Mizoram Donghu vai siangphot
Mizoram a ih sanggamte’ dongtuahna tawh kisai in huh theih bang in huh ding in alung himawh pawlkhat in Tedim ah Zomi Donghu Kipawlna (ZDK) phuan khia in dong huhna ding hong don uh ciang in Tonzang, Tedim, Kawlpi, Zangkong leh Malaysia te pan in ih piakzawh zah ih piak ciang in teng 200 val kingah hi.
August ni 7 ni in donghuhna pia ding in Tedim pan ZDK te antang ip 100 leh huhna van tuamtuamte leh mawtaw 4 tawh mi 26 (numei 4) kuan khia uh hi.
Gamgi tun ciang in gamgi kanna (border pass) kumpite’ theihpih in kibawl khalo ahih man in buaina tawm om hi. Pu Paulun Guite (Social Affairs Minister of Chin State) i thukhualna hang tawh mawtawte in gamgi akan theihloh hang in avanteng leh miteng in hoihtak phatak in gamgi kan thei hi.
Gamgi ah YMA (Young Mizo Association) leh ZCS (Zomi Cultural Society) te’n na dawn uh hi. Nitak ciang in ZCS te’ gelna tawh Tonsim (champhai) ZBC biakinn ah hanthotna thugenna nei uh hi.
August kha ni 8 ni zingsang nai 10:00 am in Zomi Donghu Kipawlna tungtawn a Mizoram dongtuak huhna kipia khempeuh YMA te’ khutsung ah thupi tak in apna neithei uh hi. YMA makaite in kawlgam a sanggam te’n hih bang in nong itnate hang un lungdam lua ung ci in khitui mualtuang sa in sang uh hi.
Related: Mizogam Dongtuak Laizom Zosuante Huhna August 8 ni ki apding
ZDK palaite Tonsim pan in nitak nai 2:00 pm pawl in kawlgam lam zuan in hong ciahkikta uh hi. Hih lai ka gelh laitak in Laitui khua tungta uh hi.
Lungdam
Mung Laan Thang
Zangkong
Comment piaknop aomleh...