Mincip dalnang Vetiver System ~ Pau Do Lian

Mincip dalnang Vetiver System ~ Pau Do Lian

Kawlgam khamtung Zogamte ah tuukhun (rainy season) simin khualzintuak na-ah ihlung himawh pipen mincim (landslide) ahihi. Ih Zogam mualsangtung, tuipi pan pitulguk kim ahihman in guah atamsim in mincim haksatna kituak gige hi.

Khuapi kikawmtuak na hoihleh sumzonna nekzonna nuamtuam a van man zong nuamtuam ahih manin gamkhangto te ah engineer siamte in hoih takin bawl uhhi. Lampi hoih ding cianggeel thei mahle uh mincim lohna ding pen geelhaksa mah mah uh hi.

Alungdam huaithu khatah, Vetiver kici lopakung namkhat om a tua in hawktui hanga mincipna, guahtamluat mana mincipna, leh lampi mincipna te ading in nalianpi sepsak hi. Vetiver, (Chrysopogon zizanioides), Khuskhus zong kici a, Poaceae kung tawh kibang agui/zung (root) in thau (oil) nei a paknam tui (perfumes) inkizang thei hi. Asia gam muntampi te ah kimu thei hi.

Chin Charity saina nuai ah Kawlgam vice president Van Thio in Australia a om Chinmi tekiangah “nagam leh namipih te uh na it uhleh hih semun” ci in vaikhak a, tua mahbangin Australia a om Chinmi te in Chin state sungah hih Vetiver lopa kung suan kipan ta uh hi. Hih lopasuan na ii ngimna in, highway, lamlian pite minciplohnang ahihi. Amakai khat uh ahi, Renny Ceu L Mang genna ah

• 1. HBA kung 2500
• 2. HBC kung 2500
• 3. Zion kung 2500
• 4. CARD kung 2500
• 5. Dawrlun sangkung 2500
• 6. KHuahlun sangkung 2500
• 7. Tedim kung 2500
• 8. Matupi kung 2500
• 9. RC huang Haka 1200

Leh akisam lai ding 1200 cihbangin semkhia uh hi. Tulai tak Myanmar Vetiver Network makai, U San Win in Surbung (Chin State Airport) vanleng tualpi geei akho/kipnading in asuan laitak ahihi.

Vetiver lopa kung suanna hangin mawtaw lampi phung’ (wall) sang leikiplo namunte, leisaihangin mincipbaih nate ah kisuanleh alopa zungin thukpitak leisungah tum ahihman in leikipsakzo hi. Thapnamtao khuaneu, southern Thailand ah kisin ngeihi.

Tuakhua neu omna pen buannawng leh mincip nahang in alauhuai namun hi a, vetiver lopakung lampikenna (slopes) te ah sin uh hi. 1993 kipan Vetiver system Thailand highway te ah zanguh a, sumtawm bei leh ahoihpen in ciamteh uh hi. (Sanguankaeo et al., 2003, 2006, 2011) Leikhauh akisapna lampite adingin vetiver lopa kung in hoihsakzo hi.

Guahtam theihna (high rainfall) leh singkung omnawnlohna (deforestation) munte ah lampibek thamlo inn mincim, nangawn tampi omhi. Abeisa 2015 lai in Chin state, Khamtung ah tuicin tung kici a ataktak in mincipna hang hizaw hi.

Guahtam nakhempeuh mincim hituan lo in leinipna leh akenna (slope) munte ahihi. Tuabang mun ateng Zomi te adingin azat huai vetiver ahihi. Kawlgam Vetiver vaisai U San Win kiangpan information acingin kikan thei hi. By Jeffrey Pau Do Lian