Mobile Phone ging langlang keei

Mobile Phone ging langlang keei

Khat vei Mizogam ei Zomi biakinn khat ah ka kikhop leh akikhawm mi pen biakinn sungdim mikmek keei hi. Tammahmah bilbel hi Topa thupha cih ding hi. Tua akikhawm khempeuh pen Zomi vive kahi uhhi. Hun ongkipan in Pasian phatna pahtawi na la ongkisa in nuampeuhmah in thalawp huai ngiat hi. Mipi in phatna lasak ziahziah nasungah kenzong kasakkawmkawm in ka lungsimsung ah ei ma kam ei ma pau ngiat tawh Pasian phat thei bia theicih pen nakpi tak in thupi si ee maw ka ci in ngaihsunsun pawngmawkmawk kha ingh.

Tua kangiah sutsut kawmkaal in phatna lasak ong hial bawl in lamna khalam na lam ongkipan in tua khit teh upa chairman pa in thunget na tawh hunpi ongzom tohi. Hun pi ongkipan in lasak na Topa min phat nuam te ci in lasa ding mi ongsam in tun ah tua Lia…. In Topa minphatna ongsa ding hi ci in hunuk pa in pulak na aneih khit teh lasadingte zong atut na mun pan ongding khia to in amai ah ongpai khia in mic ongla in lasadingongkipat lian leh mi in khutbeksan ngeingai in nopci zawzen hi.

Lia.. lasak siam sapian kahih ciangaa daaideedaa in kangaih lai tak ka nunglam ah atu pa phone ongging lengleng keei. Lingvatliang kai ve. Tua leh ka tutnanung himawk ahih ciang aa mipi inzong amit uh ko lam ongngat pheikeei mawk ta, Lasa nu Lia … zong en pak lo liang in kolam onget vat uh bel nuammel khol lo bek thamlo in ka lungsim ngaihsut na puapial kha vat keei mawk hi.

Tu bek dingkasak leh sermon pa in thu ong gen kipan in thugenpa bang athugen hoih sa lua lunglut lua ka hih ciang aa kakam kaliang aa ka ngaihdeda lai tai ka taklam ah atu pa phone onggingta leuleu maw ongphawngvat keei sam aive. Kataklam kakiang aa tu himawk ahih ciangaa mipi in ong en leuleu. Ka thungaih lunglut laitak aihciang aa ka ngaihsut na puapial vat leuleu. Phone ging lam ah.

Tua tawhongkhawl ding kasak leh tawmvei tak ciang aa kamailam ah khat ongging leuleu, amasa aa bang mah aa mi in ongen bek hi lo tua phone ging anuih san om leh kilawm minui bang za kai ve. A phone ging te lah ngeihthei ta buang in langlang keei.

Tua ni kikhopna pan in ka ngaih sut na ah ongsuak pen bang hiam cih leh ih ki khop ciang ahi zong, Mi thupi ulian khat peuhpeuh tawh ih kiho ciang ahi zong, athu pi kikhop na khat peuhpeuh hunsung in ah ih puak ih Mobile phone pen silent or Suit off ah koih thei leng pen hibang in ih kiang aa tute hi taleh midang khempeuh ading in lungsim nawngkai napiangsak lo ding hi cih pen kalung simsung ah ongsuak vat hi.

Leitung khan toh na tawh kizui in mikhempeuh phial in Mobile Phone tawiciat ta uh aa, tua ahih man in Zomi akua mah peuh ih neih phone kepdan siam zatdan siam ding akideihsakhihang. Timothy (Naulak)