Thailand ah mopawi bawllaitak nupikhat nausuak dihdih

Thailand ah mopawi bawllaitak nupikhat nausuak dihdih

Thailand, Nakhon Ratchasima’s Sikhiu District sungah zanni Saturday ni in mopawi akibawl laitak in, mopawisiim in apai nupikhat nausuak citciat cih The Nation pan kiza hi.

Tua nausuak nupinu pen amin Nattaporn Tesrit kici a, mopawi abawl monu ii alawmte khat ahihi. Nau apaaizawh kha 9 acingdekpan hi a, alawmnu ii mopawi “Wedding Ceremony” ah amuakding in apai ahihi.

Mopawi akibawl laitak in tua nupinu pen nausuak dihdihmawk ahih manin mopawisiim mipite’n lamdang samahmah uh a, ahi zongin ahihtheih bangbang un panpih ngeingai uhhi.

Naupaai nupinu pen nausuakding in akithawi ciangin mipi te’n singkungnuai khatah aliim beelding in ki zawngphei hi. Tuakhit ciangin ageinai penpen aom Hospital khatah puaktheih nadingin Rescue Worker tezong kizasak hi.

Ahi zongin Rescue Workers te aphual ah atunma in nupinu in singkungnuai ah nausuakding in kipankhinta hi.

Medical Official te panpihna tawh tanumei khat bangmah nawngkaina omlo in suakkhiathei hi. Tua naungek pen cidam mahmahlel in, agihna zong 3.2 kg pha cihi.

Mopawi abawllaitak monu inzong alawmnu hoihtak nau asuahkhit ciangin lungdampih mahmah a, naungek leh anutawh photo kizaihkhawm uhhi. Tuakhit ciangin nupinu pen Hospital khatah kipuak a, zatui akisam bangbang in Medical Care kibawl hi.

More: Hotel khatah mopawi bawllaitak Gas bung puakkham in asi mi 18 phata

Nausuakding in akibuai ciangin mopawi “Wedding Ceremony” zong tawmvei ki dinkhawlphot himahleh, mopawisiim te’n nuamsa mahmah in lungdampih mahmah uhhi. Hihbangin mopawi bawllaitak naungek cidamin asuahkhiat theihpen thuhoih hi, gualzawhna hi ci’n ki ngaihsun cih kiza hi. Nausuah hamsa asa hetlopawl hikhading hi. Sawltak #zomidaily