Thupulakna: Washington DC Khuapi a Lungphona Lawhcing

Thupulakna: Washington DC Khuapi a Lungphona Lawhcing

September 9, 2015
1. Zomi Innkuan USA kipawlna Board of Directors pawl thukimna bangin;

(a) India gam, Manipur gamkee, Zogam sung a om Singtangmite in a kisuhkhiat sawm Zogam leitang, a thuneihna leh Singtangmite dinmun ahu dingin taangpi taangta in lungphona a bawlna tawh kisai Zomi Innkuan USA kipawlna in a thukimpihna thu,
(b) Minam thuneihna leh, gam leh leitang a’ding in a nuntakna apiakhia, Manipur kumpite gamhtatna khutlum hangin mual hong liapsan laizom sanggam, Zogam Salphate Zomi Innkuan USA kipawlna in a zahtakna piakna leh Zogam Salphate’n a nusiat a innkuanpihte a kipan, a laizom sanggam u leh nau khempeuh tawh akibang in Zomi Innkuan USA kipawlna akidah mahmahna thu pulakna.
(c) India kumpi in Manipur gamkee kumpi tatsiatnate manlang takin khaktan in, lungphona abawl khangnote a khutlum tawh a thatlum galkap migilo teng mawhsak a, akilawm bangin thuumna leh lutna abawlna ding thu,
(d) Manipur gamkee innpi (State Legislative Assembly) in Singtangmite tawh kisai thute Singtangmite deihna thusimlo, konlawhlo in thu akhunsim sawm uh anuai a Thusunte (Bills) pen Zomi Innkuan USA kipawlna in Singtangmite tawh a kibangin kisang theilo a hihna thu;

Executive Committee makaihna leh Zomi Innkuan DC kipawlna innteekna tawh September 8, 2015 ni, zingsang lam nai 9:30AM pan sun lam nai 11:30AM kikal sungin, Washington DC khuapi a om India Embassy zumpi ah “Singtangmite dinmun leh thuneihna, Singtang gam leh leitang tawh kisai Lungphona” lawhcing takin kibawl zo hi.

2. Manipur gamkee sung a om Singtangmite leh Zomi Innkuan USA kipawlna in a thukimloh Thusun (Bills) teng in anuai a bang ahi hi.
(a) Protection of Manipur Peoples Bill, 2015
(b) Manipur Land Revenue & Land Reforms (Seventh Amendment) Bill, 2015
(c) Manipur Shops & Establishments (Second Amendment) Bill, 2015

3. Hih Lungphona ah gam leh minam a it innteek Zomi Innkuan DC kipawlna Makaite, Upate, Pawlmi leh US gam sung mun tuamtuam pan Zomi Innkuan kipawlna Makaite, Tangmite leh Pawlmite, mimal vekpi (100) kiim kikuan a, picing mahmah, thutak mahmah hi.

4. Lungphona sung ah, Zomi Innkuan USA kipawlna in India gambup President-pu tung ah Manipur gamkee sung a Singtangmite dinmun leh thuneihna, Singtang gam leh leitang tawh kisai thute Laipi (Memorandum) phah in, lungphona kibawl nuam ahih manin, India kumpi tang’a tu Ambassador tawh maitang kimuh theihna ding hun kingen a, ama tang’in Public Affairs Minister in limtak in hong sangin Laipi kiphah thei a, thu leh la vuicing takin kikuppih thei hi.

5. India President tang’a hong pang Minister-pu tawh kimu dingin Zomi Innkuan USA kipawlna tang’in, President Pa Do Khan Khup, General Secretary Pa Go Sawm Khup leh Zomi Innkuan DC kipawlna Thudotpi Pa Ngocinthawng Suantak, Makai (3) teng India Embassy zumpi sung ah kikuan thei hi.

6. India Embassy Minister-pu tawh kimuhna ah, tu laitak a Manipur gamkee sung a Singtangmite dinmun leh thuneihna, Singtang gam leh leitang tawh kisai Laipi phahna thu leh Lungphona thu teng, tang khatkhit tang khat, thu khatkhit thu khat, limtak in hilhcian in thu kisung thei hi. Minister-pu in Laipi sung a thu leh late khempeuh a neng a tawngin hong dongkik a, na Laipi leh Lungphona uh kician takin ka tel sinsen a, hih Laipi leh Lungphona thu khempeuh India President-pu tung ah peello ka puak ding hi, ama khut sung a tuna dingin keima mawhpuak ahi hi ci in kamciam hong pia hi.

