India, Mumbai vanlengtual ah buannawigawp in vanleng khat awkcip

India, Mumbai vanlengtual ah buannawigawp in vanleng khat awkcip

India, Mumbai khuasung aom vanlengtual ah guahtui tamluatna hangin vanleng buanlak ah awkcip ahih manin, adang vanleng tampi te ki tusakngam nawnlo in, adang Airport ah kilengsak cih AFP pan kiza hi.

Tuesday ni akipan zanthapai guahzusuak ngekngek in, India’s Financial Capital sungteng ah tuidim zihziah cihi. Sanginn, College tezong tui tamluatna hangin kikhaksak phot hi.

Vanlengtual buannawilak ah a awkcip vanleng pen SpiceJet Airline khat hi a, Tuesday zanlam 10pm hunpawl in a awkcip ahihi. Hih vanleng tungah Passenger mi 183 atuang uh hi a, Varanasi panin Mumbai zuanin aleng ahihi.

Munbai vanlengtual atuk ciangin vanleng atainading in akibawl Runway panin pialkhia in, khuahun siatna tawh lampi nalgawp in apei taalgawp hi ci’n Airline te’n Statement ah genkhia hi.

Vanleng buanlak ah a awkcipna hangin Main Runway pen kikhakcip in, Secondary Runway zong vanleng tampi kitusak ngamlo hi ci’n tua International Airport pan Spokeswoman Veena Chiplunkar in genkhia hi. Adang vanleng atuding 56 tezong Airport dangah ki tusak cihi. Vanleng a awkcip penzong Wednesday nidong ki hemkhiazo nailo cihi.

Guahzu akizop suaksuakleh tuicin Flood tungding hi, kidawm un ci’n Warning kipia a, ahi zongin Meteorological Department te’nbel asiadingteng in hong nawkkhinta hizaw hi ci’n genkhia uhhi.

Related: India, Mumbai ah inn kicim in mi 8 in sihlawh, adangzong tampi liam

Railway Officials te’nbel meileng teng angei in kitaitai saklai ci uh a, ahi zongin khuasungmi tampi te’n meileng tawh kuankhiat sangin inn ah omcip photzaw uh cihi.

Mumbai khuapi sungah June khaleh September kha kikal pen guahtui tamphadiak den kici hi. Sawltak #zomidaily