Mihing leh leitang

Mihing leh leitang

Pasian in mihingpen tungman tawh hongbawl hi ci in i thei hi. Tungman cihpen leitangh ci lengzongh ki khiallua lo hi. Mihingte pen leitangh mah tawh a ki bangsitset i hihi. ‘Leipan in a kibawl mi lei ah ciahkik’ Pian 3:19 cihciangin mihingte i piankhiatna pen leitangh hi ci in hong gen ahihi.

I gensa lokhopa thu tawh a kibang i hihi. Leitangh cihpen nial a neilo, ut bangbang khaici vawh theihna lo ahihi. Mihingte leitangh mah ahihmanin ut bangbang khaici ki vawh thei hi. A sia, a pha, thuhoih, thusia ut bangbang mihing sungah ki tuhthei hi. Mihing in nial ngeilo ding hi.

Hauhna thu a tuh nuam mi in tuh dingaa pilna thu a tuh nuam mi in tuh ding hi. I theih ding thupen i tuh bangbang hong kisang pahpah hi cihthu ahihi.

Tua akimuthei leitangh sungah akimutheilo ankungte a khangsak tha a om mahbangin mihingte sungah sunglammi om hi. Tua pen mihing leitangh sungah a kituh bangbang a po sak tha ahihi.

Lo leitangh hoih in lokhopa a thahat mahmah zongin a kituh lo khaici po tuanlo hi. Na kamtawh pulak in na lungsim sungah ngaihsun in. Tua pen khaici a tuh na hihi.

Lokhopa ihmu in, sunlehzan in a om kalin tua khaici khangkhang lel hi. Leitangh in a ma tavuan la in khawllo in na sem paisuak hi. A hun a cinciangin a gah a vui nei sak hi.

Tuamahbangin na pilna tawh na deihkhat tel in khaici na tuh khitnakleh na phawkloh kal nangawnin na sunglamtha in na hongsem ding hi. A hun a cin ciangin na vawh banglian in na at ding hi.

Leitang leh lokhopa

Lokhopa thu tawh genteh lengzongh ki tel baih mahmah ding hi. Ih pilna, thahatna, ih thungaihsut theihna te a hi pualam ngaihsutnate pen lokho pa tawh kibang hi.

Mihingte sunglam aa a kisel thahatna leh a ompilna pen leitangh tawh kibang hi.
Lokho pa pen ih pumpi ahihi. Ih pilna leh ngaihsutnate tawh a hoih leh a hoihlo ki khenkhia thei hi.

Lokho pa in a ma ngaihsut leh khensatnatawh a lo (leitangh) sungah a ut bangbang tuhsuk thei hi.

Singno a suannop leh suan, vaimim a vawhnop leh vawh, a ut bangbang tuh hi. Tua ngiahsutna leh khensatna bangbangin a pumpi in sem hi.

More: ZOMIA – I zak ngeina sang a zaizaw Zogam, Zomi a kitap leitang min

A tuh ding khaici pen a ma tel giat ahihi. Leitangh in ahihleh bangkhaici kituh ci in buai ngeilo hi. ‘Tua hongtuh un’ zongh cilo hi. A ki vawh khaici te deihlo in nial ngei lo hi. A kituh bangbangin a kungposak lel hi.
Leisungah mittawh akimutheilo ankung a khangsak tha in na sem pah hi. Khaici a kituh ni pan kisim to pah ciatciat hi.

Leitangh in khialvet lo in nasem pah hi. A hun a cin ciangin lokho pa in a gah at hi. Siamsin Library