Mihau pasal bang ci tenpih thei ding

Mihau pasal bang ci tenpih thei ding

“Melhoihna pen nang ii suantaakpi ahihleh tu zawh kum 10 khit ciang tua te bang mah na nei nawn kei ding hi …”

Amel hoih mahmah nungak khat in American aa om sumbawlna forum khat ah “Ken koi ci bang in mihau pasal ngah thei ding ka hiam?” cih thulu tawh anuai aa bang in dotna hong nei hi.

“Hih anuai aa lai te pen ka lungsim sung aa om kammal te hi. Kei pen kum 25 apha khin, mi khempeuh phial in hoih hong sak mahmah uh nungak khat hing. Ka kam nem hi. Kum khat in sumlut dollar lakh 5 anei pasal ka tenpih nuam hi. Kei pen huaiham ci in mi te in hong ummawh kha ding uh hi. Ahihang in New York bang aa khuapi te ah kum khat in dollar lakh 10 sumlut anei te na ngawn pen mihau in kisim nailo lai ahihman in tu aa ka ngetna pen huaiham vai het lo ding in ka lam-en hi.

Hih forum sung ah kum khat in lakh 5 sumlut anei mi omlo maw? Amau zi nei gai khin uh hizaw maw? Na vek un dotna khat hong dong nuam ing. Ken koi ci bang in hih leng no dan mihau te tenpih thei ding ka hiam? Ka ki hopih sunsun teng lak ah ah hau pen ka cih ding pa in kum khat sumlut lakh 2 bek ngah hi. Hih pen aniam pen in ka ciamteh hi. New York khuapi sung ah ten nading in kum sumlut lakh 2 pen kicing thei peuh mah lo ding hi. Ngaihsutna hong nong piak nading un kong thum hi. Kong dotnop beh lai in,

(1) Mihau te in koi lai ah ahun uh zang uh hiam? (Zusai, hotel, gym cih te aakipan, amun thei nuam ing.)

(2) Kum bang zah aphakhin mihau te kei aading in sanhuai lo hiam?

(3) Bang hang in mihau pawl khat te ii zi te amel uh hoih veva lo uh hiam? Ka muh ngei mihau te zi pawl khat pen taaksuah mahmah uh hi. Ngaih bang hetlo uh hi. Ahihang amau mihau pasal ngah zo uh hi. Mi kim in hoihsa in a etet uh nungak melhoih te mahmah kamsai phadeuh sa ing.

(4) Koi dan numei te tenpih ding, koi dan numei te cimphawng kikholhpih ding ci in no koici khensat na hih uh hiam? (Tun hih bang aa kong dotna ii ngimna pen kitenna ding hi) ~ Bowers

Hih nungaknu ii dotna pen New York Wall Street aa nasem khat in anuai aa bang in na dawng kik hi.

“Kong it mahmah Bowers aw na laigelh khempeuh lunglut tak in atawpna dong na sim ing. Numei tampi te in zong nang bang in dong nuam ding uh cih um ing. Nang ii dotna te pen sumlomphunna lam (investment) pan in hong dawng masa ning. Kei ii kum khat, ka sumlut pen dollar lakh 5 val den hi. Tua ahihman in mite hun amawk beisak ka hihloh ding lam ka ki um hi.

Sumbawl mi khat ii muhna tawh hong gen leng nang tawh kiten ding pen alau huai penpen sumlei sumzuakna khat ahi hi. Ahang pen ih theihsa hi lel hi. Hong gen ning, nang genna tungtawng in cil leng hi pen “melhoihna” le “sumtang” kikhekna ahi hi. Nang na melhoihna pia ding. A khat zaw in sum hong pia ding. Hih pen nang aading akilawm kituak kikhekna ci mai o. Ahizong in gen nuam takei zong genloh aphamawh thu hong om mawk hi. Nang ii hoihna pen hong bei thei ding hi. Sum pen bang mah cih kei peuh leng bang mah cilo lel hi. Kei ii kumsim sumlut pen akum akum in khang lel ding hi. Ahizong in nang ii hoihna pen akum akum in hong hoih semsem lo ding hi.

Sumbawlna pilna lam tawh kituak in hong gen lai ning, kei pen ka man a khang semsem ding van tawh kibang aa nang pen aman akiam semsem ding van tawh akibang na hi hi. Na man akiam hiat hiat bek hilo in akiam hanhan van tawh na kibang ding hi. Tu in nang pen kum 25 na pha aa tuzawh kum 5 khit teh na melhoihna hong en mi pen hong tawm semsem ding hi. A hoih mahmah na mel pen hong guai pah lel ding hi. A zenzen in na melhoihna pen nang ii suantaakpi ahihleh tuzawh kum 10 khit ciang tua te bang mah na nei nawn kei ding hi.

Ko Wall Street kammal tawh hong gen ding hileng vanlei vanzuakna ah zia khat nei ung. Nang tawh bang hileh van kikhekna (Trading Position) hong hi ding hi. Van kikhek ding ciang tua ih kikhek nading van ii man hong kiam leh amanlang in paikhia kik pah hi ung. Sawt vei ki kem thei lo. Aman akiam hanhan van te pen mite in akhut sung uh ah sauvei pi koih lo uh in lonkhia kik pahpah uh hi. Kum khat sumlut lakh 5 anei mite pen mihai kua mah omlo hi. Tua ahihman in ko pen nang tawm vei sung bek hong kithuah pih ding hi ung. Ki tenpih taktak ding in bel hong lunggulh khollo ding hi ung. Mihau te bangci tenpih thei ding cih thusim pen gimliang tawlliang in na kan nawn ken la ken ngaihsutna khat hong pia ning.

Nang le nang kum khat sumlut lakh 5 anei mi na hih zawh nading hanciam lecin bang mah theih mumal mel aneilo mihai mihau khat pasal in na neih sang in metzaw tham ding hiteh cih tawh ka laigelh hong hial bawl hi ning.”

မူရင္း “ခ်မ္းသာသူကို ဘယ္လိုလက္ထပ္ယူရမလဲ” နိုင္းနိုင္းစေန
Lailet – Peter Suumpi
Dec 30, 2017