7. India Embassy Minister-pu in Zomi Innkuan USA kipawlna pan a kiphah Laipi (Memorandum) leh Lungphona tawh kisai ahong teldotkik thuthukte anuai a bangin kicing takin kikuppih thei hi.

(a) Bill Khatna tawh kisai in bang hangin Inner Line Permit (ILP) pen Singtangmite in pom theilo ahi hiam, hih ILP tawh kisai thukhun kikipsak hileh Singtangmite ading bang hamsiatna om ahi hiam ci in thuktak in hong dong hi. Hih thukhun kikipsak hileh Meitei minamte tawh a kibang peuhmahlo Singtangmite pen abeimang dingin geelna hi a, Meitei minamte hamphatna pen Singtangmite manthanna hong suak ding hi. Meitei minamte deihsaklohna hi zawlo a, Singtangmite dinmun leh thuneihna a beimang ding kiphallo hizaw hi cih leh, Meitei minamte in hih ILP tawh kisai thukhun kipsak nuam uh ahih leh Singtangmite a manthanlohna dingin Singtang gam teng pen Meitei minamte tawh akisailo, atuam vilvel ki-ukna leh kivaipuakzia a kipan, Self-Determination bukim piakkhiat ding a kideihna thu kihahgen thei hi.

(b) Bill Nihna tawh kisai in Leitang thukhun puahphatna kikipsak hi leh Singtangmite a’ding in bang supna om ahi hiam, Singtangmite in Manipur gamkee sung a sungtang gamteng bang hangin phallo ahi hiam, hih leitang pen kua a’ ahi hiam, bang hun a kipan Singtangmite in luah ahi hiam ci in hong teldotkik, ahihkei leh hong sittel ahih manin, British kumpi in India leh Burma gamte ahong nuaisiah hun laipek a kipan Zogam leitang pen Zomi-te luahsa gam a hihna thu, 1951 kum a Kisimna a kibawl ma hun, British kumpi in Demarcation a bawl hun laipek in Manipur gamkee sung a Zogam leitang tung ah Zomi-te in hausa upa sem in thuneihna kineikhin a hihna thu, Meitei minamte in Singtang gam teng a deihgawh manun thukhun tuamtuam bawlin a suhsawm uh a hihna thu, hibang in minam khat leh khat kisimmawh in gam leh leitang kituh a gal leh sa in kineih ding dinmun a tun pen leitung buppi ah Democracy gam thupi pen ahi India gampi ading kilawm peuhmahlo a hihna thu dong sutin kidawng ciatciat thei hi.
Hih thu tawh kizom in, Zomi Innkuan USA kipawlna pen United Nations huang sung a Economic and Social Council khut nuai ah Consultative Status anei, tualsuak minam (Indigenous People) khat hihna leh Civil Society Organization picing khat a hihna limtak in kihilhcian a, Singtangmite tawh kisai Laipi leh Lungphona thute pen UN zumpi ah peello kipuak ding a hihna thu kitheisak hi. Zomi Innkuan USA kipawlna pen hih ciang dinmun tungzo a hih manin hong angtangpih mahmah ung ci in, kamkhum tawh hong dawng hi.

(c) Bill Thumna tawh kisai in sum leu sumzuakna vai hi a, Singtangmite inzong suakta takin sumlei sumzuak thei ding hive’n, bang hangin hih thukhun lungkimlo nahi uhhiam ci in, hong hemdot teitei hi. Singtangmite pen India gambuppi bekhilo, Manipur gamkee sung mahmah ah a citawm zaw a hih manin, leitung ah namneute leh nampite, citamte leh citawmte in a septheihna kikim hileh leitung buppi ah Sen mite in sumlei sumzuakna khempeuh ukcip khinzo ding uh a, tua ukna hangin India gam nangawn a mangthang ding hi cileng kici thei hi, na sang thei hiam a kicih ciangin, na gennop uhleh na sandan un ka telsiam mahmah hi, hih thute tawh kisai note dinmun tel sinsen hileng ka Ministry zumpi tawnin President tung ah ka thupuakna uh kician ding ahih manin, hici bang a hong dongkik hi ing ci in, kamkhum tawh hong dawngkik hi.

