Mi 136 atuang Boeing vanleng khat Florida luisung ah kiasuk
USA, Florida State sung aom Jacksonville khuapi geinai ah aluang St. John’s River luipi sungah vanlengkhat kiasuk cih Reuters pan kiza hi. Tua vanleng pen Boeing 737 Commercial Jet vanleng namte hi a, asungah akigawm in mi 136 atuang ahihi.
Naval Air Station Jacksonville panin thunei ahi Spokesman khatin agenkhiatna ah tua vanleng pen Friday ni in luipi sungah akiasuk hi ci’n genkhia hi. Ahi zongin kamphatna tawh tua vanleng sungah atuangkha tepen asi kuamah omlo, tuisungah tumsuklo in tuitungah laampingpeng hi.
Vanleng sungah atuang khempeuh nungta in, vanlengzong tuisungah tumsuklo hi ci’n Jacksonville Sheriff’s Office inzong Twitter tungtawn in genkhia hi. Tua vanleng pen Cuba gampan in hong lengkhia hi ci’n Air Station Spokesman inzong pulakkhia hi.
More: Alawmpa Indonesian Lion Air vanleng kia in sikhin himahleh amahguak mopawi bawlveve
Naval Station Guantanamo Bay panin honglengkhia hi a, Jacksonville vanlengtual ah atuksuk ciangin vanleng ataina Runway lampi khengsuak in, luisung ah akiasuk kici hi. Hih vanleng pen bangmah siatgawpna omlo, asungah atuangkha mikhempeuh zong asi kuamah omlo in tuitungah atuahsuktheih nadingin avaihawm vanlenghawl Pilot papen thupi leh siam kisa mahmah hi. Hih vanleng tuaksiatna pen athu aki kanbehsan laitak ahihi. Sawltak #zomidaily
Comment piaknop aomleh...