Myanmar, Phyu khua ah 6.0 Magnitude thahatna tawh zinling

Myanmar, Phyu khua ah 6.0 Magnitude thahatna tawh zinling

Central Myanmar sungteng ah tuni Friday zingsangtung lamin 6.0 Magnitude thahatna tawh zinling hi ci’n US Geological Survey te’n genkhia uhhi. Tua zinling akipatna pen Phyu khua panin 24 Mile (40 km) agamlakna munpan in akipan ci hi.

Tuakhitzawh ahatlo zawdeuh Magnitude 5.3 hatna tawh tua Region sungteng mahah thumvei zin lingkik leuleu hi ci’n US Geological Survey te’n genkhia uhhi.

6.0 Magnitude thahatna tawh zin alin hangin tua kuamsung tengah innsia losia tampi omlo khading kici hi. Ahi zongin zinling adalding in akilamlo Building, Structure pawlkhat inbel thuakthei veve khading hi.

Hih zin alinna Phyu khuapen Naypyidaw leh Yangon khua kikal aom khuakhat hi a, Population mi tampi ateenna khua hilo bilbel hi. Khuaneu khat hi a, Yangon leh Naypyidaw panin 150 km tuakbang agamlakna ah aom khuakhat ahihi.

Myanmar gamsung ah abeisa in zinling “Earthquake” cihpen aomthei zelzel ahihi. 1930 leh 1956 kikal in Sagaing Fault sungteng ah 7.0 Magnitude leh tuasangin ahatzaw zinling cihte omthei zelzel hi.

More: Myanmar, Bagan khuasung aom Pagoda tungpan American numeikhat kia in si

2016 kumsung inzong Central Myanmar aom tangkhualui mahmahkhat ahi Bagan ah 6.8 Magnitude thakhatna tawh zinling in mi 3 in sihlawh hi. Bagan pen gamdangmi te painop mahmahna Tourist Destination khat hi a, gamdangmi te muhnop etnop mahmah Temple honkhatzong kisiagawp hi. Sawltak #zomidaily