US Police te’n vanlengsung panin Passenger khat taalkaihkhiat leuleu

US Police te’n vanlengsung panin Passenger khat taalkaihkhiat leuleu

US Police Officers te’n vanlengsung panin Passenger khat taalkaihkhiat leuleu uh ahih manin, tulaitak Social Media ah kimawhsak mahmah leuleu hi. Southwest Airlines vanleng sungah aveisa Tuesday ni in thupiang ahihi.

Tua Passenger numeinu in vanleng sungah ui 2 aki lutpih amuh ciangin vanleng nasem Crew te samin, ganhing tawh kakihua, Allergic kanei ci’n genkhia hi. Tua ahih manin hih ui te vanleng sungah tuangsakkei un, hemkhia un ci’n gensak cihi.

Ahi zongin tua numeinu in ganhing tawh akihuatna Allergy aneihlam pen lahtheihding bangmah laidal Document neilo hi.

Tua numeinu pen ganhing tawh kihua ing acih ciangin vanleng nasem te’n vanlengsung panin paikhiat saksawm uhhi. Ahi zongin amahpen paikhianuamlo a, tua ciangin Airlines Crew te’n palik te sam uhhi. Tuaban in buaina akipan ahihi.

Police Officers te’n tua numeinu pen vanlengsung panin akaihkhiat laitak Video kizaih in, YouTube ah ki khahkhia ahih manin, Netizens tampitak in hih buaina vaipen mukhapah uhhi.

Video sungah tua numeinu pen vanlengsung panin hepkhiatsawm uh a, Officer khatin amaipan kai, anungpan khatin sawn cihbang in thagum tawh hepkhiat sawmmawk uhhi. Tua numeinu pen kumnuam hetlo a, ka bombi tolhkhia ci’n bawlzelphot, tuakhit ciangin Police Officer te’n pummatzel in ki kaikhia vanvangeuh uhhi.

Tua numeinu in amahleh amah “Professor khat kahi ci’n genkhia a, hong khoihkha kei un ci’n awnglala himahleh palik te’n thudonlo in mancip tinten uhhi.

Video: Southwest Airlines passenger dragged off plane after complaining about dog allergies

Hih numeinu in ui leh ganhing tetawh kilemlo, Allergic nei ing acih manin, vanlengsung ah tuangsaklo in palik te samin thagum tawh aki hemkhia himawk hi. Ui ki hemkhialozaw in, mihing kihemkhiazaw hi. Mihing sangin ui thupi kisazaw ahi maidiam 🙂

Hih numeinu pen Baltimore panin Los Angeles azinsawm hi a, azingciang apa ki atding, Surgery kibawlding ahih manin, vanlengsung panin akumkhia nuamlo cihi. Tuaban ah hih Southwest Airlines vanleng lobuang, Los Angeles zuanin alengding vanleng adang tuanitak omnawnlo ahih manin, azingciang apa Surgery kibawlna ah omnuam tentan ahih manin, vanleng sungpan akumkhia nuamlo kici hi.

More: United Airlines te’n Passenger khat taalkaih khiatgawp ahih manin mipi so ngeingai

Tukum April khasung inzong United Airlines te’n Chicago ah pasal khat vanlengsung panin taalkaihkhiat uh a, anakbang siluang neinailiang hi. Tua kaihkhiat athuakpa pen Asian gammi khat ahihtawh kineubawlna ci’n ki ngaihsun a, United Airlines leh Police Officer te kimawhsak mahmah hi. Nungdiak inzong Georgia sanginn huangsung ah palik te’n sangnaupang khat kaplumziau uhhi. US Police Officer tezong….. Sawltak #zomidaily