Minthanna le manphatna ~ Lian Tuang

Minthanna le manphatna ~ Lian Tuang

1) Nidang lai in nupa khat in tapasal thum nei uhi.

2) A nu le pa mi cithei khat ahih manin a tapa upa pen kiphasak in alawm le gual lakah gilo mahmah hi. A nu le pa zong thusim loin ama thu bek thu sa hi. Thadah mahmah ahih manin a sang kahpihte lakah lai a theilo pen hi den hi.

A nih pa pen a upa zah hi sam loin mi tawh kikhawl thei in lai zong a hai pawl hi sam loin hi. Aneu pen pa leuleu ciangin a u te tawh kileh bulh hi. A nu le pa zahtak mahmah hi. Kiniamkhiat mahmah a, mi khempeuh tawh kiho theilel hi. Nasep thanuam in sanglai zong hat mahmah hi.

3) Tan 10 a zawh ciangun a banban in siavuan pilna ( MBBS ) zom suak deudeu uhi. A u pen kitangval sak in gualnuam mahmah hi. Lai theilualo ahih hangin kumsim in zo to hiathiat hi. Anihna pa zong lai a zo pawl lah hi sam lo, a nangpawl lah hi loin lemlem sam hi. Anau pen in laizo mahmah in nuam sa mahmah hi.

4) Sang a zawh khit uh ciangin mun tuam ciat ah nasem kipan pah uhi.

5) Tua zawh kum 20 khit ciangin atapa u pen siavuan siam in ong minthang vangvang hi. Anihna pa zong kipakta mahmah hi. Ahih hangin minthang lualo hi. Ahi zongin nautumpa pen ong kidawk vet lo ahih manin a pa zong lung hi mawh pian hi.

Apa in “ ka muan pen le ka muanloh pen kum 20 sungin bang hangin kilumleh thei hiam” ci in thu kantelna khat ong nei hi.

6) A u pen pa om na khua ah pai in zato inn a pai masa hi. Zato ah cina luna na dim zihziah hi. Cinate in siavuan pa ngak in om dimdem hi. Cinate kiangah siavuan pa a siam hiam a cihleh cinate in siam lua hi, mi a si dekdek te nangawn dam kik sak zo hi ci liang uhi. A nasepna khua le tuite in zong it mahmah uh a, zahtak mahmah uh hi.

7) Anihna pa om na khua leh zato ah pai leuleu hi. Khuamite in siavuan pa pakta in na zahtak mahmah uhi. Ci na kin in itna nei a, mi zong dam sak mahmah hi ci uhi. Ahun zui in a kiveizel natgual tuamtuamte pen zo mahmah ahih manin a khuamite in muang mahmah hi.

8) Anautum pen om na khua le zato a pai ciangin, zato ah cina na om mel lo hi. Apa zong a dipkua pian hi.

9) Khuamite kiang siavuan pa thu a dot ciangin na thei bilbel uh hi. Khuamite in siavuan pa pen nasep a hiamciam mahmah khat hi. Khua le tui sung a siantho na dingin amah mah makai in khuasung vengsung mun citengah nasem den hi.

Cidamna tawh a kituak ding singgah le anteh tuamtuam mi khempeuh in a neih zawh nading amah mah in hanciam in panpih hi. Ahun zui in mipi kaikhawm in cidamna lam thugenna nei zel hi ci lel uhi. Ka khua sung uh ah cina lua lunalua cih bang a om lua khollo hi mai ci in dawng kik uh hi. Siavuan pa zong thupi ngaihsut lua khollo uh hi.

10) Hih thu teng amuh ciangin apa in mihingte minthanna le manphatna pen khat veivei tonkhawmkei mawk veh ee. Kum 20 sungin thu a kilumleh na hi kei in ahi ding bangin apaipai na hi zaw hi ci in a thukan a khawl hi.

Hih dan pen kipawlna tuamtuam le biakna sung banah mun tuamtuam ah zong a om thei dingin i lam en thei diam. (Mg Kuang Htih ‘ laibu pan letkik in pawlkhat kibehlap hi.) Lian Tuang