Amau hangin mikhatin sihlawh cih Thai kuahawm sungah a awkcip tetung kigenpan

Amau hangin mikhatin sihlawh cih Thai kuahawm sungah a awkcip tetung kigenpan

Thai gamsung aom “Tham Luang Cave” kici kuahawm sungah “Wild Boars” kici Footballers mi 12 leh asiapa Coach 1 a awkcip uhciangin aki hotkhiattheih nadingin ki hanciam ngeingai hi. Tuabangin aki hanciam laitak in Royal Thai Navy’s SEAL panin tuipeksiam mahmah Diver Saman Kunan kicipa in anuntakna hong beilawhliang hi.

Tua kuahawm sungah a awkcipte avekin aki hotkhiatkhit hangin amau hangin anuntakna abeilawhliang Diver Saman Kunan ii asihna thupen ki genkhiapah ngamlo hi.

Naupang 12 te leh asiapa pen aki hotkhiat theihkhit akipan zato ah kikem in, alungsim uh puakzawhna aneihtheih nadingleh acidam nadingun limtak in kikemphot hi. Zanni Saturday ni in amau hangin tuisunglutsiam Diver khatin sihlawh hi cihthu aki genkhiat ciangin kuahawm sungah a awkcip mi 13 te khasiathei mahmah in kap ngelhngelh uhhi.

Tua naupang tepen kum 11 panin kum 16 kikalbek hipan uh a, asiapa Coach pen ahihleh kum 25 aphakhin khat ahihi. Amau mi 13 adingin Diver khatin anuntakna abeilawh cih atheih uhciangin amauzong khasia mahmah in, mihoihkhat kasuah nadingin kong kiciamhi ci’n kamciam piakhia uhhi.

Thailand Public Health Ministry permanent secretary Dr Jedsada Chokdamrongsuk in Statement ah agenkhiatna ah Diver khatin sihlawh cih akigen ciangin avek un kap ngelhngelh uh a, akhasiatna leh alungsim thuakna te uh Diver pa ii alim tungah gelhkhia uh cihi. Avek un Diver pa ii alim mai ah lukun ngilhngelh in kapkawmkawm in zahtakna piaciat uhhi.

Anuntakna abeilawh tuisunglutsiam Diver pa ii aminpen Saman Kunan hi a, kum 38 aphakhin khat ahihi. Abeisa July 06 ni in naupangte a awkcipna Tham Luang Cave sungah Oxygen Tank apuakin apai hi a, Oxygen puakin apaipa aciahlam ciangin Oxygen huihdikding tasam in asihlawh ahihi.

Video: Tributes have been paid to Saman Kunan, a former navy Seal diver who died in the attempted rescue of a group of Thai boys trapped in a cave. His body has been taken aboard a C-120 plane to Bangkok and he will receive a royal-sponsored funeral in the coming days. The former Seal died at about 1am on Friday when he ran out of oxygen on his way back to the surface after placing air tanks along the two-mile route to the boys, the current method for refreshing the air supply in the cave.

Thai gamsung a uk makaipipa ahi Thai Prime Minister Gen Prayut Chan-o-cha inzong Saman Kunan ii anuntakna beilawhliang in midangte ahuhnopna pen Thai gambup in mangngilh ngeingeiding hilo hi ci’n genkhia hi.

Tuaban ah Tham Luang Cave alutna amailian ah Saman Kunan ii alim Statue khat bawldingzong ki vaihawm khinta hi.

Saman Kunan pen Royal Thai Navy’s SEAL ah asemngei hi a, 2006 in akhawl ahihi. Tuakhit ciangin Airports of Thailand (AOT) ah nasem hi. Tham Luang Cave sungah mi 13 awkcip cih azak ciangin Rescue Mission ah akihelding in anasep nusia in akuankhia ahihi.

More: A ettehhuai Sangsia khatin acimawh sangnaupang te huhnading bunghawm kaikhawm

Saman Kunan asih azak ciangin Thai King Maha Vajiralongkorn inzong abeisa in aza Sergeant panin Lieutenant Commander ah zakhangsak in, asihna kivuina Cremation Ceremony sumbei khempeuhzong siksak hi. Saman Kunan pen zanni in vuibawlna kineita a, aki vuini tawh kituak in naupangte tungah asihna thu aki genkhia ahihi.

Khangkhat khatveiciatbek akisiding ahihi. Hih Saman Kunan pen anuntakna piakhialiang in midangte huhnopna tawh asi hi a, ettehhuai mahmah hi. Sawltak #zomidaily