(d) Manipur State Assembly in a thukim Bills teng tawh kisai kikupna khitciang, hih thu teng simloh, President tung ah bang thu puak nuam nahi uhhiam hong ci ahih manin, Manipur gamkee ah ka sanggam laizom, khangno mimal (9) pen kumpite galkap gilote in a khutlum uhtawh hong thahsak liuleu a hih manin, hih thu kilungkim peuhmahlo hi, Manipur kumpi in hih tawh kisai mawhpuak nei hi cih khautak in kigen thei a, hih thu tawh kisai Minister-pu inzong thu leh la a kicingin zakhin hiam, ahihkei leh, kihona a thudam ding deih hiam, a thu hong laih semsem hi. Manipur Governor in tua Bills teng peuhmah a kipsaklohna ding, President mahmah in, Manipur gamkee sung ah Presidential Rule phuang a, Singtangmite in UN Thukhunte zui in Self-Determination thuneihna angahna ding kideih mahmahta hi ci in kikuppih teitei thei hi.

(e) Minister-pu in, Embassy zumpi mai tektek Platform tung a Lungpho a om Zomi-te a kongvang pan hong lakin, hehpihna tawh, na mipite hih Platform ciang hong nehsakkei unla, amai a Gandi Park ah suakta takin Lungphona hong lakzaw un ci in hong thuum hi.

(f) Miniter-pu tawh Singtangmite thu tawh kisai maitang kimu in kihona, kikupna leh Laipi phahna pen kicing takin kibawl mahhi cih ciaptehna dingin ci in, Zongeina Puanlaisan dial khat leh, Manipur gamkee sung a Singtangmite tawh akibang in US gam sung a Zomi buppi kidingkhawm hi cih lahna in Zomi Directory USA Laibu ki-ap hi.

(g) Zomi Innkuan USA kipawlna Palaite leh India Embassy zumpi a Minister-pu tawh kimuhna pen a zum sung a Zumnasem khempeuh in hong theihpih in, a thusa/kongcingte inzong limtak hong muak uhhi. Hih kimuhna hun nai lang val sawt a, Lungphona tawh kisai lawhcing takin kisem zo hi ci in Palai tengin kiciamteh hi.

8. Zomi Innkuan USA kipawlna makaihna tawh Lungphona ah Executive Committee panmunlen Makai (6) leh Board Member (20) kiim, India lam pan laizom sanggamte (10) kiim leh innteek Zomi Innkuan DC pan Makai, Pawlmi mimal (50) val kipha hi. Khual gamlapi panin Washington DC khuapi zuan in, innma loma nusia a, hun leh vai, nei leh lam tampi piakhia a kikuan ahih manin, Lungphona ah a kihel gam leh minam it, Zomi laizom khempeuh tung ah Zomi Innkuan USA kipawlna Executive Committee pawlin nakpi lungdamna kiko hi. Tuamah bangin innteek in pangin, thu leh la kisam khempeuh ahong vaan, zin leh leengte nuamtak in ahong do Zomi Innkuan DC Makaite leh Pawlmite tungzong kilungdam mahmah hi.

9. Zomi Innkuan USA kipawlna makaihna tawh Lungphona thute lim leh meel tawh a hunzui in Media ah kisuang ding hi. India President tung ah a kiphah Laipi pen UN Zumpite ahzong akipuak ding hi a, lai thupi in kikem hi. Kipawlna leh kumpi thuneite tung ah akisam bangin kipuak sawm hi.

10. Manipur gamkee sung a Singtangmite dinmun leh thuneihna, Singtang gam leh leitang hu ding a lungphona pan a nuntakna apiakhia Zogam Saphate zong zahtakna leh gaalna dingin, Zomi Innkuan USA – Fund Raising Committee khat kidinzo a, September kha bei ciangin a kingah sum leh paaite Zogam Salphate innkuan pihteng tung ah kipuak ding hi.

Zota.

Thupiakna bangin;

GSKhup
(Go Sawm Khup, PE)
General Secretary
Zomi Innkuan USA, Inc.
Tulsa, OK, USA.