Mihing’ vai khempeuh

Mihing’ vai khempeuh

Politics sangin Lungdamnathu mah in mihing vai khempeuh huam zaw, van zaw hi. Lungdamnathu the gospel nuai-ah politics maantakin a om dingin kinuaisiah thei-a politics nuai-ah Lungdamnathu kinuaisiah thei ngei lo hi. Christian te tampi takin politics mah in a huamzaw, a van kim zo zaw, a khitmi (ခေတ်မီ) zaw sa lai zang uh hi. Politics a ထင်ကြီး keei pong mawk uh.

Minam vai zong politics bekin a lamsang zo dingsa uh a, Lungdamnathu the gospel pen neumuh (အထင်သေး) pian uh ahih manin Christian minister pawlkhat bang Lungdamnathu lah paikhia ngam tak sam lo uh ahih manin Church Pastor khawng sem kawmin politics le minam vai lam iplah zaw lawmlawm thong uh hi. A Pawlpi vai pen gen taksa loin, minam vai le politics vai a sai zawhna in na khat peuh a huam zo zaw sa den uh hi.

Minam a piangsak Pasian ahih hangin Pasian pen minam pai loin mimal paizaw hi. (Individual conversion).

Minam le Pasian kikhen thei lo mah-a ahi zongin minam in Zomi le Chin cihte kikhensak, kideidansak, kipawl thei lo sak tawntung hi. Lungdamnathu in hong gawm hong kilemsak hong kipawl thei sak ngei zo hi. I Pu Hau Go te, i Pu Kam Khaw Thang te le Zogam missionary Mangkangte hun lai khawng. Let’s go back to the gospel. Tua ahih manin Zomi le Pasian kikhen thei lo a, ahi zongin Zomi le Chin i khen pen piang vet lo hi.

Lungdamnathu pen politics le minam vai i suah luat hang ahi hi. Politics minam makai khat in Lai Siangtho a tawi pen hoih tawntung a, Pastor Rev khat in politics le minam vai thuah-a makai ut luat hoih ngei lo hi. Topa Jesu a sih laitakin biakinn sunga minam kideidanna puan (ကုလားကာ) a lu panin a taw dongin kikek giapin phelnih suak hi (Matt. 27:51).

More: Hamsa i sakna bang hang? ~ Evan. Suangh Dal

Tua ahih manin Jew mi le Gentail mi, sila le sila ahi lo, numei le pasal, cih bangin minam deidanna om nawn lo a, thu-um mi khempeuh Khrih sungah a kibangkim ahi hi (Gal. 3:28). Mihing’ vai khempeuh politics sangin Lungdamnathu the Gospel mah in huam zaw hi. Evan. Suangh Dal