Milim biakna Nam nih ~ Evan. Suangh Dal

Milim biakna Nam nih ~ Evan. Suangh Dal

1) Hosea 4:12 “Ka mite in aisan-in singthem peuh thudotin nei uh a,…” 2) Kolose 3:5 “… Nulepa mawhna, a kilawm lo gamtatna, hukna lanna, a hoih lo lunggulhna, milim biakna nam khat ahi iplahna leh huaihamna”.

Milim biakna = Idolatry

Pasian’ thukhenna a kithuakna bulpi khat ahi Milim biakna:
Khangtangthu Nihna 7:22 “…Banghang hiam cih leh Topa amaute’ Pasian nusia uh a, pasian dangte pom uh a, tuate bia-in a naa na sem uh hi. Tua ahih manin hih bang siatna amaute tungah tung sak hi.” – a cih bangin milim biakna hanga mawhna thamanh pen mimal level, nupa level, innkuan level, unau khat level, behkhat level, Pawlpi khat level, khua khat level, minam khat level, gam khat level-in a kithuak hun om-a, COVID=19 pen leitung bup (world) level-a i thuak Pasian’ thukhenna khat ahi hi. (Natna na ngah pah loh hangin lockdown hang beka na hehna zong thuakna khat hi pah hi).

Damkik nading (God’s Remedy):

Khangtangthu Nihna 7:13-14 “…ka mite lakah natna katun sak ciang ahi zongin, keima’ min-in ka sap ka mite amau mahmah kiniamkhiat-in, thu ngenin ka mai hong zonga, amau gitlohnate panin a kihei uh leh keimah in vantung panin ka za ding a, amaute’ khialhna mai sakin a leitang uh ka hoih sakkik ding hi” a cih bangin kiniamkhitna tawh thungetna en dih ni.

1. Kiniamkhiat: kiniamkhiat cih ciangin thagum suang-a a pua tham kiniamkhiat tat gawp nam hi loin, minam thupi sak-a minam ngeina, minam vaite, le leitung vai ahi Myanmar idol, American idol cihte ciing-a Christian te mahmah in biakinn sung dongah tun-a mihingte kilaitatna, kiphatsakna, minthan kidemna le i gualnop luat, ei le ei ih kilapsang nop gawp gamtatnate zom nawn lo-a khawl kiangna tawh Pasian’ deihna phatak-a kan kikna pen kiniam khiatna hong hi ding hi. Milim biakna (idolatry) hi kei ci-in na kawikaih kaih teitei leh a kiphasak mahmah lai na hi hi.

2. Thu ngen: Pasian in mihingte na khat peuhpeuh hong piak ding teh a kisam van (means/medium) khat hong kal masa den hi. Hotkhiatna thu ah upna kisam sak hi. Upna thu hawmthawh ci zaw ding maw, upna khengval cizaw ding maw-a gamtat hanciamna khempeuh milim biate tawh kibatna suak pelmawh ding hi. Mawhna a mai theih nadingin thungetna kisam sak hi.

Pasian in kisam a sakte behlap-a gamtatna pen milim biakna kaai gamtat piang hamtang hi. Pasian in upna kisam sak bek napi up theih nadingin milim bawl-a tua tungtawn-a Pasian biakna pen milim biakna ahi hi. Thu ngen in a cih nung sang nget ding hi lel-a milim bia Kawlte banga khitang khinkhin pen behlapna hi-a milim biakna nam ahi hi.

Eimau bek thu ngen, eimau teng ii thu ngetna hang beka vai a veng banga kigenna zong kiphat sakna ahi hi. Pasian in thu ngen un a cih man-a thu ngen ihih lel ding pen kiniamkhiatna ahi hi. Na thu ngetna lim khawng uh a kisam kheng valin post mun luat, gen mun luat pen milim biakna vai pian ahi hi.

I inn sunga i TV zong i idol hi thei hi. Korea zatlan zong na idol hi thei hi. Mi khat thupi sa lua-a hai lawh si lawhna zong idolatry milim biak vai ahi hi. Pawlpi biakpiak zia ah thuhilhna (preaching) hong lunggulh sak lo ding music gin, mei colour tuamtuam, kilahna show tuamtuam te zong idolatry vai hong tun hi thei hi. I Zomi Idol khawng zong biakna vai lel khawng i suah gawp leh idolatry ahi hi.

Thu ngetna ah zong i thungetna Pa sangin i thungetna khawng suan le muan-a i neih khak leh idolatry milim biate zia hong tun thei hi. Pawlpi Sya pipi aisan theite, milim tawh kikopte, thungen thei a cihte uh le thusuak kamsang kineihte khawng thudot pi-a na neih leh idolatry talpi khat na hi hi.

Milim biakna tawh Pasian hehna ka piang sak hiam ci-a a tunga i Lai Siangtho mun nih tawh kisittel-a Pasian zia ahi khinkhian ziau pen ah kihei kikna pen kisikna maan hi-a kisikna maan piang leh mawhna mai-in i leitang hong hoih kik ding hi. Amen! Evan. Suangh Dal – Zomi Daily