USA gam, Georgia State, Atlanta khuapi a teng Pa Pau Do Mang (Samte beh) leh Nu Ngai Lun Cing ( Gualnam beh) ten a it mahmah a tapa uh Tg. Cin Lam Mung kum (35) in April 27, 2016 (Wednesday) ni zingsanglamin lamethetloh laitak atenna Atlanta khuapi panin aleitung nuntakna ong beisanvat cihthu izakmanin Zomi Innkuan USA kipawlna in nakpitakin kidahpih hi.
Tg. Cin Lam Mung pen Zogam, Tedim uksung, Haupi khuami, Lawibual veng Tedim khuapi ateng hi-in pianpih unau numei 1, Pasal 4 lakpanin a nautumpen zom ahihi. Leitung nutak khuasakna a nuamzawding lunggulhnatawh a beisa 2014 kumin USA gamsung a upipa Pa Pau Sian Tuang leh Nu Zen Lam Vung (Golden Land) Zosai neite tenna Atlanta khuapi ah nulehpa tawh ong tungkhawm uhhi. Nulehpa unautengtawh nuntak khuasak a noplaitak, Pasianthupha asimlaitak uh khangdawnglaipi a hicibanga ong nusiat vatmawkpen idipngekna in ikhasia mahmah hi.
Tg. Cin Lam Mung pen USA ongtuncil a kipanin nulehpa innkuanpih tengtawh Zomite kipawlkhopna te thupisa in atennakhua Atlanta khuapi bulphuh Zomite kipawlna Zomi Innkuan Atlanta kipawlna ah pawlmi kiciankhat nasuak uhhi. Tuabanah USA gamsung Zomite minamkhat, sikhatsakhat unaulaizomkhat hihnatawh sihna vaiah luang kiphamna ZIUSA Genvai ahzong active memberkhat ongsuak uhhi. ZIUSA Genvai pawlmi kiciankhat ahihna dungzui-in Zomi Innkuan USA kipawlna in Genvai sumsungpanin luangphamna sum $ 10,000.00 (Tulsawm) kipiakhia dinga paakkual hoihmahmah khattawhzong mangphakhakna kinei ding hi. A tunga luangphamna sumtepen USA gamsung khuatuamtuam, statetuamtuam pana ZIUSA Genvai thukhunpom Zomite kidonkhop, piakkhiatsumte ahihmanin hibanga Vaphual lungsim neia a kihuai tangtang Zomi minama ipiankhakzong dahna, lunglenna kawmkalah I angtang mahmah hi.
I sanggampa Tg. Cin Lam Mung tawh a nunungpen hunzatkhopding pen ongtungding May 01, 2016 (Sunday) ni sun 12:00 hunin, Floral Hills Funeral Home and Memory Gardens, 3150 Lawrenceville Hwy, Tucker, GA 30084 ah Atlanta bulphuh Zomite pawlpi lian khat ahi Bethel Mission Church pawlpite makaihna tawh hunbawlna leh hanmualah daitansakna/vuina kineiding hi. I sanggampa ong nusiatna hanga adahakap, alungleng khuangai pianna nulehpa, sanggamlaizomteng, meltheih tanau khuapihtuipih khempeuh tungah ibiak vaanglian Pasianin mihingte kipiaktheihloh alamdang hehnepna, lungnoptawldamna ongguatsak ciattahen cihthu kongngetsak uhhi.
Dahpihna lianpitawh
Executive Committee
Zomi Innkuan USA
April 29, 2016
Comment piaknop aomleh...