Minam hong kaikhawm thu 3 ~ Khup Zo Mang

Minam hong kaikhawm thu 3 ~ Khup Zo Mang

Mun tuam gam tuam a om pilna sin, sum zong, peemta khempeuh le gam sung a teng khempeuh hong kaikhawm thu 3 om a, tuate in

1) Siamsinte hong makaihna

1998 kum in Sakollam veng a om Tedim Sangpi pian zawh kum 50 Golden Jubilee hi, tua hun in biakna makai, gam makai, sum zong sum hau tampi kikaikhawm in sang huang sung tennis court gei ah Jubilee Hall lam ding thukimna om a, gam ukte vaihawmna kilaih kawikawi ahih manin tuni dong a mun kisit lai hi, Siamsinte in minam hong kaihkhawmna taktak hi.

2) Biakna Siate hong makaihna

November 2010 sungin Tedim gam Tapidaw hong tun zawh Centenary Jubillee (kum 100) pawi kibawl a, biakna siate in hong kaikhawm in pilna lam, gam ki ukna lam, gam sung gam pua peemta a om mimal khempeuh hong gawm khawm in Cope Centenary Hall min pua Tuiphumte zum huang sungah hong lam pih uh hi, biakna siate in minam hong kaikhopna taktak hi.

3) Cidamna Siavuante makaihna

March 2020 sungin Tedim gam ah Covid 19 natna hong tun ciangin Siavuante makai in Tedim gamuk zum tawh nasep hong kipan uh a, zum nasem khempeuh, khua sung khangno khempeuh, khua sung hausate, khua sung upate hong kaikhawm hi.

Tua ban ah Media tawh nasepna hangin ICU building, Oxygen Plan, Generator cihte dong ah neih ding ngaihsutna om a, khua sung upate, mun tuam gam tuam a om peemta Zomite kipum khatna hangin mitmuh theih dingin a thu le a van kizom toto lai suak hi, cidamna siate in minam hong kaihkhopna taktak hi.

Tedim khua kisat zawh minam hong kaikhawm taktak hih thute mah hi pen ding hi, tua ahih manin kuakua a makai zongin sum le paai, ngaihsutna, le thatang tawh mapang khawm minam ih hih lam mangngilh lo in, a beisa thute tung tawnin hanciam semsem ding, lunggulh huai kasa mahmah hi.