Zanni Saturday (27 August) ni in Indonesia khuahun pilnanei Meteorology, Climatology and Geophysics Agency te genkhiatna ah Malaysia leh Singapore gamsung ah tawlkhat meikhu kithuak laiding cih uhhi. Hih meikhu pen Indonesia gamsung Sumatra kuamsung ah gamsung meikatna panin hongkipan hi a, hih meikatna tawh akinai in aomkha Malaysia leh Singapore gamnih in meikhu athuakkha hidihdih hi.
Hih meikatna panin huih in meikhu te hongmut pheikha ahih manin akiim apam ah meikhu hongkizel kawikawi ahihi.
Sumatra kuamsung ah meiphelhding in Agency te hanciam mahmah uh a, ahi zongin ki phelhkhinzo pakloding ahih manin, ni 5 sungbang buaipihlai khading uh cihi. Tua ahih manin ni 5 sungbang Malaysia leh Singapore gamnih in meikhu ki dikdiklai khadingdan hihtuak phot hi. Ahi zongin hihpen khuahun tawhzong kisai a, guahkhawng hong zugawp bilbel lehzong meikhu te vengkhiabaih leuleu dinghi.
Ih Zogam lamah lo ihkhawh ciangin lohal, gamhal ciang meikhu ki thuaklah luakhollo himahleh hihlam ah meikhu atamluat ciangin ki thuaklahthei citciat hi. Meikhu tam ihdikkhak ciangin ihgawlsung keu in, gawltaak lela theihi. Tuaban ah mitsip in khuhsuak sawnsawn a, thuak hamsa simsim hi. Adiakdiak in naupang ngeklai te hehpihhuai mahmah uhhi.
Cidamna lam atheite’n hihbanghun ciangin innsung ah omcip hoihzaw a, tui tampipi dawnding hoihhi ci ahih manin, eizong kidopsiam sawmciat ni. ZD Sawltak #zomidaily
Comment piaknop aomleh...