Mihing Nam Nih

Mihing Nam Nih

Lai Siangtho in Christiante nam nih bek in khen hi. ‘Na sat leh sa in la, na vot leh vot in,’ ci hi. ‘Kuamah in To nih na’ sem theilo ding hi,’ ci sawnsawn hi. Sa lah sa lo, vot lah vot lo cih om theilo ding hi ngiat hi. Christian biakna ah Neutral cih om theilo ahih manin khatzaw sam ah om kul hi. Nang koi pawl ah na om hiam? Na deihtelna tawh kizui in na ut utna pawl ah na om thei hi.

Leitungmi: Lai Siangtho sungah Leitungmi a om thu kiciantakin na gelh zo hi. I Kor 2:14-15 ah, “Ahi zongin Kha Siangtho a neilo mite in Pasian’ Kha Siangtho in a hong piak nate sang theilo uh hi. Kha Siangtho a nei mite bek in theithei uh ahih manin amaute in tel theilo uh a, amau-a’ dingin a haihuai thu khat ahi lel hi,” ci hi. Hihlai a Leuitungmi kicite pen mihingte’ ngaihsutna leh muhna cianga mihoih a kitheite ciang bek ahi uh hi. Kha Siangtho in a lamdan sakloh mite cihna ahi hi. Sawltak Paul in in a genna ah, “Christian kici, pawlpi a minkhum, kikhawm gige, Pawlpi vai a sepna bawlna khatpeuh a kihel gige, ahi zonga Topa Jesu tawh kizopna taktak a neilote, piangthaklote,” pen Leitungmite na ci hi.

Tuabang mite in leitung pilna leh gelsiamna tawh ‘Christian ka hi hi’ a ci uh ahi hi. Hihte pawlin Kha Siangtho neilo uh ahih manin Dawimangpa’ nuaiah a cih bang bangin gamta uh hi. Hih bang mite in leitung deihna, taksa utna thupisak mahmah uh hi. Nuam a sak bang uh lungsim ngaihsutna nuntakpih zaw uh hi. Kha Siangtho’ lamlahna theithei lo uh hi. Tua ahih manin Leitungmite in amau’ pilna leh gelsiamnate bulphuh uh a, Pasian’ deihna, Pasian tupna, Pasian lamlahnate theisiam theilo uh a, Kha Siangtho in lampi man a kawkmuhte zong theisiam thei mahmah lo uh hi. Tua bang thute a nawlkhin uh hi. Tua ahih manin Leitungmi I hih khak leh Vantung gam I tuntheina dingin Khami I suah ding I hanciam tek kisam ding hi.

Khami: I Kor 2:15 ah, “Kha Siangtho a nei mite in na khempeuh theithei uh a, ahi zongin leitung mite in bangmah theilo uh ahih manin a lungmang uh hi,” ci hi. Hih bang mite pen Kha Siangtho in a lawn bek hilo in a lungsim ngaihsutnate tanpha uh a suk lamdangte ahi uh hi. Kha Siangtho in hih bang mite’ sungah teng in, lamkaih in, gentuakte gensak in, sak tuakte sa sakin, Pasian’ deihna zong theiciansak a, Khris deihnate telsiam sakin, ama’ sunga taksa deihnate/utnate zong do zo sak hi.

Khami hihna dingin lungsim khempeuh tawh Pasian up ding, Topa Jesu pen Gumpa leh Topa a san ding kisam hi. Tuabang ahih kei leh Khami ki hi theilo hi. Khami I hih ciangin Kha Siangtho in I utna I duh I deihte hong kheng lamdang pan bek ding hi. Tuabang a khen lamdangna I ngah ciang bek in Khami kihi pan ding hi.

Source: Fellowship News