Siamsinte lungngaih ding thu

Siamsinte lungngaih ding thu

Tuhun Zomi khangno nasep nei lo a vakvai mi tampi om hi.Bang hang hiam cih leh nu leh pa pawlkhat ten a tate uh thudon man lo uh hi.A tate sang in sum leh paai a buaipih zaw mi tampi om hi.Pawlkhat leu leu in lah tate ngekbawl(duat) lua liang zel uh hi.Tuamanin taten nuamtak sa in thadah suak uh hi.Naupang pen a neulai ua kipan mah in amau sepzawh ciang nasep sak ding thupi hi.Tua hileh thanuam zawdeuh uh a, zong lawhcing nuam uh hi.Tua banah mimal khat ciat zong nu leh pa tungah kinga lo a eima’ tha tawh din zawh sawm ding thupi hi.Picing ihih khitciang nu leh pa kianga sum nget pen zumhuai ta hi.Eima’ pocket Money ciang beek thalawh zawh ding hi buang sam hi.India gam a diakin Mizoram khawng bangah kumpi nasep mah hoih pen hi.Ahizongin kumpi nasep ngah na ding baihlo zel hi.Kumpi nasep ngahna dingin panlakzia ding aki tangsam tampi om ding hi.

English leh Hindi nal taka siam ding hoih hi.Tuhun Global Village cihdan in kikawmna leh kithuzakna olsam ta hi.Tua ahihmanin Mizoram sung beka ki bilhcip hun hi nawn lo hi.Mizoram sung bangin state dangah i maingal theih nangin Hindi leh English nal taka siam kuul hi.State dangte English a siam lo ten zong Hindi siam hamtang uh hi.English leh Hindi i siam kei leh midangte lakah hong nuam hetlo hi.Mizoram pen Lusei pau bek bek kizang mawk ahihmanin pau siam lamah state dangte sangin ki niam zaw hi.English leh Hindi siam pen advantage tam mah mah hi, siam hamtang sawm in.
Thupi i sak(Value system) a dik kuul hi.Mi pawlkhat in thupi a sak uh pen dikzo lo mawk hi.Zu dawn a nuamsa te thupi sak ding hi lo hi.Mi thanuam, laisiam leh mi kuhkal te khawng thupi sak ding hi zaw hi.Mi tha awl a vak vak te khawng en ding hi lo hi.Mizoram bang mipi value system diklo hi.Bang hang hiam cih leh Youth Icon/Idol kithupi ngaihsut lua hi.Hih te pen kal khat sung khawng bek kisinna tawh a ki ngah thei hi.Ahizongin khuatang in lungdampih in nasia takin lawm zel uh hi.Kum tampi laisinna tawh a ki ngah Civil Services(MCS,MPS etc.) te lah khuatangin khuadon lo uh hi.A tak tak in ci leeng hih bang mite thupisak huai zaw tham hi.Tua ahihmanin thupi i sak(Value system) a dik lim lim ding pen thupi hi.Tua thupi i sak khat pen miten hong lunggulh ding uh a, tuabang mi hong suak nuam ding uh hi.Gentehna in; nungak ten zudawn leh mi tha awl lua te sangin Pasian nasem te khawng thupi sa zaw le uh Pasian nasem nuam kibehlap sem sem ding uh hi.

Thanuam leh kuhkal ding kitangsam mah mah hi.A siam thei khempeuh zong a lawhcing hi khin tuan lo hi.A thanuam leh a kuhkal te a lawhcing hi zaw hi.I sep khat peuh peuh hoihtaka sep ding zong thupi hi.Munphiat ten siang taka phiat ding, vaihawm ten diktakin hawm ding hoih hi.Laisinna lama lawhcing kumpi nasem lian te pen gam leh nam adingin zong thupi uh hi.Gualnopna lam lunggulh luat pen thadah kipatna khat ahi hi.Sangnaupang khat na hih leh Party leh Function tuam tuam ah kihel kim sawm se ken.A kihel ding khawp midang na om lel ding uh hi.Kumpi nasep hoih na ngah nangin na Graduate phawt kuul hi.Na Graduate masiah adangte ah ki naak zat lua sedah phot mai in.Laisinna lamah technical line lama sin ten theihtawp suah uh ahihmanin zong zattaak diak uh hi.Arts line a pai te bel passed awl zaw tham ahihmanin gina zolo thei hi.Ahizongin Arts kuhkal taka asinte pen Civil Services lamah a lut tamzaw tham uh hi.Na zuih line khat peuh citak leh thanuam taka na sin ding thupi hi.

Sangkahna mun hoih teelsiam ding zong thupi hi.Sang i cih zong khat leh khat kibangkim lo hi.Tua ahihmanin a hoih zawdeuh mah bawh ding thupi hi.Hi zo leeng Mizoram sung bek ahi lo vaigam Delhi,Bangalore etc. khawngah laisin zaw leeng hoih ding hi.A khuapi thei thei mah hoihzaw hi.

Kawlgam ah tan 10 pen laisinna lamka ahi hi.Ahizongin India gamah tan 12 pan ka pan bek hi.Tan 12 pan in stream lianpi thum ARTS,SCIENCE leh COMMERCE ah kikhen hi.Hih hun pen sangnaupangte adingin limtaka ngaihsut a kuul hun laitak ahi hi.A hoih leh mite zuih khat peuh zuih mawk ding hi lo a, eima lunglutna leh i zawh ding teelsiam kuul hi.Competitive lam hun saupi ngaihsutna in Class XII tan beek Science la thei leeng deih huai.Mathematics subject zong lakkhawm ding hoih hi.UPSC leh SSC khawng ten Competitive exam a bawl ciangun GK ah Class XII(Sc)sungthu tampi suaksak zel hi.Doctor leh Engineer asin dingte in Class XII Science (PCM/PCB) a lak uh kuul hi.Computer Science University hoih deuh a sin dingte in Class XII Science ah Mathematics subject a lak uh kuul hi.Ahizongin a thupi pen bel a sin dingte in a lunglut uh leh a zawh ding uh a zuih ding hoih hi.

Amau lunglut pen leh nuam a sak uh a semkha te mi hampha ahi uh hi.Ahizongin mihing pen i geel bang lian in tangtung thei khollo hi.Siamna tuam deuh a neite lo buangin a lemtang masa khatpeuh sep phot ding hoih hi.Mi pawlkhat ten Doctor sin nuam mah mah uh a, ahizongin nu leh pa sum neih zawh loh manin sin thei lo uh hi.Pawlkhat lah a nu leh pate hauhna hangin a taten siat lawh zawzen cih bang om thei hi.Na lunglutna bang sin zolo in na om khak phial leh zong lungkia pah sam kei in.Nang lunglutna pen na neekzonna dinga Pasian hong sehsak zong hi khollo thei hi.Tua ahihmanin nasep khat peuh citak leh muanhuai takin sem in.Tua pen Pasian’ deihdan zong ahi hi.

Pau Tun Thang