Mihing nuntakna ah a omthei thute

Mihing nuntakna ah a omthei thute

Dumde pen atang hangin mei hilo hi. Thuman tawh akibang thumanlo omthei zel hi.

Hong kizakta hi loin hong kilau thei aa, Zi zo akisa papite a zite in thuaklah mahmah uh hi.

Gual lel mahmah napin mi muhna ah gualzo abang ki omthei aa, Mite muhna ah zizo mahmah abang papi te zipil aneite na hizaw uh hi.

Itna thu kigen thei tek aa, Itna nei taktak ding mi hamsa hi.

Upna thu kigen thei tek aa, Ih genthu a nuntakpih mi kitawm mahmah hi.

Vangam nopzia dingthu ih lim gen mahmah aa, Tu le tu a tungnuam kuamah ih om kei hi. Job Thawngno in ci hi.

Lamdang mahmah kasak thu khat om aa, it theihna leh muhdah theihna ahihi.

Akimu ngei vetlo nungak khat leh tangval khat kimuh lian leh kingai tuah thei lian na pin, Tua te geel sungpan piang unau laizom pen kidang tektekin a nunungah kimu dahin kilangdo thei lai uhhi. (Jacob leh Esau)

Guah azukteh uiphuk a lungdam aa, Khua aphat teh thankhik a lungdam leuleu hi.

ngaihsutna kituaklo mi nih lungdam khopsak ding hamsa hi. Satan lungdamna ah Pasian lungdamlo aa, Pasian lungdamna ah Satan lungdam lo hi.

Khat adingin mehlim mahmah pen, Adang khat adingin gu na hi thei hi.

Sensi leh tangh natna vei te Vokthau ne leh hoih thei aa, Sikhan leh adang natna pawlkhat adingin Vokthau nekpen lauh huai mahmah zel hi.

Na lungdam ni in nui pahlala samkenla, Na dah ni in zong kap pahsam kei in

Mihing nuntakna tuihual bangin apaipai hi a, aniam namun leh asanna mun kilaih to ngekngek sa in luangluang hi.

Na gual lelh laitak gualzawhna in hong ngak aa, Na gualzawh laitak na mai ah niamkiat theihnang haksatna in hong ngak thei hi.

Mihing nuntak hun tom mahmah napin, Lupmun tungah ih damloh ciang ni khat zong hunsawt kisa mahmah hi.

Zingteh asih pah dingbang in thugen kamsoi in… Kum 100 nungta ding bangin nasemtek leng ki it kingaihna leh nuntak nopna khang ding hi. Rev. Mang Ngaih Cin