Ei le Ei sung mah pan na hoih tampi pankhia ni
Ih ziin khat in zing tui hong tawi sak pak zong ih lungdam mah bangin, zingsang sim aa tui a tawi den ih tate tungah lungdamna ko zel ni.
Ih gilkial laitak an hong vak midang khattung ih lungdam mah bangin, a om sunsun tengtawh a tate aading a lim thei pen in an a huan den ih nu tungah lungdamkoh ding manggilh kei ni.
Sum kisap laitak sum hong leitawi pak khat tung ah zong ih lungdam mah bangin, ih neu a kipan innkuan sumzek ding a zong ih pa tungah lungdam ding manggilh kei ni.
Haksat laitak hong huh khat tungah ih lungdam mah bangin, ih hoihna ih khialhna hong puakpih, hong dinpih ih Zi/pasal tungah zong lungdam koh ding manggilh kei ni.
Midang te tung ih thusiam keei mah bangin ih innkuan sung ah thusiamna cil bawl kei ni. Gam khantohna, minam khattohna icih pen “ei le ei” icih innkuan sungpan hong kipan khia ahi hi.
“Ei le ei” hilel hang kisam se kei “ahi ding mah hi” cih tawh maisak kei inla, lungdamna omnate ah lungdamna thu gen in.
“Ahi ding mah hi” ih cih hun hong bei thei ziau aa, “phawk huai mah si e” icih ding hun hong tung thei hi.
Tua hi a “ei le ei” sung mah pan na hoih tampi pankhia ni. NK Khanno
Comment piaknop aomleh...