Mihing te bangtawh kinungta hiam? ~ Job Cinpi

Mihing te bangtawh kinungta hiam? ~ Job Cinpi

Laisiangtho sungah, “ Mihingte nuntakna in an le tui bek hi loin Pasian kammal thutak tawh nungta uh hi,” na ci hi. Ka gennop mihing nuntakna pen hih thu tawh kisai ahi kei hi. Ka gennop thei in, mihingte pen ngaihsutna khuak tawh kinungta a hiam, thuakna lungtang tawh kinungta hiam cih a gen muam ka hi hi. Hih thu nih pen tu hun mipil thulungngaite buaipih thu khat ahi hi. Bang hang hiam cih leh mihingte in pilna le theihna nung zui uh a, pil ding siam ding le theih ding thupisak uh hi.

A tomin gen ding hi le’ng piakkhiatna nangawn lungsim tawng pan phalna tawh pia nawn loin piak ding hoih hi cih khuak tawh theihna hangin piakhia uh hi. Hehpihna lungtang tawh mi huh loin hehpihna nei a kisak ding utna bek tawh huhna pia uh hi. Ngaihsutna khuak lam bek zangin gamta uh hi.

Lai a sim uh ciangin zongin lungsim thapiakna lam sangin pilna theihna ngah nading thupisak zaw uh hi. Leitung thu thei nuam uh a, mihingte thu thei nuam lo uh hi. Mihing thu a thei nuam sunsunte in zong mihingte lungsim a thei nuam hi loin mimintangte silh le ten, a nisim nuntakzia uh, a nek a dawn uh, a duh a deih uh, cihte thei nuam zaw lai uh hi.

Tua nu mintapa in tua puan deih, tua mintaminu in tua puan deih, tua nu le tua pa kingai, ci-in midangte gamta luhekte thei nuam uh hi. Khial uh hi ka ci nuam kei hi. Ahi zongin mi pawlkhat in tua pen thutheihna bangin ngaihsun kha uh a, tua bang thu tampi a theihna uh hangin a pil ding, thumu ding le phattuamna a om ding sa kha uh hi. Tua hangin ken khial ka sak loh hangin khialhna a ngaihsutna uh a khial ahi khin hi.

Gualzawhna ngah nadingin khuak lam tawh kisai hanciamna a kisam thu theihna tampi zongin sin uh hi. Sin pilna a tuamtaum sin uh a, a khuak uh pil mahmah hi. Ahi zongin Gualzawhna bulpite lakah khat ahi thumanna le cihtakna pen a lungtang sung uah om lo thei hi. Khuak pilna lam thulisam lua uh ahih manin pilna nei napi deihsakna nei lo uh hi. Pilna nei uh a, khualna nei lo uh hi. Pilna nei uh a, zahtakna nei lo uh hi. Pilna nei uh a kiniamkhiat thei lo uh hi. A khuak uh tai lua mahmah ahih manin a lungtang in pha zo lo hi.

A zenzenin tua bang mite makai-in hong o kha uh leh a baisa kum sawmnga sunga hong uk Kawmgam kumpite mah bang ding uh hi. Tua bang mite nu le pa dinmun hong tung uh leh a tate uh pilna bek tawh thu hilh ding uh hi. Nu ahihna pa ahihna uh tawh a tate uh a it a khual theih ding hangin a tate uh itna khualna neisak zo lo ding uh hi. Tua hi leh a tate uh a nu a pate mah bangin itna khualna nei lote suak ding uh hi. Pil lua kisai siavuan siamah semin kumpi zumte ah nasep hoih semin khasum tampi sang napi a nu a pate le a sanggam a u a naute don nading lungsim a nei lo, a don nuam pha lo mi na mu kha ngei ding hi.

A khuak uh a hoih lo ahi kei a, a lungtang uh a hoih lo ahi zaw hi. A nu a pate in a khuak lam tathiamsak napi a lungtang puahphatsak lo uh hi. Pilna nei lo napi innteng nasep tawh a nu a pate a don a khoi mi na mu ngei ding hi. A khuak uh hat lo ahih manin a khuak in a lungtang uh makhilh lo uh hi. Tua ahih manin ngaihsutna khuak sangin lungtang puahphat huai zaw hi. A nih in a puahpha theite a hoih hi a, a zenzenin pilna siamna nei keng, ka hun in cin nawn kei a cite adingin a lungtang puah pha leh khuak hoihte sangin a manphat zawkna mun tampi om lai veve ding hi.

Khuak tawh a nungtate a lung uh nuam ngei lo ding hi. Lungtang tawh a nungtate a khuak uh tawldam ding hi. A thupi khat om hi. Khuak zang lo a, lungtang bek zaw ding a hoihlohna mun om thei hi. Gentehna, deihsakna tawh mi khat thuhilh hi napi a khuak pil lo ahih mani a kammal zat ding a kilawm lo, ama kampau dinga kilawm lo kammal khat tawh thuhilh kha ahih manin a thuhilhte’n mudah mahmah thei hi. Khualna tawh a theih ngei loh mi khat a inn uah zin tungsaka a zinpa pen zatui zuak ahih lam thei lo hi.

Palikte in a zinpa man uh a, amah zong a kipawl hi ci-in thong khia uh hi. A zinpa in palikte kiangah, ka zintunna pa na a sem ka hi hi, kei hong sawl hi a, ama khut nuai a nasem ka hi hi, ci hi. Lungtang bek tawh nuntakna zong khat veivei kidongtuak thei hi. Tua ahih manin mipilte in khuak pilna le lung pilna pen ton khawm den le hoih pen ding hi, ci uh hi. Lungdam, Job Cinpi (Zomi Laisim Nuamte)