat sak hi.Tua bang hun lai takin,daklam siam pawl khat a lam dingin ki thawisa in na om uh hi.Lamsiam te khat lam khit teh khat namsau lain lam hong kipan hi.Khuang tum pan zong a khuang hongsan ( Nawhsawm ) in khuang tum nawh sem sem hi.Daklam a, a lampa zong namsau lekin hongtawn pah kiaukiau hi.Sialphei hong tat hi. A kikoih sa kuangpi tungah kahto in,a khe langkhat bek tawh honglam a,a khe lang khat khepi kaa pen akhe langkhat khetul zum tep sak hi.Ki hei pengpeng in hong lam a,sawtvei a lamzo pen pa mi thahat lamsiam in ki ciamteh hi.

Mi lamsiam, mi thahat ki demna, kitel na khat ahih man in,a mau pahtawi nadingin a khum penpen zu phelpi ( Sai bel pi) khat ki tuamlup ngiat a,a lam khin masa sa tua zuphung ah kikai in zu akang in tep (dawn ) ahih kei leh “ Bel “ aki ci ciang khat zu bel sung, zupeng gei ah phut suk in , tua ciang a phuh uh aki dawk dong zu tep uh a,lam siam na tawh zu lim,zu khum tha lawh uh hi.Hih daklam pen nop cihtak in nuam hi.Ih Zongeina lam leh lasak na pen mi et dingin hoih hi cih sang in,ei mau mahmah kihel in lasa kawm in, lam leng nuamzaw kan lai hi. Daklam et pen muh nop ki sa-in a maigum om lo, ki nui ziahziah in lungsim ki pumkhat sak hi.A hi zong in khuang tum dak tum ten a khialh uh leh ki lam thei lo in nuam ki sa lo hi.

Tuhun ciangin ei Zomi te khuang leh zam,dak leh sialki te tum dan, kisin a, siam ih sawm laitak a hihi.Khuang tumsiam ten khuang hong tum un,dak tumsiam kua om a, sialki tum siam kua om ahi hiam?.Kua teng lam ding a, kua teng in zulup in sago ding a hi hiam? La gen ding kua hi a, kua teng in lasa ding a hiam?Ih vekpi in lasa kawmin,kituak takin ih lam khawm thei ding hiam? Kituak ta kei leh lasa in lam mai ni, a hih kei leh kisin lai ni ih ci hiam?.Ih ngaihsut na bang hi a, ih tup bang a hi hiam? Ih ngim ih tup te mipi ngimna mipi tup na ih suah sak zawh kei leh ki gualzo ngei lo ding hi.Taksalam khalam nasep na ah ih picin theihna dingin hih daklam thu etteh huai hi.

Khanglui ten “Thu ihcih zong la hi a,la ih cih zong thu hi” ci in paunak khat na nei uh hi.Lai thei lo uh ahih man-in amau sep leh bawl ,gual tungtuanna,dahna kahna ,lunglen khuangaih na,galmat samat nate laphuak in, la tawh na ciamteh ( Hmattantin )uh hi.La pen note book in zang uh hi.Mi kim in la phuak thei lo in, lasak zong a siam deuh om se hi.La phuak siam ten la aphuah uh teh,gamit na la,gal leh sa la,nungak tangval ki-it kingaihna la( Zawl la ) nopla dahla, innla lola,sawmla ,khuado la,tukzukhawlhla, cih bang in a mau thuakkhak thu tungtawnin na phuak uh hi.La phuak siam te pen,enhuai a bat hang en huai kimlo hi.

Dah mahmah leng, lungleng mah mah leng la phuah kisiam ci uh hi.Ngaihdeuh, muibun deuh ci uh hi.Zawlla phuak siam te bang alunglen luat man, a ngaihluat manin, aphuak siam zong om thei a,a mut siam, thu a uanggen siam zaw deuh te mah la phuah siam ki ci hi.Laphuak siam te la pen ngimna nei in,khiatna nei hi.Thu thuk thupi tampi kawk hi.Mi lungsim vutin sukha hi.Zawlla bang pawlkhat ten guallelh la ci-in ciamnuihna in gen hi.”Nang tawh khending lung ka gel ciang a pham kulsin zal mah ki sang e” ci na pi a ki khen uh teh lawm 4 leh 5 bang ngai man lai uh hi.

Sia Kam Khen in T.S Khai pen”Lapu “Lengtong Pauno pen “ Hih laiah labu khat ki pai hilo maw” a cih bangdan mah in khanglui te zong lapu,labu mah na om uh hi.Nopna dahna ah labu cih bang ki nei lo in,a sak dinguh late lathei lapu,labu ten khuangtumpa kiangah labul genin ,ladawn pen ladawn a sang ding la makai te kiangah gen in la kidawng in kisa hi.La tawh a ki ciamteh( Note book ) tangthu te pen vuttui tawh satpiang tawh ihsawp ta zongin,beisiang,bei mang thei nawn lo ding a hihi.

Ei zomi te tangthu sung khat enpak leng, ihgam leh ihlei a na it mi pawlkhat ten” Myouk Suamna “ cih tangthu na at uh cih ih theihsa a hihi. Myouk suamna tawh kisai in,Pu Thuam Thawng, Pu Pau Dal leh Pu Kai Tuah te mangkaang ten na man uh hi.Kintat thong ah khum uh a,thongsung siangtho lo,cidam huai lo lua ahih manin, 1893 kum December kha in Pu Thuam Thawng ci-na in hong si hi.Kha nih zong kihal nai lo in 1894 kum January kha in apa nat mah bang in ci na in Pu Pau Dal hong si leu leu hi. Pu Kai Tuah bek cianlai ahih man-in a lungleng in dah mahmah hi.Thu tampi ngaihsun hi.Thongcing te kiangah Pu Pau Dal luang ngenin a ang ah tawi kawm in a sam hiatsak a, hih la na phuak hi.

(a) Besam phungpha zun mawh tawh,phualngo no aw,kawltui ah thel bang kia ding na lawm lo e.
(b) Tun zun pallai huihkhi sem a, heu aw,phualngo dingdiang mel mak a ,vaitham aw e.

Hih la laigual nih bek pen a thu, a cing in at leng laimai 10 ah ta lo ding ahih man in la ih cih pen thu ciaptehna tom (Short note) khat a hi hi. Tua ahih manin Zomi khempeuh in ih neih kim Zongeina, Zolam leh Zola te tu hun tawh ki tuak in puahpha a Pasian biakpiak na mun te leh ih mi nam huaina munte ah zang leng, ih Pasian zong lung damding a, ih minam zong pumkhat suak in thupha namkim ih ngah ding hi. Zo ngeina ih theih ihzat kei leh Zomi hih na pan theihlohkal in a mang mang,mi mangthang ih suak ding hi.Zo ngeina, lam leh la te ih zat man in Christian hih na bei tuan lo ding hi. US gam na leng ah Zongeina Zolam lehZola ki sisin ta hi.

(Ka zak thuhong at hi loin katheih leh kamit tawh kamuh ,kasep khak thu hong at ka hihi. A lunglut ten hong contect un)

Suum Do Thang
Pensacola, Florida
Cell Ph 850-288-2341