Singlamteh na bangci muh hiam? ~ Dr. Pum Khan Pau

Singlamteh na bangci muh hiam? ~ Dr. Pum Khan Pau

India kumpi paidan I et ciangin Christiante ading in suahtakna leh lungmuanna sangin thuakna leh guallelhna lam kimanawh hi hiam aw cih huai hi. Hih bangin khuahun kihei sungah I om laitakin kumsima kizang Good Friday hong tung ahih manin tuni-in Singlamteh (Cross) thu khatvei I lungngai kik ding hi. Singlamteh pen thu umlo mite ading in bawlsiatna, mawhnei mite sihna, gawtna, kosiatna, hamsiatna, pampaihna leh haina ahi hi. Ama nungzui tangtang mite nangawn in zong Singlamteh tungah Jesu a kikhai taktak ciangin zui ngam nawnlo hi.

Kum thum sung a nasepna ah cina a damsakte, misi a thawhsakte, ann a vakte, ama thugen ngainuam a zui kawikawite kuamah in Singlamteh phung dong delh lo hi. Jesu in leitung mite mawhna khempeuh Singlamteh tungah a puakni-in a pa Pasian nangawn in taisan hi. Tua ahih manin Singlamteh pen guallelhna lim hi.

Ahi zongin tua Singlamteh a hihna taktak I muhtheih ciangin guallelhna in a selcip gualzawhna, itna, kiniamkhiatna, thuakzawhna, lungduaina, thukkiklohnate na om hi. Singlamteh na bangci muh hiam? Hih mun ah I lungngaih kik ding nam thum gen pak ni.

Khatna: Guallelhna sungah gualzawhna om cih I mu hiam? Jesu’ gualzawhna in guallelhna lampi tawn hi. ‘Singlamteh Tul Gemgam’(The old rugged Cross) la phuakpa George Bennard in, ‘Singlamteh leh Jesu Khris pen Johan 3:16 sunga kigelh hong kilangkhia taktak a kikhen theilo bangin ka mu khawm hi’, ci hi. Mikhat ading in na nuntakna buppi na piak ngam ciangin tua sanga itna sangzaw omlo hi.

Tua itna pen Singlamteh sungah kiselcip ahih manin thu umlote in mu theilo uh hi. Singlamteh pen Jesu tawh I muhkhop theih kei leh guallelhna bek I mu ding hi. Singlamteh leh Jesu I muhkhop theih taktak ciangin tua Singlamteh tunga kikhaipa’ thuakna hang leh a thuaksak zo ITNA laigilpi I mu ding hi. Jesu gualzawhna in guallelhna lampi tawn hi.

Nihna: Singlamteh nang puak dingin na mu hiam? Ahih kei leh Jesu puak ding bek in na ngaihsun kha hiam? Luka 9:23 sungah. ‘Keima nungzui dingte in….nisim ama singlamteh puatawm in hong zui ding hi’, ci hi. Jesu up ciang pen hamsa khollo napi in Ama’ thuak banga thuak ding pen ol lo hi. Singlamteh puakna pen hih munah thuakna, guallelhna, kosiatna lampite zong I tot hun om ding cih hong ensak hi.

Billy Graham in, ‘Suahtakna pen a khawnkhong (free) ahih hangin nungzuihna in man nei hi’, cise hi. Tua hi eima Singlamteh puakna. A man (price) ding pia ngam lopi-in Jesu nungzui I kisak khak leh khialkha thei hihang. Samuel Rutherford in zong, ‘Jesu Singlamteh pen ka vangik puak lakah a khum pen hi. Vasate kha bangin ka vangik in mailam ah hong paipih hi’, ci hi.

Thumna: Singlamteh kisialhpih taakin na mu hiam? Na kisialhpih penpen Singlamteh ahi hiam? Paul in (Galati 6:14), ‘Ahi zongin keimah in ahih leh Singlamteh tungah I Topa Jesu a sihna thu bek ka kisialhpih ding hi’, ci hi. Tedim (Chin state) a Singlamteh golpi khat Kumpite thupiakna tawh a bul panin hei tawh kitotan in a kiphuktak ciangin laphuak siam ZogamLalpu in na salua ahih manin ‘Ka kisaktheihna, ka angtanna Singlamteh na hi’, cih la na phuak liang hi. A Sakkik tawmkhat:

Min hong simmawh in hong cilphih mahleh,Hei tawh hong phuk in hong haltum mahleh, Kei ading in bel ka kisaktheihna ka angtanna Singlamteh na hi.

Thukhupna: Singlamteh pan a luang sisan leh a kikhai pumpi pen a um lote ading in haina ahih hangin a um mite ading in mawhmaina leh tawntung nuntakna ngahna ahi hi. Ei ading in kumpi tokhom nih om gige ahihna A W Tozer in hih bangin gen hi:

‘Christian khempeuh lungtang ah Singlamteh leh kumpi tokhom om hi. Singlamteh tungah i kikoih masiah tokhom tungah I tu hi. Suahtak ding I ut a, ahih hangin Khris bek a si dingin I deih hi. Eite pen eima kumpi gam sung tek ah kumpi I suak uh hi’. Topa Pasian in Good Friday thupha mimal kim tungah hong pia ta hen… Dr. Pum Khan Pau